អាមេរិកបញ្ជាឲ្យបិទស្ថានកុងស៊ុលចិន នៅទីក្រុងហ៊ូស្តុន រដ្ឋតិចសាស់ ៣ថ្ងៃទៀត
ទីក្រុងហ៊ូស្តុន ៖ សហរដ្ឋអាមេរិក បានបញ្ជាឲ្យបិទស្ថានកុងស៊ុលចិន នៅទីក្រុងហ៊ូស្តុន រដ្ឋតិចសាស់ កាលពីយប់ថ្ងៃអង្គារ ទី២១ កក្កដា ២០២០…
ទីក្រុងហ៊ូស្តុន ៖ សហរដ្ឋអាមេរិក បានបញ្ជាឲ្យបិទស្ថានកុងស៊ុលចិន នៅទីក្រុងហ៊ូស្តុន រដ្ឋតិចសាស់ កាលពីយប់ថ្ងៃអង្គារ ទី២១ កក្កដា ២០២០ ដោយទុករយៈពេលឲ្យ៧២ម៉ោង នាំឲ្យអ្នកការទូតចិន នាំគ្នាដុតឯកសារ និងក្រដាស ដាក់ក្នុងធុងសំរាម នៅទីធ្លាអាគារស្ថានកុងស៊ុល ។
ក្រសួងការបរទេសសហរដ្ឋអាមេរិក បានអះអាងថា ការបិទជាបន្ទាន់នេះ គឺចាំបាច់ដើម្បី “ការពារកម្មសិទ្ធិបញ្ញាអាមេរិក និងព័ត៌មានឯកជនដទៃទៀតរបស់ពលរដ្ឋអាមេរិក” ។
លោក Marco Rubio សមាជិកព្រឹទ្ធសភា គណបក្សសាធារណរដ្ឋ ដែលជាប្រធានស្តីទី នៃគណៈកម្មាធិការស៊ើបការណ៍សម្ងាត់ព្រឹទ្ធសភា បានអះអាងនៅលើបណ្តាញសង្គមទ្វីធើរ នៅព្រឹកថ្ងៃពុធនេះថា “ស្ថានកុងស៊ុលរបស់ចិន នៅហ៊ូស្តុន គឺជាមជ្ឈមណ្ឌលចារកម្មដ៏ធំមួយ” ។ លោកបានបន្ថែមថា “ការបង្ខំឲ្យបិទនេះ គឺវាហួសពេលទៅហើយ” ។
ចំណែកឯ ប្រទេសចិនវិញ បានថ្កោលទោសយ៉ាងខ្លាំង ចំពោះការសម្រេចនេះ ខណៈដែលស្ថានកុងស៊ុល ទទួលបានដំណឹងអំពីការសម្រេចចិត្តបិទនេះ កាលពីថ្ងៃអង្គារ ចំពេលមានភាពតានតឹងជាបន្តបន្ទាប់ រវាងទីក្រុងប៉េកាំង និងវ៉ាស៊ីនតោន ។
អ្នកនាំពាក្យក្រសួងការបរទេសចិន លោក វ៉ាង វេនប៊ីន បានហៅសកម្មភាពនេះថា ជាសកម្មភាពគួរឱ្យស្អប់ខ្ពើម និងមិនសមហេតុផល ដែលនឹងបំផ្លាញទំនាក់ទំនងរវាងប្រទេសទាំងពីរ ។
លោក វ៉ាង វេនប៊ីន បានថ្លែងក្នុងសន្និសីទសារព័ត៌មាន នៅទីក្រុងប៉េកាំងថា “ការបិទជាឯកតោភាគី ហើយបិទអគ្គកុងស៊ុលចិន នៅហ៊ូស្តុន ក្នុងរយៈពេលដ៏ខ្លីនេះ គឺមិនធ្លាប់មានទេពីមុនមក ហើយសកម្មភាពថ្មីៗរបស់សហរដ្ឋអាមេរិក គឺបង្កើនការប្រឆាំងនឹងប្រទេសចិន” ។
លោក វ៉ាង វេនប៊ីន បានព្រមានពីវិធានការទប់ទល់យ៉ាងម៉ឺងម៉ាត់ ប្រសិនបើសហរដ្ឋអាមេរិក មិនវិលទៅរកភាពដូចដើម វិញទេ ។
ក្រៅពីស្ថានទូតរបស់សហរដ្ឋអាមេរិក នៅទីក្រុងប៉េកាំង អាមេរិក ក៏មានការិយាល័យកុងស៊ុលចំនួន៥ នៅចិនដីគោក រួមមាន នៅសៀងហៃ, ក្វាងចូវ, ឈិនឌូ, វ៉ូហាន និងសៀនយ៉ាង ។
ទីក្រុងហ៊ូស្តុន រដ្ឋតិចសាស់ គឺជាស្ថានកុងស៊ុលចិនដំបូងបង្អស់ ដែលត្រូវបានបង្កើតឡើង ក្នុងឆ្នាំ១៩៧៩ បន្ទាប់ពីសហរដ្ឋអាមេរិក និងចិន បានបង្កើតទំនាក់ទំនងការទូត ៕
ចែករំលែកព័តមាននេះ