ខេត្តប៉ៃលិន ៖ ព្រៃភ្នំនៅតំបន់អូរតាផៃ ដែលមានចម្ងាយពីក្រុងប៉ៃលិន ប្រមាណ២០គីឡូម៉ែត្រ ស្ថិតនៅភាគខាងត្បូង ក្នុងភូមិបហ៊ុយត្បូង សង្កាត់បយ៉ាខា ក្រុងប៉ៃលិន មានសម្រស់ខៀវស្រងាត់ គួរឱ្យចង់គយគន់ ។ លើសពីនេះទៅទៀត មានទឹកអូរហូរ រឹមៗនៅលើថ្មដា គួរឱ្យចង់ងូតលេងកម្សាន្ត ។
បើតាមអ្នករស់នៅតំបន់នោះ កាលពីពេល ថ្មីៗនេះឱ្យដឹង បើគេបើកបររថយន្ត ឬម៉ូតូចេញពីទីរួមខេត្តប៉ៃលិន ឆ្ពោះទៅទិសខាងត្បូង ចម្ងាយប្រហែល២០គីឡូម៉ែត្រ ហើយសម្លឹងទៅខាងស្តាំដៃ នឹងឃើញព្រៃភ្នំតំបន់អូរតាផៃ ខៀវស្រងាត់គួរឱ្យចង់គយគន់មិនជិនណាយ ។ បើសិនជាអ្នកទេសចរជាតិ និងអន្តរជាតិអង្គុយនៅក្រោមដើមឈើធំមួយដើមនៅក្បែរមាត់អូរ នឹងឮសំឡេងរៃកណ្តឹង និងរៃមាសយំឆ្លើយឆ្លងគ្នា លាយឡំជាមួយនឹងសំឡេងបក្សីច្រើនប្រភេទស្រែករំពងយ៉ាងពីរោះរណ្តំ ។
ចំណែកទឹកជ្រោះដែលហូរធ្លាក់មកពីលើភ្នំខៀវ ខួបប្រាំង ខួបវស្សា មិនចេះរីងស្ងួតនោះ បើសិនជាអ្នកធ្វើដំណើរនឿយហត់បន្តិច ដោយសារកំដៅព្រះអាទិត្យ អាចនាំគ្នាឈប់មួយស្របក់ចុះងូតទឹកត្រជាក់ដូចទឹកអម្រឹតធ្លាក់មកពីស្ថានសួគ៌ា ញ៉ាំងឱ្យអារម្មណ៍ស្រស់ស្រាយមិនខាន ។
អ្នកភូមិនិយាយថា បើសិនអាជ្ញាធរខេត្ត ឬមន្ទីរទេសចរណ៍ខេត្តកសាងផ្លូវឱ្យល្អ និងកែច្នៃតំបន់នោះឱ្យក្លាយទៅជាតំបន់ទេសចរណ៍ នឹងមានអ្នកទេសចរជាតិ និងអន្តរជាតិច្រើនទៅកម្សាន្តមិនខានឡើយ ។
នៅហួសតំបន់អូរនោះបន្តិច មានកន្លែងកម្មកររុករកត្បូងជាលក្ខណៈគ្រួសារដ៏គួរឱ្យកត់សម្គាល់ គឺពួកគេរកតាមមាត់អូរ និងតាមដងអូររហូតដល់តំបន់ទុរេន២ដើម និងតំបន់ចិនយំ ហើយក៏មានក្រុមហ៊ុនមួយកំពុងតែរុករកត្បូងនៅទីនោះដែរ ៕
ចែករំលែកព័តមាននេះ