ខេត្តបាត់ដំបង៖ បុរសម្នាក់ត្រូវកម្លាំងសមត្ថកិច្ចឃាត់ខ្លួនភ្លាមៗ ក្រោយពីវាយសម្លាប់គូសត្រូវរបស់ខ្លួនយ៉ាងឃោរឃៅ កាលពីវេលាម៉ោង៤នៅរសៀលថ្ងៃទី១៣ កក្កដា នៅភូមិអូរទំនប់ សង្កាត់ក្ដុលដូនទាវ ក្រុងបាត់ដំបង។ អធិការក្រុងបាត់ដំបង លោក…
ខេត្តបាត់ដំបង៖ បុរសម្នាក់ត្រូវកម្លាំងសមត្ថកិច្ចឃាត់ខ្លួនភ្លាមៗ ក្រោយពីវាយសម្លាប់គូសត្រូវរបស់ខ្លួនយ៉ាងឃោរឃៅ កាលពីវេលាម៉ោង៤នៅរសៀលថ្ងៃទី១៣ កក្កដា នៅភូមិអូរទំនប់ សង្កាត់ក្ដុលដូនទាវ ក្រុងបាត់ដំបង។
អធិការក្រុងបាត់ដំបង លោក ឆាង វណ្ណឆៃ បានឱ្យដឹងថា ជនសង្ស័យ ឈ្មោះ ហៀប យាន ភេទប្រុស អាយុ៤៧ឆ្នាំ ។ រីឯជនរងគ្រោះ ឈ្មោះ អុឹង ងួនហាន ភេទប្រុស អាយុ៤១ឆ្នាំ។ ភាគីទាំង២រស់នៅក្នុងភូមិ.សង្កាត់ខាងលើ។ លោកអធិការបានប្រាប់ថា ជនដៃដល់បានប្រើដំបងប្រវែងជាងកន្លះម៉ែត្រ វាយសំពងក្បាលជនរងគ្រោះរហូតស្លាប់នៅនឹងកន្លែង ដែលផ្ដើមចេញពីការប៉ះទង្កិចពាក្យសំដីគ្នាមួយប្រាវ មុនពេលឈានដល់ការសម្លាប់ តែជនដៃដល់ក៏ត្រូវមន្ត្រីប៉ុស្ដិ៍រដ្ឋបាលឃាត់ខ្លួនភ្លាមៗដែរ។
បើតាមសាក្សីបានរាយការណ៍ប្រាប់សមត្ថកិច្ចថា ដំបូងជនទាំង២នាក់ បានប្រកែកគ្នាយ៉ាងតឹងតែង ហើយក្រោយមកស្រាប់តែជនរងគ្រោះបានទាញចំពាមកៅស៊ូបាញ់ក្បាលជនដៃដល់ ហើយក៏ផ្ទុះជម្លោះជាថ្មីកាន់តែខ្លាំង។
សមត្ថកិច្ចបានស្រង់សំដីសាក្សីទៀតថា ក្រោយផ្ទុះកំហឹងជាថ្មី គេឃើញជនដៃដល់បានដើរទៅផឹកស្រា ជាមួយនឹងការបោះពាក្យសំដីថា«ចាំមើលអញផឹកស្រវឹង.. អញវាយអ្ហែងឱ្យងាប់»។
លុះបន្តិចក្រោយមក ជនដៃដល់បានដើរទៅទាញដំបងស្ទុះទៅវាយសំពងក្បាលជន
រងគ្រោះបែកឈាមរហូតដល់ស្លាប់នៅនឹងកន្លែង តែត្រូវបានអ្នកភូមិរាយការណ៍ប្រាប់សមត្ថកិច្ចឱ្យចុះទៅឃាត់ខ្លូនជនដៃដល់ភ្លាមៗដែរ ។
លោកឆាង វណ្ណឆៃ បានប្រាប់ថា នៅពេលឃាត់ខ្លួនទៅសួរនាំ ជនដៃដល់បានសារភាពថា ខ្លួនពិតជាបានវាយសម្លាប់ជនរងគ្រោះនោះមែន ដោយសារខឹងជនរងគ្រោះលបបាញ់ក្បាលខ្លួន។ លោកអធិការបានបញ្ជាក់ថា ពេលនេះ មន្ត្រីជំនាញកំពុងសួរចម្លើយជនដៃដល់ ដើម្បីកសាងសំណុំរឿងបញ្ជូនទៅតុលាការហើយ៕
ចែករំលែកព័តមាននេះ