ខេត្តកំពង់ឆ្នាំង ៖ គោចំនួន៨ក្បាលមានឈ្មោលមានញី ក្នុងចំណោមគោមួយហ្វូងធំ
បានងាប់រដូករណែលនៅនឹងកន្លែង ដោយសារត្រូវគោយន្តកែច្នៃមួយគ្រឿងបុករះពេញ ទំហឹង ។
ហេតុការណ៍នេះ កើតឡើងកាលពីវេលាម៉ោងប្រមាណ៨និង២០នាទីព្រឹកថ្ងៃទី១៣ ខែ កក្កដា ឆ្នាំ២០២០ នៅលើផ្លូវជាតិលេខ៥១C តភ្ជាប់ពីខេត្តកំពង់ឆ្នាំងទៅខេត្ត កំពង់ ធំ ត្រង់ចំណុចអូរធំ ស្ថិតក្នុងភូមិកង្កែប ឃុំច្រណូក ស្រុកកំពង់លែង ។ នេះជាគ្រោះថ្នាក់ចរាចរណ៍មួយ ដែលយានយន្តច្នៃបុករះហ្វូងសត្វពាហនៈឱ្យងាប់រដូក រណែល ពេញផ្លូវនិងខ្លះធ្លាក់ក្នុងប្រឡាយ ។
អធិការនគរបាលស្រុកកំពង់លែង វរសេនីយ៍ឯក ប៉ាល់ ជឿន បានឲ្យដឹងតាមទូរស័ព្ទថា ពិតជាកើតមានឧបទ្ទវហេតុបែបនេះមែន ។ មុនពេលកើតហេតុ មានគោយន្ដកែច្នៃ១គ្រឿង គ្មានផ្លាកលេខ បើកបរក្នុងទិសដៅពីខេត្តកំពង់ធំ មកស្រុកកំពង់លែង ខេត្តកំពង់ ឆ្នាំង ។
លុះពេលមកដល់ចំណុចខាងលើ អ្នកបើកបរគោយន្តកែច្នៃបានគេចជង្ហុក ក៏ជ្រុលទៅបុកហ្វូងគោខណៈដែលម្ចាស់កំពុងដេញទៅវាលស្រែដើម្បីឲ្យស៊ីស្មៅ ។ ដោយ សារល្បឿនគោយន្តនិងការបុកពេញទំហឹងផង បណ្តាលឱ្យគោ៨ក្បាលងាប់នៅនឹងកន្លែង ។
លោកអធិការឲ្យដឹងទៀតថា ក្រោយពេលកើតហេតុ អ្នកបើកបរគោយន្តកែច្នៃបានរត់
គេចខ្លួនបាត់ ដោយទុកគោយន្តចោលនៅកន្លែងកើតហេតុ ។ ក្នុងហេតុការណ៍គ្រោះ ថ្នាក់នេះ បណ្តាលឲ្យយានយន្ដកែច្នៃខូចខាតតិចតួច ឯគោ៨ក្បាលដែលងាប់នេះមានញី៥ក្បាល និងឈ្មោល៣ក្បាល ។
តាមព័ត៌មានឲ្យដឹងដែរ នៅលើកំណាត់ផ្លូវដែលគោយន្តច្នៃបុកគោងាប់រដូករណែល
នេះ អ្នកបើកបរយានយន្តទាំងឡាយត្រូវតែប្រុងប្រយ័ត្នមិនអាចបើកបរលឿនបានទេ ពិសេសនៅវេលាម៉ោង៨ព្រឹក និងម៉ោង៤រសៀលតែងតែមានសត្វពាហនៈទាំងហ្វូងឆ្លងកាត់ ៕
ចែករំលែកព័តមាននេះ