រាជធានីភ្នំពេញ៖ រឿងក្តៅៗដែលធ្វើឲ្យមហាជនព្រួយបារម្ភជុំវិញស្ត្រីខ្មែរសញ្ជាតិអាមេរិកាំងម្នាក់ដែលបានលួចរត់ចេញពីកន្លែងធ្វើចត្តាឡីស័ក ហាក់មានសញ្ញាប្រសើរក្រោយពីសមត្ថកិច្ចបានរកឃើញស្ត្រីរូបនេះនៅខេត្តកំពង់ចាម ។
វីដេអូមួយឃ្លីបដែលគេបានចែកចាយយ៉ាងផុសផុលក្នុងបណ្តាញសង្គមបានឲ្យដឹងថា ស្ត្រីខ្មែរសញ្ជាតិអាមេរិកាំង ដែលបានលទ្ធផលតេស្តលើកទី១ គឺ «អវិជ្ជមាន» តែគាត់ត្រូវតែធ្វើចត្តាឡីស័ក ឲ្យគ្រប់កំណត់ ១៤ថ្ងៃ ហើយក្រុមគ្រូពេទ្យ កំពុងតាមដានសុខភាពគាត់ តែគាត់បែរជារត់ចេញពីកន្លែងចត្តាឡីស័ក និងបង្កការភ្ញាក់ផ្អើលកាលពីថ្ងៃទី ១៩ កក្កដា នាងបានរៀបរាប់ថាបានទៅកាន់កន្លែងជាច្រើន នៅខេត្តកំពង់ចាម រាប់ចាប់តាំងពីផ្សារធំ រហូតដល់កន្លែងធ្វើសក់ និងប្តូរពីផ្ទះសំណាក់មួយទៅកន្លែងមួយទៀត ជាដើម ។
វីដេអូឃ្លីបមានរយៈពេលជិត ១នាទីកន្លះ បានបង្ហាញស្ត្រី ខ្មែរ-អាមេរិកាំងឈ្មោះ មានឈ្មោះ LE VIRA ROSE សញ្ជាតិ អាមេរិក កើតនៅថ្ងៃទី៧ ខែមករា ឆ្នាំ១៩៨៤ នៅប្រទេសកម្ពុជា អង្គុយលើកៅអី គងអន្ទាក់ខ្លា និយាយរៀបរាប់ថា នាងបានស្នាក់នៅផ្ទះសំណាក់មួយកន្លែងនៅខេត្តកំពង់ចាម ក្រោយពីរត់ចេញពីកន្លែងធ្វើចត្តាឡីស័កនៅសណ្ឋាគារមួយកន្លែងនៅក្រុងភ្នំពេញ ។
ក្រោយរត់ចេញពីកន្លែងចត្តាឡីស័ក នាងបានឡើងជិះតាក់ស៊ីទាំងយប់ថ្ងៃទី ១៨ តែនាងអះអាងថានាងជិះតាក់ស៊ីតែម្នាក់ឯង មកដល់កំពង់ចាម ហើយសម្រាកនៅផ្ទះសំណាក់មួយកន្លែង ហើយព្រឹកថ្ងៃទី ១៩នាងក៏បានទៅផ្សារធំនៅទីរួមខេត្តកំពង់ចាម ទីកន្លែងនាងទទួលទានអាហារពេលព្រឹក រួចបន្តទៅហាងធ្វើសក់ ក្រោយពីចេញពីកន្លែងធ្វើសក់កាត់សក់រួច នាងក៏មកដល់សណ្ឋាគារមួយកន្លែងទៀតប្រុងចូលសម្រាកក៏ត្រូវបានសមត្ថកិច្ចរកឃើញរូបនាងតែម្តង ។
សូមរម្លឹកថាលោកជំទាវ ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាលបានថ្លែងប្រាប់អ្នកសារព័ត៌មានកាលពីថ្ងៃទី ១៨ កក្កដា ជុំវិញរឿងកូវីដ ១៩និងរឿងស្ត្រីដែលបានរត់ចេញពីកន្លែងធ្វើចត្តាឡីស័កយ៉ាងដូច្នេះថា «បញ្ហាហានិភ័យនេះ យើងមិនអាចមើលរំលងបានទេ ហើយដូចខ្ញុំតែងតែជម្រាបជូនហើយថា យើងមិនត្រូវមើលរំលងនូវលទ្ធភាពនៃការចម្លងវីរុសកូវីដ១៩ទេ ពីព្រោះវាអាចមានហានិភ័យ ហើយក៏អាចមានការឆ្លងគ្រប់ពេលវេលា គ្រប់កាលៈទេសៈ គ្រប់ទីកន្លែងទាំងអស់ ហើយនៅក្នុងករណីនេះ គាត់ស្ថិតនៅក្នុងចំណោមអ្នកដំណើរ ដែលគាត់រួមដំណើរតាមជើងហោះហើរ ជាមួយនឹងអ្នកដែលមានវិជ្ជមានវីរុសកូវីដ១៩ ដោយស្ថិតនៅក្នុងក្រុម ដែលតជើងហោះហើរនៅសាធារណរដ្ឋកូរ៉េ ឆ្ពោះមកកម្ពុជានេះ ហើយនៅក្នុងជើងហោះហើរនេះ ក៏មានអ្នកវិជ្ជមានកូវីដ១៩ ចំនួន ២នាក់ដែរ» ។
លោកជំទាវបានបញ្ជាក់ថា «អ៊ីចឹង បច្ចុប្បន្ននេះ ស្ត្រីរូបនេះ កំពុងស្ថិតនៅលើការតាមដានសុខភាពពីក្រុមគ្រូពេទ្យរបស់យើង ដោយយកចិត្តទុកដាក់បំផុត។ ថ្វីត្បិតតែលទ្ធផលតេស្តលើកទី១ របស់គាត់ អវិជ្ជមានវីរុសកូវីដ១៩ ក៏ប៉ុន្តែគាត់ស្ថិតនៅក្នុងកម្រិតពេល ដែលត្រូវតាមដានរយៈពេល ១៤ថ្ងៃ។ ដូច្នេះហើយ យើងទាំងអស់គ្នា ត្រូវតែមានការប្រុងប្រយ័ត្ន។ ដូច្នេះខ្ញុំសូមអំពាវនាវដល់បងប្អូនយើងទាំងអស់គ្នាថា សូមឲ្យបន្តយកចិត្តទុកដាក់ ហើយសូមកុំភ្លេចកិច្ចការពារខ្លួននូវការឆ្លងកូវីដ១៩ ហើយធ្វើដំណើរទៅកន្លែងណា ក៏ត្រូវប្រយ័ត្នប្រយែងមែនទែន ហើយកុំភ្លេចអនុវត្តនូវវិធានការការពារខ្លួន» ៕
ចែករំលែកព័តមាននេះ