តូក្យូ រកឃើញករណីថ្មីជាង២០០ ក្នុងមួយថ្ងៃៗ រយៈពេល៤ថ្ងៃជាប់ៗគ្នាហើយ
ជប៉ុន ៖ តាមប្រភពព័ត៌មាន Bangkok Post បានឱ្យដឹងថា មន្ត្រីមួយរូបរបស់ជប៉ុនបាននិយាយថា ទីក្រុងតូក្យូ បានរាយការណ៍ពីការឆ្លងជំងឺកូវីដ១៩ថ្មី ចំនួន…
ជប៉ុន ៖ តាមប្រភពព័ត៌មាន Bangkok Post បានឱ្យដឹងថា មន្ត្រីមួយរូបរបស់ជប៉ុនបាននិយាយថា ទីក្រុងតូក្យូ បានរាយការណ៍ពីការឆ្លងជំងឺកូវីដ១៩ថ្មី ចំនួន ២០៦ករណី កាលពីថ្ងៃអាទិត្យ ដែលជាថ្ងៃទី៤ហើយ ដែលមានករណីឆ្លងថ្មីជាង២០០ក្នុងមួយថ្ងៃៗ។
តួលេខតែមួយថ្ងៃដូចគ្នានឹងថ្ងៃសៅរ៍ ត្រូវបានគេរាយការណ៍ថា ចំពេលមានការព្រួយបារម្ភកាន់តែខ្លាំងឡើងក្នុងចំណោមសាធារណជនក៏ដូចជា អាជ្ញាធរ អំពីរលកនៃការឆ្លងមេរោគលើកទី២ ដ៏មានសក្តានុពល នៅក្នុងរដ្ឋធានីដែលមានប្រជាជនប្រហែល ១៤លាននាក់។
ចំនួនសរុបនៃករណីឆ្លងនៅទីក្រុងតូក្យូ បានកើនឡើងដល់ ៧,៩២៧ ដែលស្មើនឹងប្រមាណមួយភាគបី នៃករណីដែលបានបញ្ជាក់នៅក្នុងប្រទេសជប៉ុន។ ទោះបីជាមានការកើនឡើងក៏ដោយ គ្មាននរណាម្នាក់ដែលត្រូវបានគេអះអាងថា ទើបតែឆ្លងមេរោគស្ថិតក្នុងស្ថានភាពធ្ងន់ធ្ងរនោះទេ ហើយប្រហែលជា ៨០% នៃពួកគេស្ថិតក្នុងអាយុ៣០ឆ្នាំ ឬក្មេងជាងនេះ បើយោងតាមរដ្ឋាភិបាលទីក្រុង។
ចំនួនករណីថ្មីមាននិន្នាការកើនឡើង ចាប់តាំងពីច្បាប់រឹតបន្តឹងពេលគ្រាអាសន្នទូទាំងប្រទេស ត្រូវបានដកចេញទាំងស្រុង កាលពីចុងខែឧសភា ដោយការឆ្លងបានរីករាលដាលបន្តិចម្តងៗ ពីទីក្រុងតូក្យូដល់តំបន់ក្បែរៗ៕ ដកស្រង់ចេញពីវេបសាយ ៖ bangkokpost (កែសម្រួលដោយ ៖ បុប្ផា)
ចែករំលែកព័តមាននេះ