រាជធានីភ្នំពេញ ៖ នៅពេលនិយាយដល់អាជីវកម្ម មនុស្សមួយចំនួនបានលើកឡើងថា «ខ្ញុំក្រ ពុំមានដើមទុនចាប់ផ្តើមអាជីវកម្ម» នោះទេ ក៏ប៉ុន្តែមនុស្សមួយចំនួនបានមើលរំលងនូវដើមទុន ៣ ដែលមានជាប់នៅនឹងខ្លួន…
រាជធានីភ្នំពេញ ៖ នៅពេលនិយាយដល់អាជីវកម្ម មនុស្សមួយចំនួនបានលើកឡើងថា «ខ្ញុំក្រ ពុំមានដើមទុនចាប់ផ្តើមអាជីវកម្ម» នោះទេ ក៏ប៉ុន្តែមនុស្សមួយចំនួនបានមើលរំលងនូវដើមទុន ៣ ដែលមានជាប់នៅនឹងខ្លួន ។ «គ្មានប្រាក់ចាប់ផ្តើមអាជីវកម្មមិនមែនមានន័យថា គ្មានដើមទុននោះទេ» ។ នេះជាការលើកឡើងរបស់លោក ង៉ែត ជូ ទីប្រឹក្សាសេដ្ឋកិច្ចមួយរូបនៅកម្ពុជា ។
លោក ង៉ែត ជូ បានពន្យល់ថា មនុស្សគ្រប់រូបត្រូវដឹងថា ដើមទុនមាន៣ប្រភេទ គឺ៖ ១ – ដើមទុនផ្នែកហិរញ្ញវត្ថុ ឬសេដ្ឋកិច្ច (Economic or Financial Capital) ៖ រួមមានដូចជាសាច់ប្រាក់ អចលនទ្រព្យ និងទ្រព្យសម្បត្តិដទៃទៀត ។ ២- ដើមទុនជាធនធានមនុស្ស (Human Capital)៖ រូបអ្នកក៏ជាដើមទុនដែរ អ្នកអាចយកចំណេះ-ជំនាញទៅបំរើការអោយអ្នកដទៃ ដោយប្តូរយកជាប្រាក់ខែ ហើយសន្សំដើម្បីធ្វើជាដើមទុនចាប់ផ្តើមអាជីវកម្ម ។ ហើយបើខ្វះខ្ចីអ្នកដទៃដូចជា ក្រុមគ្រួសារ ឬមិត្តភក្តិខ្លះទៅ ។ ៣- ដើមទុនសង្គម (Social Capital)៖ ក្រុមគ្រួសារ មិត្តភក្តិ និងមនុស្សដែលអ្នករាប់អានក៏ជាដើមទុនដែរ ។ ឧទាហរណ៍ ក្រុមគ្រួសារផ្គត់ផ្គង់អោយអ្នកបានរៀនសូត្រ ដើម្បីសន្សំចំណេះ-ជំនាញ រួចក្លាយខ្លួនជាធនធានមនុស្សក្នុងសង្គម នោះហើយគឺជាដើមទុន ។
លោក ង៉ែត ជូ ដែលជាអ្នកជំនាញអចលទ្រព្យមួយរូបដែរនោះបានមានប្រសាសន៍ថា «ដូច្នេះពេលគ្មានប្រាក់ចាប់ផ្តើមអាជីវកម្មកុំនិយាយថា ខ្លួនបាតដៃទទេ ។ អ្នកមានដើមទុនទី៣ (ដើមទុនសង្គម) ដើម្បីឈានទៅកសាងដើមទុនទី២ (ដើមទុនជាធនធានមនុស្ស) និងសន្សំជាដើមទុនទី១ (ដើមទុនផ្នែកហិរញ្ញវត្ថុ)។
អ្នកមិនមែនបាតដៃទទេទេ គ្រាន់តែអ្នកត្រូវការការព្យាយាម ការខិតខំ និងប្រើពេលវេលាអោយមានតម្លៃប៉ុណ្ណោះ» ៕
ចែករំលែកព័តមាននេះ