រាជធានីភ្នំពេញ ៖ កម្លាំងនគរបាលប៉ុស្តិ៍រដ្ឋបាលផ្សារចាស់ ឃាត់ខ្លួនបុរសម្នាក់ ក្រោយពីប្រពន្ធរបស់ខ្លួនដាក់ពាក្យប្តឹងចោទប្រកាន់ថា បានរំលោភកូនស្រីចុង បានសម្រេច កាលពីវេលាម៉ោង១រំលងអាធាត្រ ឈានចូលថ្ងៃទី១៥ ខែមករា ឆ្នាំ២០១៥ ស្ថិតនៅផ្ទះលេខ៥៨អឺ២ ផ្លូវលេខ១១៨ ភូមិ២ សង្កាត់ផ្សារចាស់ ខណ្ឌដូនពេញ ខណៈពេលដែលប្រពន្ធ ទៅធ្វើការបាត់ ។
មន្ដ្រីនគរបាលព្រហ្មទណ្ឌខណ្ឌដូនពេញបានបន្ដទៀតថា ជនសង្ស័យឈ្មោះបូរិន សារូ អាយុ២៦ឆ្នាំ មុខរបរ ជាអ្នកបើករថយន្ដតាក់ស៊ី ស្នាក់នៅផ្ទះជួលខាងលើ បានចាប់រំលោភកូនស្រីចុង អាយុ១៦ឆ្នាំ រហូតបានសម្រេច ។
យោងតាមពាក្យបណ្តឹងរបស់ក្មេងស្រីរងគ្រោះ បានឲ្យសមត្ថកិច្ចដឹងថា កាលពីវេលាម៉ោង១១យប់ ថ្ងៃទី១៤ ខែមករា ខណៈដែលនាងកំពុងដេក នៅក្នុងបន្ទប់ បុរសជាឪពុកចុង បានយកដៃទៅច្របាច់ដោះខាងស្ដាំ ពេលនោះនាងក៏បានស្រែក ឱ្យយកដៃចេញ តែឪពុកចុងគំរាមរហូត ហើយនាងយកភួយដណ្ដប់ដេកលង់លក់ដល់ម៉ោង១ រំលងអាធាត្រឈានចូលថ្ងៃទី១៥ ខែមករា ក៏ត្រូវឪពុកចុងចាប់រំលោភបានសម្រេចតែម្ដង ។ ក្រោយពីរំលោភហើយ ឪពុកចុងបានគំរាមនាងមិនឱ្យនិយាយរឿងថោកទាបមួយនេះ ប្រាប់ទៅម្ដាយរបស់ខ្លួននោះឡើយ បើមិនដូច្នេះទេ នឹងសម្លាប់ចោលតែម្ដង ។
ដោយសារតែមិនអាចទ្រាំនឹងការឈឺចាប់នូវទង្វើពីសំណាក់ឪពុកចុងរបស់ខ្លួន នាងក៏បានទូរស័ព្ទប្រាប់ទៅម្ដាយបង្កើត ដែលកំពុងធ្វើការនៅហាងបារាំងមួយកន្លែង ។
ស្ត្រីជាម្តាយបាននិយាយឲ្យសមត្ថកិច្ចដឹងថា ពេលដែលដឹងរឿងថា ឪពុកចុង(ត្រូវជាប្ដីរបស់ខ្លួន)ចាប់រំលោភកូនស្រីរបស់ខ្លួនភ្លាមៗនោះ គាត់បានស្រូតមកផ្ទះ ហើយដាក់ពាក្យបណ្ដឹងទៅនគរបាលប៉ុស្តិ៍រដ្ឋបាលផ្សារចាស់ រួចហើយក៏ណាត់ជាមួយប្ដីហេងស៊យរបស់ខ្លួននៅព្រឹកថ្ងៃ ទី១៥ ខែមករា ក្បែរផ្សាររាត្រី រួចក៏ឃាត់ ខ្លួនប្រគល់ឱ្យនគរបាលតែម្ដង ដើម្បីចាត់ការតាមច្បាប់ ។
បុរសជាឪពុកចុងចាប់រំលោភកូនស្រីប្រពន្ធរបស់ខ្លួន ត្រូវបានឃាត់ខ្លួនកាលពីព្រឹក ថ្ងៃទី១៥ ខែមករា ឆ្នាំ២០១៥ ហើយបច្ចុប្បន្នត្រូវបានឃុំខ្លួននៅអធិការដ្ឋាននគរបាលខណ្ឌដូនពេញ ដើម្បីកសាងសំណុំរឿងបញ្ជូនទៅកាន់តុលាការ ផ្ដន្ទាទោសតាមផ្លូវច្បាប់ ៕
ចែករំលែកព័តមាននេះ