រាជធានីភ្នំពេញ ៖ អង្គការហ្វរផរ (Four Paws) បានចេញរបាយការណ៍ប្រចាំឆ្នាំរបស់ខ្លួនថា សត្វឆ្កែប្រមាណ៣លានក្បាល ត្រូវបានពិឃាតជារៀងរាល់ឆ្នាំនៅប្រទេសកម្ពុជា ។ អង្គការនេះមានកិច្ចសហប្រតិបត្តិការជាមួយរាជរដ្ឋាភិបាលកម្ពុជា…
រាជធានីភ្នំពេញ ៖ អង្គការហ្វរផរ (Four Paws) បានចេញរបាយការណ៍ប្រចាំឆ្នាំរបស់ខ្លួនថា សត្វឆ្កែប្រមាណ៣លានក្បាល ត្រូវបានពិឃាតជារៀងរាល់ឆ្នាំនៅប្រទេសកម្ពុជា ។
អង្គការនេះមានកិច្ចសហប្រតិបត្តិការជាមួយរាជរដ្ឋាភិបាលកម្ពុជា ដើម្បីធ្វើការហាមឃាត់ការទិញលក់ និងពិឃាតសត្វឆ្កែជាអាហារ ចាប់តាំងពីឆ្នាំ២០១៨មកម្ល៉េះ ។
របាយការណ៍ អង្គការ Four Paws បានចេញនៅក្រោយពេលដែលអាជ្ញាធរខេត្តសៀមរាប ពិសេសមន្ទីរកសិកម្មខេត្តសៀមរាបចេញវិធានការទប់ស្កាត់មិនមានការការជួញដូរ ពិឃាតសត្វឆ្កែនៅលើកទឹករបស់ខ្លួនទៀត ចាប់ពីថ្ងៃទី៦ កក្កដា ឆ្នាំ២០២០នេះទៅ ។
សម្រាប់សមត្ថកិច្ចខេត្តសៀមរាបការសម្លាប់សត្វឆ្កែធ្វើអាហារបានបង្ហាញពីធ្លាក់ចុះសីលធម៌ និងបានធ្វើឲ្យប៉ះពាល់ដល់វិស័យទេសចរណ៍នៅលើទឹកវប្បធម៌តំណាងឲ្យកម្ពុជា ។
អាជ្ញាធរថា ឆ្កែជាសត្វដែលស្មោះត្រង់ចំពោះម្ចាស់មិនគួរត្រូវសម្លាប់ឡើយ ។ សម្លាប់សត្វឆ្លែក៏ជាអំពើល្មើសច្បាប់ផងដែរ ។
Four Paws បានគាំទ្រដល់ការប្រកាសរបស់មន្ទីរកសិកម្មខេត្តសៀមរាបនោះដោយបានគួសបញ្ជាក់ថា ចំណាត់ការនេះនឹងអាចជួយសង្គ្រោះជីវិតសត្វឆ្កែបានប្រមាណ៧ពាន់ក្បាល ក្នុងមួយខែ ដែលត្រូវបានគេសម្លាប់ ។
អាជីវកម្មលក់សត្វឆ្កែ មិនមែនមាននៅតែសៀមរាបនោះទេ នៅភ្នំពេញ និងនៅខេត្តនានា មានលក់សាច់សត្វឆ្កែយ៉ាងព្រោងព្រាត ។ សាច់សត្វឆ្កែដែលគេចម្អិតដាក់លក់ មានអាំង មានដុត ដាក់បង្ហាញអ្នកទិញដោយចំហ មានលលាក្បាលសត្វឆ្កែដែលស្លាប់ហើយ ទុកតាំងដើម្បីទាក់ទាញអ្នកទិញទៀតផង ។ សាច់សត្វឆ្កែត្រូវបានគេដាក់ឈ្មោះថា សាច់ពិសេស ។
លោក ឃឹម ហ្វីណង់ អភិបាលស្រុកបន្ទាយស្រី ខេត្តសៀមរាប បានដឹងថា ស្រុកបន្ទាយស្រី ជាតំបន់មួយមានការជួញដូរសត្វឆ្កែសកម្មមួយនៅក្នុងខេត្តសៀមរាប ។ លោកថា ការជួញដូរនេះបានធ្វើឱ្យប៉ះពាល់ដល់វិស័យទេសចរណ៍ និងកេរ្តិ៍ឈ្មោះរបស់ស្រុកបន្ទាយស្រី និងខេត្តសៀមរាប តួយ៉ាងមានសារពត៌មានអន្តរជាតិចំនួន១៨០បណ្តាញ បានធ្វើការចុះផ្សាយរិះគន់នៅលើគេហទំព័ររបស់ពួកគេ ក្នុងអំឡុងពីខែវិច្ឆិកា និងខែធ្នូ២០១៩ ។
លោកអភិបាលស្រុកវ័យក្មេងលោក ឃឹម ហ្វីណង់ ថាការហាមឃាត់ការជួញដូរសាច់ឆ្កែនេះ ក៏នឹងលើកកម្ពស់សុខមាលភាពសត្វផង និងសុខភាពសាធារណៈរបស់ប្រជាពលរដ្ឋទូទៅផង ជៀសវាងការឆ្លងរាលដាលជម្ងឺផ្សេងៗ ។ លោកបាននិយាយថា «រដ្ឋបាលស្រុកបន្ទាយស្រីសង្ឃឹមថា បងប្អូនអាជីវករដែលប្រកបរបរទិញ លក់ និងសត្តឃាតសត្វឆ្កែទាំងអស់នៅក្នុងស្រុក ជាពិសេសនៅក្នុងឃុំព្រះដាក់ នឹងមានការយោគយល់ ព្រមទាំងផ្តល់កិច្ចសហការដោយរលូន បញ្ឈប់រាល់សកម្មភាពទាំងនេះ និងងាកទៅចាប់យកមុខរបរថ្មី ដែលមិនមានការហាមឃាត់ ។
ការផ្សព្វផ្សាយជាមុននេះចាត់ទុកជាជំហរទន់ភ្លន់មួយរបស់អាជ្ញាធរមូលដ្ឋាន ដើម្បីទុកអោយអាជីវករទាំងអស់ស្ម័គ្រចិត្តរៀបចំអនុវត្តតាមការតម្រូវនៃច្បាប់ដោយខ្លួនឯង មុននឹងរដ្ឋបាលស្រុកអនុវត្តនីតិវិធីរដ្ឋបាល» ៕
ចែករំលែកព័តមាននេះ