រាជធានីភ្នំពេញ ៖ បច្ចុប្បន្នតម្លៃផ្ទះសម្តែងមិនបានចុះថ្លៃនោះទេ បើទោះបីជាគេសង្កេត ឃើញថា មានផ្ទះជាច្រើនបានដាក់ស្លាកលក់ក៏ដោយ ជាមួយគ្នានេះដែរភ្នាក់ងារលក់ផ្ទះ និយាយថា នៅក្នុងរដូវកូវីដ ១៩…
រាជធានីភ្នំពេញ ៖ បច្ចុប្បន្នតម្លៃផ្ទះសម្តែងមិនបានចុះថ្លៃនោះទេ បើទោះបីជាគេសង្កេត ឃើញថា មានផ្ទះជាច្រើនបានដាក់ស្លាកលក់ក៏ដោយ ជាមួយគ្នានេះដែរភ្នាក់ងារលក់ផ្ទះ និយាយថា នៅក្នុងរដូវកូវីដ ១៩ នេះ តម្លៃផ្ទះមិនចុះថ្លៃឡើយ ច្រើនបំផុតគេបានចុះថ្លៃមួយ ពាន់ ឬពីរពាន់ដុល្លារប៉ុណ្ណោះ ។ ជារួមផ្ទះក្នុងរដូវកូវី ១៩ នេះមិនត្រឹមតែមិនធ្លាក់ថ្លៃដូច ទំនិញនានានោះទេ ថែមទាំងលក់ដាច់ជាធម្មតាសម្រាប់ផ្ទះមានតម្លៃ ១០ម៉ឺនដុល្លារចុះ ក្រោម ។
កញ្ញា ម៉ានីត អ្នកលក់ផ្ទះឱ្យបុរីល្បីឈ្មោះមួយដែលបានសង់ផ្ទះលក់នៅច្រើនកន្លែង ក្នុងក្រុងភ្នំពេញឱ្យដឹងថា មានពលរដ្ឋជាច្រើនបានធ្វើដំណើរទៅដល់ការិយាល័យលក់ផ្ទះ របស់ក្រុមហ៊ុនកញ្ញានៅក្នុងរដូវកូវីដ ១៩ នេះដើម្បីទិញផ្ទះបង់រំលស់ ។ ម៉ានីត ឱ្យដឹងដូច្នេះ ថា «ក្នុងមួយថ្ងៃៗខ្ញុំលក់ផ្ទះបានពី ៥ ទៅ ១០ផ្ទះ ។ ផ្ទះនៅក្រុមហ៊ុនខ្ញុំមានតម្លៃចាប់ពី ៥ម៉ឺន ដុល្លារឡើងទៅ ។ អ្នកទិញផ្ទះសឹងតែ ១០០% គឺទិញបង់រំលស់ ។ ជាមធ្យមក្នុងមួយខែបើ បង់រំលស់សុទ្ធរយៈពេល ១៥ឆ្នាំ គឺប្រហែលត្រូវបង់ជិត ៦០០ដុល្លារ ។ ក្រុមហ៊ុនខ្ញុំអនុញ្ញាត ឱ្យអតិថជនបង់រំលោះដល់ ២០ឆ្នាំ» ។
លោក វុទ្ធី អ្នកលក់ផ្ទះឱ្យក្រុមហ៊ុន Real Estate មួយ ទទួលស្គាល់ថា ស្ថានភាពទី ផ្សារផ្ទះបានល្អប្រសើរបន្តិចចាប់ពីចូលឆ្នាំខែ្មរក្នុងខែមេសាមក ។ លោកបន្តថា ស្ថានភាព លក់ផ្ទះនៅពេលនេះមិនអាក្រក់ដូចកាលពីខែកុម្ភៈ និងមីនានោះឡើយ តែអ្នកលក់អចលន ទ្រព្យម្នាក់នេះនិយាយថា ផ្ទះដែលគេលក់បាននៅពេលនេះ គឺសម្រាប់ប្រជាពលរដ្ឋខ្មែរ ប៉ុណ្ណោះ ។ ផ្ទះសម្រាប់ជនបរទេសវិញ គឺលក់មិនដាច់ឡើយ ។
លោក វុទ្ធី ឲ្យដឹងទៀតថា ទាំងបុរី និងខុនដូដែលមានតម្លៃលើសពី ១០ម៉ឺនដុល្លារ ឡើងទៅ គឺពិបាកលក់ណាស់ ពីព្រោះផ្ទះថ្លៃសម្រាប់តែអ្នកមាន ឬជនបរទេស ។ អ្នកមាន ដូចជាបានទិញផ្ទះសឹងអស់គ្នាហើយ ចំណែកបរទេសមិនអាចធ្វើដំណើរបានទេនៅពេល នេះ ដូច្នេះមានតែអ្នកមានជីវភាពមធ្យម ឬក្រោមមធ្យមជាខ្មែរ ដែលពួកគាត់នៅព្យាយាម ទិញផ្ទះបង់រំលស់ដើម្បីរស់នៅក្នុងទីក្រុង ។
ឈ្មួញណ្តាលខាងលើនេះហាក់និយាយត្រង់ថា ទោះបីមានជំងឺកូវីដ ១៩ ក្តីតែផ្ទះមិន បានធ្លាក់ថ្លៃទេ ។ លោក វុទ្ធី និយាយជាមួយស្នាមញញឹមថា វាធម្មតាទេ អ្នកសង់ផ្ទះលក់ មិនមែនអ្នកក្រឡើយ ដូច្នេះគេមិនខ្វល់ពេលណាលក់ដាច់ឡើយ ។ ទុកផ្ទះចោល ១ឆ្នាំ ឬ ២ឆ្នាំក៏មិនបះពាល់សេដ្ឋកិច្ចគេ ដូច្នេះ បើលក់មិនចំណេញ គឺគេទុកផ្ទះចោល ។ ធម្មតា ទំនិញរបស់អ្នកមានមិនងាយចុះថ្លៃទេ ។
ជាមួយការអះអាងថា ការលក់ផ្ទះដំណើរការជាធម្មតា គេក៏សង្កេតឃើញការដ្ឋាន សំណង់បុរីតូចធំជាច្រើនមានសកម្មភាពសាងសង់រាល់ថ្ងៃ ។ សំណង់ផ្ទះរាប់រយខ្នងបាន សង់ក្នុងមួយថ្ងៃៗនៅក្នុងសម័យកូវីដ ១៩ នេះ ដែលធ្វើឱ្យសេដ្ឋកិច្ចធ្លាក់ចុះ ហើយជំនួញ ជាច្រើនរងផលប៉ះពាល់នោះ ។ បើគេតាមដានគេហទំព័ររបស់ក្រុមហ៊ុនបុរីល្បីៗឈ្មោះ នោះ គេនឹងដឹងថា ការដ្ឋានសាងសង់ផ្ទះថ្មីៗបានបើកលក់ជាបន្តបន្ទាប់រាល់ថ្ងៃនេះ ។
លោក វុទ្ធី បានឱ្យដឹងបន្ថែមទៀតថា ខ្ញុំសង្កេតឃើញថា មានតែពលរដ្ឋយើងជាអ្នក ក្រដែលមិនទាន់មានផ្ទះរស់នៅ ហើយបាន ស្វែងរកទិញផ្ទះគ្រប់កាលៈទេសៈ ខំប្រឹងគ្រប់ មធ្យោបាយដើម្បីបានផ្ទះមូយនៅហ្នឹងគេ ។ ពួកគាត់មិនបានគិតថា មានកូវីដ ១៩ ឬគ្មាន ឡើយ ឱ្យតែមានឱកាសសន្សំលុយបានទុកបង់ឱ្យគេ គាត់មកទិញហើយ ៕
ចែករំលែកព័តមាននេះ