អង់គ្លេស ៖ តាមប្រភពព័ត៌មាន CNN បានឱ្យដឹងថា រដ្ឋាភិបាលចក្រភពអង់គ្លេសបានប្រកាសនៅថ្ងៃអង្គារ៍នេះថា ការតម្រូវឱ្យពាក់ម៉ាសនៅក្នុងហាង និងផ្សារទំនើប នៅប្រទេសអង់គ្លេស នឹងត្រូវចាប់ផ្តើមពីថ្ងៃទី២៤ ខែកក្កដា ខាងមុខនេះ។
រដ្ឋមន្ត្រីសុខាភិបាលអង់គ្លេស លោក Matt Hancock ត្រូវបានគេរំពឹងថា នឹងបញ្ជាក់ពីគោលការណ៍ណែនាំថ្មីរបស់រដ្ឋាភិបាល នេះបើយោងតាមសេចក្តីថ្លែងការណ៍របស់ Downing Street ។
សេចក្តីណែនាំនេះបានបន្ថែមថា៖ «ការណែនាំសម្រាប់ការកំណត់ផ្សេងទៀត នឹងត្រូវបានត្រួតពិនិត្យ»។
អ្នកនាំពាក្យ Downing Street បាននិយាយថា៖ «មានភ័ស្តុតាងកាន់តែច្រើនឡើងៗ ដែលថាការពាក់ម៉ាសក្នុងទីធ្លាបិទជិត អាចជួយការពារបុគ្គល និងអ្នកដែលនៅជុំវិញពួកគេ ពីការឆ្លងជំងឺកូវីដ១៩»។
លោកនាយករដ្ឋមន្ត្រីបានបញ្ជាក់យ៉ាងច្បាស់ថា ប្រជាជនគួរតែពាក់ម៉ាសនៅតាមហាងនានា ហើយគេនឹងធ្វើវាជាចាំបាច់ ចាប់ពីថ្ងៃទី២៤ ខែកក្កដា។
គួរបញ្ជាក់ផងដែរថា បច្ចុប្បន្ននេះ ស្កុតឡេន អាឡឺម៉ង់ អេស្បាញ អ៊ីតាលី និងក្រិក បានធ្វើឱ្យការពាក់ម៉ាសទៅជាការតម្រូវជាចាំបាច់ ពេលចេញទៅដើរផ្សារ៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ