ជាង​តុទូ​ម្នាក់​បាន​បាត់បង់​ជីវិត ព្រោះ​ផឹកស្រា​រាល់ថ្ងៃ និង​អត់បាយ


ខេត្តស្វាយរៀង ៖ បុរស​វ័យ​៣៤​ឆ្នាំ ម្នាក់​ដេក​ស្លាប់​នៅ​ក្នុង​បន្ទប់ សមត្ថកិច្ច​ដាក់​ការ​សង្ស័យ​ថា ខ្យល់​គាំងបេះដូង​ស្លាប់ ដោយ​ជន​រង​គ្រោះ​ពិសា​ស្រា​រាល់​ល្ងាច ហើយ​មិន​ហូប​បាយ ទើប​បណ្តាល​ឲ្យ​ខ្យល់គ​ស្លាប់ ។ ករណី​ជាងឈើ​ធ្វើ​តុទូ​ស្លាប់​នេះ កើតឡើង​នៅ​ភូមិ​មេភ្លើង​សង្កាត់​ស្វាយ​រៀង​ក្រុង​ស្វាយ​រៀង ។

បើ​តាម​ម្ចាស់ផ្ទះ​ឈ្មោះ អ៊ុ​ក ភេទ​ស្រី អាយុ​៥៧​ឆ្នាំ នៅផ្ទះ​កើតហេតុ​ខាងលើ បាន​ឲ្យ​សមត្ថកិច្ច​ដឹង​ថា មុន​ពេល​កើតហេតុ​ជាងឈើ​ធ្វើ​តុទូ​ម្នាក់​នេះ​ផឹកស្រា នៅ​វេលា​ម៉ោង​៦​និង​០០​នាទី​ល្ងាច ថ្ងៃ​ទី​៩ កក្កដា ២០២០ ដោយ​អត់​ហូប​បាយ (​គឺ​ផឹកស្រា​រាល់​ល្ងាច​មិន​ដែល​ហូប​បាយ​ទេ​) ក្រោយ​ពី​ផឹកស្រា​ស្រវឹង​ហើយ បាន​ចូល​ទៅ​ដេក​នៅ​ក្នុង​បន្ទប់​ផ្ទះ​ផ្ទាល់​ដី​ម្នាក់ឯង ។

លុះ​ព្រឹក​ឡើង​វេលា​ម៉ោង​ប្រមាណ​ជា​៤​និង​២០​នាទី​ព្រឹក​ទៀប​ភ្លឺ​ថ្ងៃ​ទី​១០ កក្កដា ២០២០ មានឈ្មោះ ឈុ​ន​ប្រុ​ក ភេទ​ស្រី អាយុ​៤៧​ឆ្នាំ ដែល​រស់នៅ​ក្នុងផ្ទះ​នោះ​ដែរ (​ដេក​នៅ​លើ​ផ្ទះ​) បាន​ចុះពីលើផ្ទះ​មក​ក្រោម​ក៏​ចូល​ទៅ​ដាស់​ជន​រង​គ្រោះ​ឲ្យ​ក្រោក​ស្រាប់តែ ជន​រង​គ្រោះ​ស្លាប់​សព​រឹង​បាត់​ទៅ​ហើយ មិនដឹង​ស្លាប់​តាំងពី​ពេល​ណា​នោះ​ទេ ។ ក៏​ប្តឹង​សមត្ថកិច្ច​ឲ្យ​មក​ពិនិត្យ​តែ​ម្តង ។

បើ​តាម​សមត្ថកិច្ច​នគ​បាល​ក្រុង​ស្វាយ​រៀង​បាន​ឲ្យ​ដឹង​ថា ជន​រង​គ្រោះ​ឈ្មោះ​កែវ​រ៉េ ភេទ​ប្រុស អាយុ​៣៤​ឆ្នាំ ជា​កូនកំព្រា គ្មាន​ប្រពន្ធ​កូន​ទេ មានស្រុក​កំណើត​នៅ​ខេត្តកំពង់ធំ ។

ប្រភព​ដ៏​ដែល​បន្ត​ទៀត​ថា ដោយ​ជីវភាព​ក្រីក្រ បាន​មក​រស់នៅ​ជាមួយ​ម្ចាស់ផ្ទះ​ឈ្មោះ អ៊ុ​ក អស់ រយៈពេល​ជាង​៦​ឆ្នាំ​មក​ហើយ ដោយ​សុំ​ម្ចាស់ផ្ទះ​ធ្វើ​ជា​កូនធម៌ និង​ដោយ​មាន​ជំនាញ​ចេះ​ធ្វើ​តុ កៅអី ទូ (​ជាងឈើ​)​ម្ចាស់ផ្ទះ​ក៏​ទទួល​ធ្វើ​ជា​កូនធម៌​និង​បាន​បើក​សិប្បកម្ម​ធ្វើ​តុ កៅអី ធ្វើ​ទូ​លក់​រហូត​មក ដោយ​មាន​ដាក់​កូនជាង​បី​បួន​នាក់​ធ្វើការ​ជាមួយ​។​ហើយ​ប៉ុន្មាន​ឆ្នាំ​ចុង​ក្រោយ​នេះ​ជន​រង​គ្រោះ​តែងតែ​ផឹកស្រា​រាល់​ល្ងាច ជួនកាល​ផឹក​ទាំង​ថ្ងៃ​ពេល​ណា​គ្មាន​ការងារ​ធ្វើ​ឬ​ពេល​ថ្ងៃ​សម្រាក ហើយ​ពេល​ផឹកស្រា គឺ​មិន​ដែល​ឃើញ​ចេះ​ក្លែម ឬ​ហូប​បាយ​ទេ​ផឹក​អត់បាយ​ទើប​ខ្យល់គ ស្លាប់​បែប​នេះ ។

សមត្ថកិ្ច​បាន​បញ្ជាក់​ថា តាម​ការ​ពិនិត្យ​និង​ធ្វើ​កោសល​វិ​ច្ច័​យ​របស់​ក្រុម​គ្រូពេទ្យ គឺ​ពុំ​មាន​ឃើញ​មាន​ស្លាកស្នាម​អ្វី​គួ​ឲ្យ​សង្ស័យ​នោះ​ទេ​ដូច្នេះ​ក្រុម​គ្រូពេទ្យ​បច្ចេកទេស​បាន​ធ្វើការ​សន្និដ្ឋាន​ថា ស្លាប់​ដោយ​ខ្យល់គ ។ ក្រោយ​ពី​ពិនិត្យ​សាកសព​រួច​សមត្ថកិច្ច​បាន​ហៅ​រថយន្ត​សា​មុ​យ​ដឹក​សព​យក​ទៅ​តម្កល់​ធ្វើបុណ្យ​តាម​ប្រពៃណី នៅ​វត្ត​ព្រៃ​ឆ្លាក់​សង្កាត់​ព្រៃ​ឆ្លាក់​ក្រុង​ស្វាយ​រៀង​ខេត្តស្វាយរៀង ៕

Facebook Google Twitter Email

Live

Sponsored News

ការស្ទង់មតិគេហទំព័រថ្មី




សូម​អរគុណ