ញូដេលី ៖ កាលពីថ្ងៃចន្ទប្រទេសឥណ្ឌា បានរាយការណ៍ពីកំណត់ត្រាថ្មីមួយទៀត នៃអ្នកឆ្លងមេរោគកូវីដ-១៩ ដោយក្នុង១ថ្ងៃ រកឃើញឆ្លងថ្មីចំនួន ២៨.៧០១ករណី ធ្វើឲ្យចំនួនសរុបកើនឡើងដល់ជាង ៨៧៨.០០០ ករណីហើយនេះបើយោងតាមទិន្នន័យរបស់សាកលវិទ្យាល័យ Johns Hopkins ។
អាជ្ញាធរមូលដ្ឋាន នៅក្នុងទីក្រុងជាច្រើន កំពុងរៀបចំឡើងវិញ នូវការបិទទ្វារយ៉ាងតឹងរ៉ឹង បន្ទាប់ពីការគ្រោងបើក ដើម្បីស្តារសេដ្ឋកិច្ចឡើងវិញ ។
ក្រសួងសុខាភិបាលឥណ្ឌាក៏បានរាយការណ៍ថា មានមនុស្សស្លាប់ ៥០០នាក់បន្ថែមទៀតក្នុងរយៈពេល២៤ម៉ោងចុងក្រោយនេះ ដែលធ្វើឱ្យចំនួនអ្នកស្លាប់សរុបកើនដល់ ២៣.១៧៤ នាក់ ។
ទីក្រុងធំៗ ដូចជាញូដេលី, មុមបៃ, ឆេនណៃ, បាងហ្គាឡូ និងផេន ស្ថិតក្នុងចំណោមទីក្រុងដែលបានឃើញអ្នកឆ្លងវីរុសនេះកើនឡើងច្រើន ។ រដ្ឋជាច្រើន បានណែនាំ និងរក្សាបម្រាមគោចរ នាចុងសប្តាហ៍ និងបានប្រកាសបិទនៅក្នុងតំបន់ដែលមានហានិភ័យខ្ពស់ ដើម្បីកាត់បន្ថយការចម្លងដល់ប្រជាជនឥណ្ឌា ។
ប្រទេសឥណ្ឌា មានចំនួនអ្នកឆ្លងជំងឺ COVID-19 ខ្ពស់ជាងគេលំដាប់ទី៣ នៅលើពិភពលោក បន្ទាប់ពីសហរដ្ឋអាមេរិក និងប្រេស៊ីលលំដាប់លេខ២ ៕
ចែករំលែកព័តមាននេះ