បុរសក្រីក្រពិការជើងទាំងសងខាងពីកំណើតម្នាក់បានទទួលផ្ទះមួយខ្នង
- ត្បូងឃ្មុំ
ខេត្តត្បូងឃ្មុំ ៖ កាលពីព្រឹកថ្ងៃទី១២ កក្កដា ២០២០ លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជននិងយុវនីតិសម្បទា…
ខេត្តត្បូងឃ្មុំ ៖ កាលពីព្រឹកថ្ងៃទី១២ កក្កដា ២០២០ លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជននិងយុវនីតិសម្បទា និងលោកជំទាវ បានអញ្ជើញជាអធិបតីក្នុងពិធីប្រគល់ផ្ទះមួយខ្នងធ្វើអំពីថ្មដំបូលប្រក់ស័ង្កសីមានទំហំ៥ម៉ែត្រគុណនឹង៦ម៉ែត្រជូនបុរសពិការជើងទាំងសងខាងពីកំណើតឈ្មោះថែ ម៉ុង អាយុ៥៨ឆ្នាំ រស់នៅភូមិដឹកពរ ឃុំកណ្ដោលជ្រុំ ស្រុកពញាក្រែក ។ ក្នុងឱកាសនោះដែរ ក៏មានការអញ្ជើញចូលរួមពីសំណាក់លោក ស៊ាក ឡេង ប្រធានក្រុមប្រឹក្សាខេត្ត លោក ជាម ច័ន្ទសោភ័ណ អភិបាលនៃគណៈអភិ បាលខេត្តត្បូងឃ្មុំ និងសហការី នាយកមូលនិធិជនពិការផងដែរ ។
លោក ជួរ រតនៈ នាយកមូលនិធិជនពិការបានបញ្ជាក់ថា ផ្ទះមួយខ្នងនេះចំណាយអស់ថវិកាជាង១៦លានរៀល ដែលជាថវិកាបានមកពីអំណោយសប្បុរសធម៌របស់សប្បុរសជនដែលបានបរិច្ចាគ ចូលហិបប្រាក់វិភាគទានសប្បុរសធម៌មូលនិធិជនពិការ ដែលហិបនេះបានដាក់នៅតាមវត្ដអារាម កន្លែងទេសចរណ៍ ក្រុមហ៊ុន រោងចក្រ ធនាគារ សណ្ឋាគារ។ល។
លោកនាយកមូលនិធិជនពិការបន្តថា ចំពោះការផ្ដល់ជូនផ្ទះថ្មីមួយខ្នងជូនជនពិការខាងលើនេះ គឺធ្វើឡើងបន្ទាប់ពីមានការពិនិត្យ និងវាយតម្លៃរបស់គណៈកម្មការត្រួត ពិនិត្យនិងវាយតម្លៃការសាងសង់ផ្ទះ ជូនជនពិការក្រីក្រ នៅតាមសហគមន៍របស់មូលនិធិជនពិការ ដែលក្នុងនោះគណៈកម្មការបានចុះត្រួតពិនិត្យ និងវាយតម្លៃផ្ទាល់ ដោយមានការស្នើសុំពីសាខាមូលនិធិជនពិការខេត្ត ព្រមទាំងមានការបញ្ជាក់ពីអាជ្ញាធរមូលដ្ឋាននិងប្រជាពលរដ្ឋជិតខាង គឺពិតជាជនពិការក្រីក្ររស់នៅក្នុងផ្ទះខ្ទមចាស់ទ្រុឌទ្រោម និងមានចំណូលតិចតួចដើម្បីចិញ្ចឹមជីវិត។
ឱកាសនោះដែរ ឯលោករដ្ឋមន្ត្រី វង សូត រដ្ឋមន្ត្រីក្រសួងសង្គមកិច្ចអតីតយុទ្ធជន និងយុវនីតិសម្បទា បានសម្តែងនូវការអបអរសាទរចំពោះការខិតខំប្រឹងប្រែងរបស់មូលនិធិជនពិការ ដែលបានព្យាយាមស្វែងរកថវិកាពីសប្បុរសជននានា យកមកសាងសង់ផ្ទះជូនជនពិការនៅថ្ងៃនេះ។
លោករដ្ឋមន្ត្រី វង សូត បានបន្តថា តាមរយៈមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត បាននិងកំពុងបើកផ្តល់ប្រាក់របបគោលនយោបាយប្រចាំខែ សម្រាប់ជនពិការជាអតីតយុទ្ធជនចំនួន១.១៩២នាក់ និងបានផ្តល់ជាប្រាក់របបគោលនយោបាយសម្រាប់ជនពិការក្រីក្រ តាមសហគមន៍បានចំនួន២០០៩នាក់ ឆ្នាំ២០១៩កន្លងមក។
លោករដ្ឋមន្ត្រីក្រសួងសង្គមកិច្ច បានបន្តថា ថ្មីៗនេះ រាជរដ្ឋាភិបាលបានចេញនូវអនុក្រឹត្យ ស្តីពីការអនុវត្តកម្មវិធីឧបត្ថម្ភសាច់ប្រាក់ ជូនគ្រួសារក្រីក្រនិងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ១៩ ដែលក្នុងនោះបានឧបត្ថម្ភដល់គ្រួសារក្រីក្រ និងងាយរងគ្រោះដែលមានកុមារអាយុចាប់ពី០ទៅ៥ឆ្នាំ មនុស្សចាស់ចាប់ពីអាយុ៦០ឆ្នាំឡើងទៅ សមាជិកគ្រួសារដែលមានជំងឺអេដស៍ និងជាពិសេសជនពិការ ដែលងាយរងគ្រោះទាំងអស់ នឹងទទួលបានការឧបត្ថម្ភបន្ថែម ទៅក្នុងគ្រួសារក្រីក្រ ដែលមានប័ណ្ណសមធម៌ ជាគោលការណ៍ទទួលបាន១២ម៉ឹនរៀលក្នុង១ខែ សម្រាប់នៅទីប្រជុំជននិងរាជធានីភ្នំពេញ ទទួលបាន៨ម៉ឺនរៀលក្នុងខែ សម្រាប់នៅជនបទ។
ម្យ៉ាងវិញទៀត រយៈពេល២សប្តាហ៍កន្លងមក ក្រោយពីប្រកាសដាក់ឱ្យអនុវត្តកម្មវិធីឧបត្ថម្ភសាច់ប្រាក់នេះ រាជរដ្ឋាភិបាលបានសម្រេចបានជាង៩០%ហើយ ដោយមានប្រជាជនក្រីក្រ និងងាយរងគ្រោះប្រមាណជាង២លាននាក់ ស្មើនឹង៥០ម៉ឺន គ្រួសារបានទៅទទួលថវិកាពីរាជរដ្ឋាភិបាលកម្ពុជារួចមកហើយ នេះគឺជាការយកចិត្តទុកដាក់ របស់ប្រមុខរាជរដ្ឋាភិបាលកម្ពុជា៕ (កែសម្រួលដោយ ៖ ធីតា)
ចែករំលែកព័តមាននេះ