រាជធានីភ្នំពេញ ៖ កម្លាំងនគរបាលខណ្ឌដង្កោ បានសហការជាមួយកម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃ ធ្វើការស្រាវជ្រាវនិងឃាត់ខ្លួនជនសង្ស័យដែលជាជនជាតិស្បែកខ្មៅនីហ្សេរីយ៉ា២នាក់ រួមជាមួយនឹងស្ត្រីខ្មែរសាច់សភ្លឹងម្នាក់ផងដែរ ។ ក្រោយពីជនទាំងនេះធ្វើសកម្មភាពឆបោកប្រាក់ពីបុរសជនជាតិខ្មែរម្នាក់ដោយប្រើល្បិចថា ពួកគេជាទាហានអាមេរិកនៅប្រទេសស៊ីរី រើសបានប្រអប់១ក្រោមដើមឈើ នៅក្នុងប្រអប់នោះមានប្រាក់ជាង៣លានដុល្លារ ហើយពួកខ្លួនចង់យកលុយនោះមកវិនិយោគនៅស្រុកខ្មែរ និងពឹងឲ្យជនរងគ្រោះធ្វើជាតំណាងអ្នកទទួលកាន់កាប់លុយទាំងអស់ នោះ ។
បន្ទាប់មកជនឆបោកនេះបានឲ្យជនរងគ្រោះផ្ញើលុយឱ្យខ្លួនដើម្បីរត់ការឯកសារនានា ប៉ុន្តែក្រោយពីទទួលបានលុយរត់ការជាង១ម៉ឺនដុល្លារទៅហើយ មិនឃើញផ្ញើលុយជាង៣លានដុល្លារនោះមកឲ្យសោះ ហើយគិតតែពីទាមទារឲ្យជនរងគ្រោះផ្ញើលុយឲ្យ១ម៉ឺនដុល្លារបន្ថែមទៀត ទើបបុរសរងគ្រោះមានការសង្ស័យ ក៏សម្រេចចិត្តប្ដឹងឲ្យនគរបាលជួយធ្វើការស្រាវជ្រាវរហូតឃាត់ខ្លួនបានតែម្ដង ។ ប្រតិបត្តិការឃាត់ខ្លួនជនសង្ស័យខាងលើនោះបានធ្វើឡើង តាំងពីវេលាព្រលប់រហូតដល់វេលាម៉ោង៩យប់ ថ្ងៃទី១៤ ខែកក្កដា ឆ្នាំ២០២០ នៅក្នុងភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ ។ ជនសង្ស័យដែលត្រូវនគរបាលឃាត់ខ្លួននោះរួមមាន ៖
១-ឈ្មោះ NDEKWE ANTHONY CHUKWUEBUKA ភេទប្រុស អាយុ២៧ឆ្នាំ ជនជាតិស្បែកខ្មៅនីហ្សេរីយ៉ា ។
២-ឈ្មោះ AMAOGANAYA MICHAEL CHUKWUDI ភេទប្រុស អាយុ២៩ឆ្នាំ ។ អ្នកទាំង២ស្នាក់នៅផ្ទះជួលលេខ០៩ ផ្លូវលេខ០៩ បុរីលឹមឈាងហាក់ ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ។
៣-ឈ្មោះ មិត្ត ស្រីនី ភេទស្រី អាយុ២៦ឆ្នាំ ជនជាតិខ្មែរ ស្នាក់នៅផ្ទះជួលលេខ១៦ ផ្លូវលេខ០៩ បុរីលឹមឈាងហាក់ ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ។
នគរបាលដកហូតយក កុំព្យួទ័រចំនួន៣គ្រឿង ម៉ូតូចំនួន៣គ្រឿង លិខិតឆ្លងដែនចំនួន៤ក្បាល ស៊ីមកាតគ្រប់ប្រព័ន្ធមួយចំនួនធំ ។ ដោយឡែកជនរងគ្រោះដែលចាញ់បោកព្រោះតែចង់កាន់កាប់ប្រាក់ជាង៣លានដុល្លារនៅក្នុងអំពើឆបោកនេះ ឈ្មោះ គុយ សាវឿន ភេទប្រុស អាយុ៤៦ឆ្នាំ ។
លោកវរសេនីយ៍ឯកជឹម ស៊ីថា អធិការខណ្ឌដង្កោ បានប្រាប់ឲ្យដឹងថា នេះគឺជាការ ទំនាក់ទំនងគ្នារវាងជនសង្ស័យនិងជនរងគ្រោះរហូតឈានដល់ការឆបោកគ្នានៅតាមបណ្ដាញសង្គមហ្វេសប៊ុក ។ លោកអធិការឱ្យដឹងថា កាលពីថ្ងៃទី៩ ខែមិថុនា ឆ្នាំ២០២០ វេលាម៉ោង៩និង៤៥នាទី មានគណនីហ្វេសប៊ុកមួយឈ្មោះ«Favour Grace Williams » ដែលមានដាក់រូបមនុស្សស្រីនៅលើProfileផង បានផ្ញើសារចូលមកគណនីហ្វេសប៊ុករបស់ជនរងគ្រោះឈ្មោះ « Kuy Savoeurn» ។ ពេលនោះម្ចាស់អាក់ខោនហ្វេសប៊ុកខាងលើបានសុំរាប់អានជាមួយបុរសខ្មែររូបនេះ ។ បន្ទាប់មកបុរសរងគ្រោះក៏បានផ្ញើសារតបត្រឡប់ទៅវិញភ្លាមៗ ដោយមិនបានគិតថាមានរឿងអ្វីកើតឡើងឡើយ ។ ម្យ៉ាងគិតថា គ្រាន់តែជាការសុំរាប់អានគ្នាប៉ុណ្ណោះគ្មានអ្វីខុសទាស់នោះទេ ។
លោកអធិការបានបន្តថា បន្ទាប់មកគណនេយ្យហ្វេសប៊ុកឈ្មោះ Favour Grace Williams នេះបានផ្ញើសារអំពីព័ត៌មានផ្សេងៗផ្ទាល់ខ្លួនប្រាប់ជនរងគ្រោះ និងថែមទាំងបានផ្ញើលិខិតឆ្លងដែន១ច្បាប់ ដែលមានឈ្មោះ HELEN GRACE WILLIAMS ជាជនជាតិអាមេរិក មុខរបរធ្វើការជាគិលានុបដ្ឋាយិការយោធា បម្រើការងារនៅជុំរំយោធា ក្នុងទីក្រុងដាម៉ាស់ ប្រទេសស៊ីរីថែមទៀតផង ។ ក្រោយមកទៀតហ្វេសប៊ុកដដែល បានផ្ញើសារប្រាប់បុរសរងគ្រោះថា ខ្លួនរើសបានប្រអប់មួយនៅក្រោមដើមឈើ ដែលនៅក្នុងប្រអប់នោះមានទឹកប្រាក់យ៉ាងច្រើនទៅដល់៣,៥លានដុល្លារអាមេរិកឯណោះ ហើយខ្លួនចង់យកលុយទាំងនោះមកវិនិយោគនៅក្នុងប្រទេសកម្ពុជា ហើយចង់ឲ្យជនរងគ្រោះទៅទទួលយកលុយនោះនៅឯក្រុមហ៊ុនអាកាសចរណ៍ដើម្បីកាន់កាប់ជំនួស ប៉ុន្តែត្រូវផ្ញើអាស័យដ្ឋានទៅរូបគេសិន ។ ជនរងគ្រោះជឿជាក់ក៏បានផ្ញើអាស័យដ្ឋានរបស់ខ្លួនទៅជននោះ ។
លោក ជឹម ស៊ីថា បានបញ្ជាក់បន្ថែមពីការប្រើល្បិចទៀតថា ក្រោយមកទៀត គណនីហ្វេសប៊ុកមួយនោះក៏បានផ្ញើកញ្ចប់អីវ៉ាន់ និងវិក្កយបត្រផ្ញើអីវ៉ាន់តាមក្រុមហ៊ុនដឹកជញ្ជូនមួយមកឲ្យជនរងគ្រោះបានឃើញមុន ។ លុះថ្ងៃទី១១ ខែកក្កដា ឆ្នាំ២០២០ វេលាម៉ោងប្រហែល៨ព្រឹក ខណៈបុរសរងគ្រោះ កំពុងតែស្ថិតនៅឯខេត្តកំពត ស្រាប់តែមានជនមិនស្គាល់អត្តសញ្ញាណ ជាបុរសម្នាក់បានប្រើទូរស័ព្ទលេខ 093 219 961 តេរកគាត់ដោយប្រាប់ថា គឺជាបុគ្គលិកក្រុមហ៊ុនដឹកជញ្ជូនហើយបានប្រាប់ថា អីវាន់របស់បងឯងបានមកដល់ហើយសូមបងចាំទទួលឥវាន់រួចក៏បិទទូរស័ព្ទ ។ លុះមួយសន្ទុះទៀតជនដដែលនោះ ក៏បានប្រើលេខទូរស័ព្ទលេខដដែល ខលរកបុរសរងគ្រោះម្តងទៀត ហើយប្រាប់ថា អីវាន់ដែលផ្ញើមកនោះ ត្រូវបង់ពន្ធចំនួន៧៥០ដុល្លារអាមេរិក និងតម្រូវឲ្យជនរងគ្រោះផ្ញើលុយទៅឲ្យខ្លួនដើម្បីបង់ពន្ធ ។ ភ្លាមៗនោះជនរងគ្រោះក៏បានផ្ញើលុយចំនួន៧៥០ដុល្លារអាមេរិកទៅតាមការបង្គាប់តាមរយៈវីងនៅខេត្តកំពត ។
ប្រភពខាងលើបានបន្តថា បន្ទាប់ពីផ្ញើប្រាក់រួចហើយក៏មិនទាន់គ្រប់គ្រាន់ទៀត ក្រោយៗមកមនុស្សដដែលនិងលេខទូរស័ព្ទដដែលនោះនៅតែទាមទារឲ្យផ្ញើប្រាក់ជាបន្តបន្ទាប់ ដោយលើកយកនូវហេតុផលផ្សេងៗ ប្រាប់ដល់បុរសរងគ្រោះ ហើយផ្ញើចុះផ្ញើឡើងអស់លុយសរុបចំនួន១០,៧៥០ដុល្លារ (១ម៉ឺន៧រយហាសិបដុល្លារអាមេរិក) ប៉ុន្តែជនរងគ្រោះពុំបានទទួលឬឃើញស្រមោលប្រអប់ដែលថាមានលុយ៣,៥លានដុល្លារ យកមកវិនិយោគអ្វីសោះ ។ រហូតមកដល់ថ្ងៃទី១៤ ខែកក្កដា ឆ្នាំ២០២០ ស្រាប់តែមានមនុស្សស្រីមិនស្គាល់អត្តសញ្ញាណម្នាក់បានទូរស័ព្ទប្រាប់ឲ្យជនរងគ្រោះផ្ញើប្រាក់បន្ថែមចំនួន១០.០០០ដុល្លារ(មួយម៉ឺនដុល្លារអាមេរិក)ទៀតដើម្បីបំពេញឯកសារផ្សេងៗទៀត ។ ដោយមានការសង្ស័យបុរសរងគ្រោះមិនបានផ្ញើឲ្យនោះទេ គឺបានសម្រេចចិត្តប្ដឹងសុំឲ្យកម្លាំងនគរបានខណ្ឌដង្កោជួយអន្តរាគមន៍ ។
ក្រោយពេលទទួលបានបណ្ដឹងលោកអធិការ ជឹម ស៊ីថា បានដឹកនាំកម្លាំងសហការជាមួយកម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃ ចុះធ្វើការស្រាវជ្រាវរហូតឃាត់ខ្លួនជនសង្ស័យបានទាំង៣នាក់ ក្នុងនោះមានបុរសជនជាតិនីហ្សេរីយ៉ា២នាក់និងស្ត្រីជាជនជាតិខ្មែរ ម្នាក់ដោយបានដកហូតវត្ថុតាងខាងលើហើយនាំយកទៅកាន់អធិការដ្ឋាននគរបាលខណ្ឌដង្កោដើម្បីសាកសួរនិងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់ ។
គេបានគិតថា ការឆបោកបែបនេះអាចកើតឡើងតែនៅលើអ្នកចង់បានអ្វីក្រៅពីទ្រព្យ សម្បត្តិដែលខ្លួនមាន ព្រោះមិនមែនសុខៗគេផ្ញើលុយឱ្យកាន់កាប់រាប់លានដុល្លារនោះទេ ៕
ចែករំលែកព័តមាននេះ