ខេត្តត្បូងឃ្មុំ ៖ បើតាមសេចក្តីរាយការណ៍បឋមបានឱ្យដឹងថា ដោយសារតែភ្លើងប្រចណ្ឌធ្វើឲ្យមន្ត្រីសមត្ថកិច្ចពាក់សក្តិ៣ម្នាក់ បានទាញកាំភ្លើងខ្លីបាញ់ប្រហារទៅលើស្រីស្នេហ៍២គ្រាប់នៅមុខបន្ទប់ជួល ស្ថិតក្នុងភូមិជីមាន់ ឃុំក្រែក ស្រុកពញាក្រែក កាលពីម៉ោង៨នាទីយប់ ថ្ងៃទី៩ ខែកក្កដា ២០២០ បណ្តាលឱ្យនារីរងគ្រោះត្រូវបាត់បង់ជីវិត ខណៈពេលបញ្ជូនមកសង្គ្រោះនៅមន្ទីរពេទ្យបង្អែកស្រុកពញាក្រែក លុះរហូតមកដល់ព្រឹកថ្ងៃទី១០ ខែកក្កដានេះ នារីរងគ្រោះកំពុងតែរៀបចំធ្វើបុណ្យសពតាមប្រពៃណី។
សេចក្តីរាយការណ៍បន្តថា នារីរងគ្រោះខាងលើ មានឈ្មោះ ហេង សុហ៊ាម អាយុ២០ឆ្នាំ រស់នៅភូមិ៣៧ ក្នុងមូលដ្ឋានចំការកៅស៊ូក្រែកស្រុកពញាក្រែក ចំណែកជនបង្កជាមន្ត្រីសមត្ថកិច្ចពាក់សក្តិ៣ មានឈ្មោះ មូលទិត្យ ឧត្តម អាយុ៣១ឆ្នាំ ដែលត្រូវបានគេស្គាល់ថា ជាមន្ត្រីសមត្ថកិច្ចពាក់សក្តិ២។
បើតាមសមត្ថកិច្ចមូលដ្ឋានប្រាប់ឲ្យដឹងថា ចំពោះហេតុការណ៍ខាងលើនៅមិនទាន់ដឹងច្បាស់លាស់នោះទេ ដោយគ្រាន់តែដឹងជាជំហានដំបូងថា មូលហេតុដែលបណ្តាលឱ្យកើតមានអំពើបាញ់ប្រហារទៅលើស្រីស្នេហ៍នេះ គឺដោយសារតែកើតរោគប្រចណ្ឌ។
សមត្ថកិច្ចរៀបរាប់បន្តថា ក្រោយពីបាញ់ប្រហារគូស្នេហ៍ចំនួន២គ្រាប់ចំដើមទ្រូង បណ្ដាលឲ្យរងរបួសជាទម្ងន់រួចមក ជនបង្កដែលត្រូវគេស្គាល់ថា ជាសមត្ថកិច្ចនោះ បានបើករថយន្តម៉ាកព្រុស ដើម្បីរត់គេចខ្លួន។ លុះបើកមកជិតដល់ច្រកខ្លោងទ្វារមុខសាលាស្រុកពញាក្រែក ហើយព្រោះតែរថយន្តបានប្រើប្រាស់ល្បឿនផងនោះ ក៏បណ្តាលឱ្យរថយន្តរបស់ជនបង្កទៅបុកជាមួយនឹងរថយន្តដឹកទំនិញពីខាងក្រោយយ៉ាងពេញទំហឹង បណ្តាលរងការខូចខាតជាដំណំ ចំណែកស័ក្ត៣ជាអ្នកបើកបររថយន្តរងរបួសធ្ងន់ធ្ងរ រីឯរថយន្តធំដឹកទំនិញវិញ ក្រោយកើតហេតុក៏បានបើករត់គេចខ្លួនបាត់តែម្តង។
ក្រោយពេលកើតហេតុ កម្លាំងនគរបាលចរាចរណ៍ស្រុកពញាក្រែក បានចុះមកពិនិត្យនៅកន្លែងកើតហេតុ បន្ទាប់មកក៏បានលោកស័ក្ត៣ មកសង្គ្រោះនៅមន្ទីរពេទ្យបង្អែកស្រុក រួចនាំបន្តមកសង្គ្រោះនៅមន្ទីរពេទ្យខេត្តកំពង់ចាម និងបានបញ្ជូនបន្តទៅសង្គ្រោះនៅរាជធានីភ្នំពេញទាំងយប់ផងដែរ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព៕ (កែសម្រួលដោយ ៖ បុប្ផា)
ចែករំលែកព័តមាននេះ