យោងតាមប្រព័ន្ធផ្សព្វផ្សាយរដ្ឋរបស់ម៉ាឡេស៊ី អោយផ្សាយថា អាជ្ញាធរបានរកឃើញ កាកសំណល់សំរាម ចំនួន ១១០ កុងតឺន័រ ដែលនេះជាការរកឃើញធំបំផុត នៅក្នុងប្រវត្តិសាស្ត្ររបស់ប្រទេសនេះ នេះបើយោងតាម CNN ចេញផ្សាយនៅថ្ងៃទី២០ កក្កដា ២០២០ ។
ប្រព័ន្ធផ្សព្វផ្សាយរដ្ឋ បានរាយការណ៍កាលពីថ្ងៃអាទិត្យថា ទូកុងតឺន័រទាំងនោះ ត្រូវបានគេទុកចោល នៅឯកំពង់ផែ Tanjung Pelepas ស្ថិតនៅភាគខាងត្បូងរដ្ឋ Johor ត្រូវបានអាជ្ញាធររកឃើញកាលពីខែមិថុនា ឆ្នាំ២០២០ ។
នៅខាងក្នុងទូកុងតឺន័រ មានកាកសំណល់អាឡិចត្រូនិច ប្រមាណជា ១.៨៦៤តោន (ជាកាកសំណល់ប្រភេទ EAFD) ដែលគេចាត់ទុកថា ជាកាកសំណល់ពុលបង្កគ្រោះថ្នាក់ ដែលមានធាតុពុល ដូចជាសំណ និងកាឌីមីញ៉ូម ។
ក្រុមមន្ត្រីបាននិយាយថា ទូកុងតឺន័រទាំងនោះ ត្រូវបាននាំយកមកពីប្រទេសរ៉ូម៉ានី ដើម្បីបញ្ជូនឆ្ពោះទៅកាន់ប្រទេសឥណ្ឌូណេស៊ី ហើយក្រុមហ៊ុនដឹកជញ្ជូន បានប្រកាសមិនពិតថា វាជាស័ង្កសី ។
រដ្ឋមន្ត្រីក្រសួងបរិស្ថាន លោក Tuan Ibrahim Tuan Man ថ្លែងថា “កាកសំណល់សំរាមនេះ ជាការឆ្លងកាត់ប្រទេសម៉ាឡេស៊ី ទៅប្រទេសឥណ្ឌូនេស៊ី ហើយគឺជាការរកឃើញ ដ៏ធំបំផុត នៃប្រវត្តិសាស្ត្ររបស់ម៉ាឡេស៊ី” ផងដែរ ។
អាជ្ញាធរម៉ាឡេស៊ី បាននិងកំពុងបញ្ជូនកាកសំណល់ ទៅប្រទេសរ៉ូម៉ានីវិញ ហើយស្នើសុំឲ្យប៉ូលីស បើកការស៊ើបអង្កេតក្រុមហ៊ុនដឹកជញ្ជូន ។
សូមជម្រាបថា ចាប់តាំងពីប្រទេសចិន បានហាមឃាត់ការនាំចូលកាកសំណល់ប្លាស្ទិកចូលប្រទេសក្នុងឆ្នាំ២០១៨ ក្នុងគោលបំណងសម្អាតបរិស្ថានរបស់ខ្លួន មានប្រទេសជាច្រើន បានស្វែងរកកន្លែងចាក់សំរាម ជំនួសប្រទេសរបស់ពួកគេ ដែលបង្កើតជាបញ្ហាសម្រាប់ប្រទេសនានា រួមមានកម្ពុជា ម៉ាឡេស៊ី និងហ្វីលីពីន ជាដើម ៕
ចែករំលែកព័តមាននេះ