ប្រទេស​សិង្ហ​បុរី ៖ សមាគម​កីឡាបាល់ទាត់​សិង្ហ​បុរី (FAS) បាន​ចូលរួម​មរណទុក្ខ ចំពោះ​មរណភាព​របស់​អតីត​ខ្សែប្រយុទ្ធ​ក្រុម​ជម្រើសជាតិ​សិង្ហ​បុរី​គឺ​កីឡាករ Hafiz Rahim ដែល​បាន​ទទួល​បាត់​បង់ជីវិត​ក្នុង​វ័យ​៣៦​ឆ្នាំ បន្ទាប់​ពី​ជួប​គ្រោះថ្នាក់​ចរាចរណ៍​កាលពី​ព្រឹក​នៅ​ថ្ងៃ​ព្រហស្បតិ៍ ទី​៩ ខែកក្កដា​នេះ​។

តាម​រាយការណ៍​ពី​មន្ត្រី​ប៉ូលិស​បានឱ្យ​ដឹង​ថា នៅ​ព្រឹក​ថ្ងៃ​ទី​៩ ខែកក្កដា Hafiz Rahim បាន​ជិះ​ម៉ូតូ​ក្នុង​គោលបំណង​ធ្វើ​ដំណើរ​ទៅ​ចូលរួម​ការ​ហ្វឹកហាត់​មួយ ហើយ​គ្រោះថ្នាក់​ដែល​បាន​ឆក់​យក​ជីវិត​របស់​កីឡាករ​រូប​នេះ គឺ​បាន​កើតឡើង​នៅ​ក្នុង​តំបន់ Tampines ។

នៅ​ក្នុង​ផេ​ក​ផ្លូវការ​របស់ FAS បាន​ធ្វើការ​បង្ហាញ​ពី​ការ​សោកសៅ​យ៉ាង​ខ្លាំង នៅ​ពេល​បានដឹង​អំពី​ការ​ស្លាប់​របស់ Hafiz Rahim ។ ដោយ​បាន​ហៅ​កីឡាករ​រូប​នេះ​ថា ជា​អ្នក​ប្រយុទ្ធ​ដ៏​ប៉ិន​ប្រសប់ ដែល​បាន​ចូលរួម​ជា​លើក​ដំបូង​សម្រាប់​ប្រទេស​សិង្ហ​បុរី​ក្នុង​ឆ្នាំ​២០១១ ដោយ​បង្ហាញខ្លួន​ចំនួន ៩​ប្រកួត និង​ស៊ុត​បញ្ចូល​ទី​បាន​មួយ​គ្រាប់​សម្រាប់​ប្រទេស​នេះ​។

សូម​រំលឹក​ថា ខ្សែប្រយុទ្ធ Hafiz Rahim គឺជា​ផ្នែក​មួយ​នៃ​ក្រុម​ជម្រើសជាតិ​សិង្ហ​បុរី ដែល​បាន​ឈ្នះ​ពានរង្វាន់ AFF Suzuki Cup កាលពី​ឆ្នាំ ២០១២​។ ដោយឡែក​ក្នុង​ក្លិប​អាជីព រូបគេ​ធ្លាប់​លេង​ឱ្យ​ក្រុម​ជា​ច្រើន​ដូច​ជា​៖ Geylang United, Singapore Armed Forces, Gombak United, Home United, Warriors FC និង​ចុង​ក្រោយ​ជាមួយ​ក្លិប Tampines Rovers Football Club​។

ដោយ​ក្នុង​នោះ បាន​ឈ្នះ​ពានរង្វាន់​លី​គ​កំពូល​សិង្ហ​បុរី S-League ជាមួយ​ក្រុម Warriors FC ក្នុង​ឆ្នាំ​២០១៤ និង​ពានរង្វាន់ Singapore Cup ជាមួយ​ក្រុម Home United ក្នុង​ឆ្នាំ ២០១៣ និង​ជាមួយ​ក្រុម Geylang United ក្នុង​ឆ្នាំ​២០០៩​ផង​ដែរ ៕ (​ដកស្រង់​ចេញពី tnp.sg)