ខេត្តសៀមរាប ៖ លោក ទៀ សីហា អភិបាលខេត្ត និងជាប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្ត បានធ្វើការព្រមានធ្ងន់ៗដល់ក្រុមហ៊ុនដឹកជញ្ជូននានា ដែលបើកបរលើដងផ្លូវមិនបានគោរពច្បាប់ចរាចរណ៍ មិនគោរពសមត្ថកិច្ចជាអ្នកអនុវត្តន៍ច្បាប់តាមដងផ្លូវ…
ខេត្តសៀមរាប ៖ លោក ទៀ សីហា អភិបាលខេត្ត និងជាប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្ត បានធ្វើការព្រមានធ្ងន់ៗដល់ក្រុមហ៊ុនដឹកជញ្ជូននានា ដែលបើកបរលើដងផ្លូវមិនបានគោរពច្បាប់ចរាចរណ៍ មិនគោរពសមត្ថកិច្ចជាអ្នកអនុវត្តន៍ច្បាប់តាមដងផ្លូវ លោកនឹងបញ្ជាឲ្យសមត្ថកិច្ចចាត់វិធានការម៉ឺងម៉ាត់តាមផ្លូវច្បាប់ ដោយគ្មានការលើកលែងនោះឡើយ ពិសេសអ្នកបើកបរមានសារធាតុញៀននៅក្នុងខ្លួន ។
ជាក់ស្តែង ដើម្បីធ្វើការត្រួតពិនិត្យទៅលើគ្រប់រថយន្តគ្រប់ប្រភេទដែលខុសបច្ចេកទេស និងពីអនុក្រិត្យណែនាំនោះ មន្ទីរសាធារណការ និងដឹកជញ្ជូនខេត្ត សហការជាមួយអាជ្ញាធរស្រុក កម្លាំងនគរបាលចរាចរណ៍ជើងគោក កងរាជ អាវុធហត្ថ តាមបណ្តាក្រុង ស្រុក កាលពីថ្ងៃទី១៦ ខែកក្កដា ឆ្នាំ២០២០នេះ ក្រោមការចង្អុលបង្ហាញរបស់រដ្ឋមន្ត្រីក្រសួងសាធារណការ និងដឹកជញ្ជូន និងការណែនាំរបស់ លោក ទៀ សីហា អភិបាលនៃគណៈអភិបាលខេត្ត ក្នុងសកម្មភាពចុះប្រតិបត្តិការត្រួតពិនិត្យរថយន្តដឹកទំនិញ ដឹកនាំដោយលោក ពិន ប្រាកដ អភិបាលរងនៃគណៈអភិបាលខេត្ត បានចុះធ្វើការត្រួតពិនិត្យនៅតាមបណ្តោយផ្លូវជាតិលេខ៦ ក្នុងភូមិសាស្ត្រស្រុក ប្រាសាទបាគង ខេត្តសៀមរាប ។
តាមការបញ្ជាក់របស់មន្ត្រីបច្ចេកទេស និង លោក ជួត ច័ន្ទតារា អនុប្រធានមន្ទីរសាធារណការ និង ដឹកជញ្ជូនខេត្ត បានឲ្យដេងថា នៅក្នុងឆមាសទី១ ឆ្នាំ២០២០ នេះ ក្នុងការត្រួតពិនិត្យបណ្តារថយន្តដែលបានធ្វើចរាចរណ៍ដឹកជញ្ជូនឆ្លងកាត់ភូមិសាស្ត្រខេត្តសៀមរាប កម្លាំងជំនាញបច្ចេកទេស បានធ្វើការពិនិត្យទៅលើគ្រប់រថយន្ត មានចំនួន១ពាន់៦១០គ្រឿង, រថយន្ត ខុសលក្ខណៈបច្ចេកទេស ១៦៨គ្រឿង ,មិនមានឯកសារគ្រប់គ្រាន់ ៨១គ្រឿង, ដឹកទំនិញខុសបច្ចេកទេស ០៤គ្រឿង និង គ្មានប័ណ្ណបើកបរ និង បើកបរខុសប្រភេទរថយន្ត៦គ្រឿង, ដំឡើងភ្លើងខុសបច្ចេកទេស ២គ្រឿង, មិនពាក់ខ្សែក្រវ៉ាត់៨គ្រឿង, បើកបរមានផ្ទុកសារធាតុញៀនចំនួន៦៥នាក់ផងដែរ ។
លទ្ធផលនៃការចុះត្រួតពិនិត្យយានយន្តដឹកជញ្ជូនធុនធំ និងធុនតូចនេះបានចំនួន១១២គ្រឿង រថយន្តធំ ៦៨គ្រឿង រថយន្តតូច ៤៤គ្រឿង កម្លាំងសមត្ថកិច្ចជំនាញរកឃើញ និង ធ្វើការពិន័យដោយមិនពាក់ខ្សែក្រវ៉ាត់ ចំនួន២គ្រឿង និង ធ្វើការអប់រំណែនាំ ដល់ម្ចាស់រថយន្តដឹកទំនិញសំពីងសំពោង ការបំពាក់ស្លាកលេខឲ្យបានត្រឹមត្រូវ ។ ក្នុងនោះក៏បានរកឃើញ អ្នកបើកបរធ្វើប័ណ្ណបើកបរក្លែង ក្លាយ និង គ្មានប័ណ្ណបើកបរ រួមទាំងបានធ្វើតេស្តទឹកនោម រកនូវសារធាតុញៀន តែអវិជ្ជមាន ព្រមទាំងបានធ្វើការអប់រំអ្នកបើកបរម៉ូតូមិនពាក់មួកសុវត្ថិភាព និង បានចែកជូននូវមួសសុវត្ថិភាព និង បកស្កុតខ្មៅបិទកញ្ចក់ចេញផងដែរ ។
តាមការបញ្ជាក់របស់ លោក ពិន ប្រាកដ អភិបាលរងខេត្ត ក៏បានឲ្យដឹងថា ក្នុងយុទ្ធនាការរឹតបន្តឹងច្បាប់ចរាចរណ៍ផ្លូវគោកនេះ ដោយបានធ្វើការត្រួតពិនិត្យទៅលើយានយន្តគ្រប់ប្រភេទ គឺដើម្បីរក្សាឲ្យបាននូវគុណភាពផ្លូវដឹកជញ្ជូន និង កាត់បន្ថយគ្រោះថ្នាក់ចរាចរណ៍ ដោយបច្ចុប្បន្នបណ្តាយានយន្តមួយចំនួន បានធ្វើការផ្ទុកនូវទំនិញខុសពីសៀវភៅបន្ទុករបស់ខ្លួន ព្រមទាំងតទ្រុងខុសបច្ចេកទេស ដែលអនុក្រិត្យបានកំណត់កន្លងមក ព្រមទាំងមានផ្ទុកសារធាតុញៀនទៀតផង ។
លោកបានបន្តថា ម្យ៉ាងទៀត ការផ្ទុកនូវទំនិញខុសពីសៀវភៅ បន្ទុក គឺបង្កឲ្យផ្លូវថ្នល់ ស្ពាន លូ រងនូវការខូចខាត ដោយការដឹកជញ្ជូនលើសទម្ងន់ និងបង្កឲ្យមានកើតនូវគ្រោះថ្នាក់ចរាចរណ៍ទៀតផង ។
ក្នុងនោះដែរ លោកអភិបាលរងខេត្តក៏បានធ្វើការណែនាំមួយចំនួនដល់ម្ចាស់ និង អ្នកបញ្ជាយានយន្តទាំងអស់ ត្រូវចេះធ្វើការត្រួតពិនិត្យឲ្យបានជាប្រចាំលើយានយន្តរបស់ខ្លួន មុនពេលចេញដំណើរ ព្រមទាំងត្រូវផ្ទុកទំនិញ ទៅតាមសៀវភៅបន្ទុកបានកំណត់ ដើម្បីចៀសវាងនូវប្រការអាក្រក់ណាមួយកើតឡើងដល់ខ្លួន និងអ្នកដទៃដែលធ្វើចរាចរណ៍តាមដងផ្លូវសាធារណៈជាសំខាន់ចៀសឲ្យឆ្ងាយពីគ្រឿងញៀន ។
ក្នុងនោះដែរ លោក ក៏បានធ្វើការក្រើនរំលឹកដល់មន្ត្រីជំនាញ និងកម្លាំងសមត្ថកិច្ចទាំងអស់ ត្រូវរួមសហការគ្នា ក្នុងការបង្ក្រាបលុបបំបាត់ការដឹកជញ្ជូនលើសទម្ងន់ ដែលធ្វើឲ្យខូចខាតដល់សម្បត្តិសាធារណៈ និងខាតបង់ថវិកា ជាតិ ព្រមទាំងត្រូវធ្វើការឃាត់ខ្លួនចំពោះជនណាដែលមិនគោរពអនុវត្តទៅតាមអនុក្រឹត្យដែលបានកំណត់យកមកធ្វើការផាកពិន័យទៅតាមច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ