ខេត្តប៉ៃលិន ៖ កាលពីព្រឹកថ្ងៃទី១០ ខែកក្កដា ឆ្នាំ២០២០ នេះ ប្រជាពលរដ្ឋចំនួន១៥គ្រួសារបាននាំគ្នាទៅតវ៉ាសុំអន្តរាគមន៍ សូមឲ្យលោកអភិបាលខេត្តប៉ៃលិន ផាន់ ចាន់ធុល…
ខេត្តប៉ៃលិន ៖ កាលពីព្រឹកថ្ងៃទី១០ ខែកក្កដា ឆ្នាំ២០២០ នេះ ប្រជាពលរដ្ឋចំនួន១៥គ្រួសារបាននាំគ្នាទៅតវ៉ាសុំអន្តរាគមន៍ សូមឲ្យលោកអភិបាលខេត្តប៉ៃលិន ផាន់ ចាន់ធុល ជួយសម្រួលដល់ពួកគាត់ចំពោះករណីអាជ្ញាធរស្រុកសាលាក្រៅ នៃខេត្តប៉ៃលិន បានចេញសេចក្តីជូនដំណឹង ស្តីពីការចុះរុះរើផ្ទះសម្បែង ដែលសាងសង់លើចំណីផ្លូវ ស្ថិតនៅភូមិទឹកចេញ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដោយដាក់កំណត់ត្រឹមថ្ងៃទី១៤ ខែកក្កដាឆ្នាំ២០២០ ជាកំហិត ។
បើតាមប្រភពពីប្រជាពលរដ្ឋទាំង១៥គ្រួសារបានលើកឡើងថា ដីខាងលើនេះ គឺពួកគាត់រស់នៅជិត២០ឆ្នាំមកហើយ ដោយទិញពីគេតៗគ្នា រួចបានសាងសង់ផ្ទះរស់នៅរហូតមកដល់សព្វថ្ងៃនេះតែម្តង ។ ហើយបើខាងអាជ្ញាធរដេញពួកគាត់ចេញពីកន្លែងនោះតើឲ្យពួកគាត់ទៅនៅរស់នៅឯណា ព្រោះពួកគាត់គ្មានដីធ្លីផ្សេងទៀតនោះទេ ។ ម្យ៉ាងវិញទៀតពួកគាត់សុទ្ធតែជាប្រជាពលរដ្ឋក្រីក្រជាកម្មករដើរស៊ីឈ្មួលគេបានមួយថ្ងៃរស់មួយថ្ងៃ ពេលខ្លះសឹងតែដាច់បាយក៍មាន ខណៈជំងឺកូវីដកំពុងវាយប្រហារ ។
ប្រជាពលរដ្ឋទាំងអស់ ក៍សំណូមពរដល់ប្រមុខរាជរដ្ឋាភិបាលកម្ពុជា ជួយរកដំណោះស្រាយជូនពួកគាត់ផង ព្រោះពួកគាត់គាំទ្រ និងជឿជាក់លើសម្តេចតេជោ ហ៊ុនសែន ដែលកន្លងមកតែងតែជួយដល់ប្រជាពលរដ្ឋជាកូនចៅដែលជួបទុក្ខលំបាកឲ្យបានធូរស្រាល ។
ក្រោយពីមានការសម្របសម្រួលពីលោក ចេង ញ៉ាន់ អភិបាលរងខេត្តដោយឲ្យប្រជាពលរដ្ឋរស់នៅបន្តទៀត រង់ចាំខាងរដ្ឋបាលខេត្តត្រៀមរកដីមួយកន្លែង ដើម្បីឲ្យពលរដ្ឋទាំង១៥គ្រួសារ ទៅរស់នៅទីនោះដោយមួយគ្រួសារទទួលបានដីទំហំ៥ម៉ែត្រគុណ២០ម៉ែត្រ ។ ចំណែកប្រជាពលរដ្ឋភាគច្រើនទទួលយកការដោះដូរដីនេះ តែរង់ចាំសប្តាហ៍ក្រោយ បន្ទាប់ពីកំណត់ទីតាំងច្បាស់លាស់ផងដែរ ៕
ចែករំលែកព័តមាននេះ