លោកមហាសេដ្ឋី ប៊ីល ហ្គេតស៍ (Bill Gates) ដែលជាសហស្ថាបនិកក្រុមហ៊ុន Microsoft បានចែករំលែកមកថា មានទម្លាប់មួយដែលនឹងមិនមានការផ្លាស់ប្តូរទេនៅថ្ងៃអនាគត ហើយទម្លាប់នោះគឺការបន្តរៀនសូត្រជានិច្ច។
កាលពីឆ្នាំមុន លោកបានទទួលសំណួរមួយថា «តើសិស្សានុសិស្សក្នុងថ្ងៃនេះគួរតែដឹងពីអ្វីខ្លះដើម្បីជោគជ័យក្នុងឆ្នាំ ២០៣០ និង ២០៤០?»
លោកបានឆ្លើយតបថា «សម្រាប់អ្នកដែលពូកែឆ្ងល់ ពេលនេះជាពេលល្អបំផុតហើយព្រោះសមត្ថភាពរបស់អ្នកក្នុងការពង្រីកចំណេះដឹងតាមរយៈការស្តាប់ Podcast ឬ ការពន្យល់មេរៀនពីគ្រូដែលមានលើអ៊ីនធើណែតគឺល្អជាងពេលណាទាំងអស់។»
ការផ្ទុះនៃជំងឺកូវីដ១៩ នេះ បានបង្កឲ្យមនុស្សជាច្រើនងាកមកចាប់អារម្មណ៍លើការរៀនអនឡាញដើម្បីអភិវឌ្ឍន៍ខ្លួន។
យោងទៅតាមលោកហ្គេតស៍ សិស្សានុសិស្សគួរតែមានចំណេះដឹងមូលដ្ឋាន ចំណេះដឹងផ្នែកប្រវត្តិសាស្ត្រ វិទ្យាសាស្ត្រ និងសេដ្ឋកិច្ច ព្រោះវានឹងមានប្រយោជន៍ជាងគេនៅថ្ងៃអនាគត។
ក្រៅពីនេះទៅទៀត សិស្សានុសិស្សក៏ត្រូវបំពាក់ខ្លួន និងត្រៀមខ្លួនសម្រាប់ការផ្លាស់ប្តូរ និងឧបសគ្គដែលបង្កើតឡើងដោយបច្ចេកវិទ្យាផងដែរ។
លោកបានបន្ថែមថា «ក្នុងកំឡុងពេលប៉ុន្មានទសវត្សខាងមុខ ការធ្វើបដិវត្តន៍ឌីជីថលនឹងធ្វើឲ្យពួកយើងភ្ញាក់ផ្អើល។» និងបានបន្តទៀតថា បច្ចេកវិទ្យាដូចជា Artificial Intelligence នឹងកាន់តែរីកចម្រើនក្នុងផ្នែកជាច្រើនទៀតផងដែរ។
ប៉ុន្តែគន្លឹះសំខាន់គឺការរក្សាភាពជឿជាក់លើខ្លួនឯងក្នុងនាមជាអ្នករៀន និងការរក្សាការប្តេជ្ញាក្នុងការបន្តរៀនសូត្រជានិច្ច។ សម្រាប់លោកហ្គេតស៍ លោកបានបន្តរៀនសូត្រតាមរយៈការអានសៀវភៅ។ លោកធ្លាប់ចែករំលែកថា លោកអានសៀវភៅជាមធ្យមមួយក្បាលជារៀងរាល់សប្តាហ៍ទោះជាលោករវល់យ៉ាងខ្លាំងពិតមែនក្តីក៏លោកទុកពេលវេលាសម្រាប់ការអានដែរ ៕
ចែករំលែកព័តមាននេះ