ឪពុកម្តាយរងកម្មជិត​១០ឆ្នាំ ពេលនេះ​សម្រេចចិត្ត​នាំកូនចូលប៉ុស្តិ៍​


រាជធានី​ភ្នំពេញ ​៖ មាន​​ករណីឪពុកម្តាយ​បាន​សម្រេចចិត្ត​នាំ​កូនប្រុស​បង្កើត​ម្នាក់ ​ដែល​​ជា​កូនប្រុស​ពៅ​ទៅ​កាន់​ប៉ុស្តិ៍​នគរបាល​ភ្លើង​ឆេះ​រទេះ ក្នុង​ខណ្ឌ​កំ​បូល រាជធានី​ភ្នំពេញ កាលពី​វេលា​ព្រឹក​ថ្ងៃ​ទី​៩ ខែកក្កដា ឆ្នាំ​២០២០ ដើម្បី​ស្នើសុំ​ឲ្យ​នគរបាល​ជួយ​ធ្វើ​កិច្ចសន្យា​កាត់កាល់​កូនប្រុស​របស់​ពួក​គាត់​ម្នាក់​នោះ​ចោល​ ​ដោយសារ​​ពួក​គាត់​អះអាង​ថា​​ កូនប្រុស​ម្នាក់នេះ​ធ្វើ​បាបចិត្ត​របស់ពួកគាត់អស់រយៈពេលជិត​១០ឆ្នាំ​ ព្រមទាំង​បំផ្លាញ​ទ្រព្យ​សម្បត្តិ​ ហើយ​ប្រដៅ​លែង​ស្ដាប់​ ទើបពួក​​គាត់​សម្រេចចិត្ត​កាត់កាល់​ចោល​តែ​ម្ដង​។

​បុរសជាឪពុក​ឈ្មោះ ម៉ក់ សុ​ន អាយុ​៦២​ឆ្នាំ​ មុខរបរ​កម្មករ និង​​ស្ត្រីជាម្តាយ​​ឈ្មោះ មៃ អុ​ន អាយុ​៦៥ ឆ្នាំ មុខរបរ​មេផ្ទះ​ មាន​ទីលំនៅ​បច្ចុប្បន្ន​ភូមិ​កប់​ភ្លុក សង្កាត់​ភ្លើង​ឆេះរ​ទះ ខណ្ឌ​កំ​បូល រាជធានី​ភ្នំពេញ​។​ ចំណែក​កូនប្រុស​ឈ្មោះ​ម៉ក់ នី អាយុ​២៥​ឆ្នាំ ​ជា​កូនប្រុស​ពៅ​ រស់នៅ​ក្នុង​បន្ទុកគ្រួសារ ។

​តាម​ប្រភពពីឪពុកម្តាយ​ខាងលើ​បាន​រៀបរាប់​ទាំង​អួល​ដើម​កថា ពួក​គាត់​ទាំង​២​នាក់​បាន​នាំ​កូនប្រុស​ម្នាក់​ដែល​ជា​កូនប្រុស​ពៅ​រស់នៅ​ក្នុង​បន្ទុកគ្រួសារ ទៅ​កាន់​ប៉ុស្តិ៍​នគរបាល​ភ្លើង​ឆេះរ​ទេះនា​ពេល​នេះ គឺ​ដើម្បី​ស្នើរ​សុំ​ឲ្យ​នគរបាល​ជួយ​ធ្វើ​កិច្ចសន្យា​កាត់កាល់​កូនប្រុស​រូប​នោះ​ចោល ព្រោះតែ​អស់​និស្ស័យ​ជា​ឪពុក​ម្ដា​និង​កូន​តទៅ​ទៀត​ហើយ​។ ដោយ​សារ​កូនប្រុស​រូប​នេះ​ជា​មនុស្ស​ចោលម្សៀត​គ្មាន​បានការ គ្មាន​ដឹងគុណ​ដឹង​ទោស​អ្វី​ទាំងអស់ ធ្វើបាប​ពួក​គាត់​គ្មាន​មេត្តា​ និងធ្វើ​ឲ្យ​ពួកគាត់​គ្រាំគ្រា​ចិត្ត​ជិត​១០​ឆ្នាំ​កន្លង​មក​ហើយ ​ព្រមទាំង​​បំផ្លិចបំផ្លាញ​ទ្រព្យសម្បត្តិ​ក្នុងផ្ទះ​ជា​ច្រើន​លើក​រាប់​មិន​អស់​ គិត​ជា​ទឹកប្រាក់​អស់​រាប់​ម៉ឺន​ដុល្លារ បើ​ទោះបីជា​ពួក​គាត់​ប្រៀនប្រដៅ​យ៉ាងណា​ក៏​មិន​ស្ដាប់​សោះ និយាយ​រួម​ កូន​ម្នាក់​នេះ​ធ្វើ​អ្វី​ៗ​ទៅ​តាម​ទំនើងចិត្ត​​ គ្មានអ្នកណា​ប្រដៅស្តាប់​​ឡើយ​។

​តាម​ប្រភពដដែល​បាន​​ប្រាប់​បន្ត​ទៀត​ថា ដោយសារ​តែ​គិត​ថា​ជា​សាច់ឈាម ទើប​កន្លង​មក ​ទោះជា​កូន​ម្នាក់​​នេះ​មិន​តាម​គន្លង​ធម៌​ តែងតែ​ធ្វើបាប​យ៉ាងណា​ក៏​ពួក​គាត់​ចេះ​តែ​ស៊ូទ្រាំ​លំបាក​ទាំង​ផ្លូវចិត្ត ​និង​ខ្មាស​អៀន​អ្នក​ស្រុកភូមិ​បំផុត ប៉ុន្តែ​ពួក​គាត់​ក៏​មិន​បាន​នឹកគិត​ដល់​ថា ​ត្រូវ​កាត់កាល់​ចោល​បែប​នេះ​ឡើយ ហើយ​បាន​បន្ត​ធ្វើការ​អប់​រំជា​បន្តបន្ទាប់ ។

តាម​ប្រភពដដែលបាន​រៀបរាប់​បន្ត​ថា ​រហូត​ក្រោយមក​ ពួកគាត់​បាន​រៀបចំ​ទុកដាក់​ឲ្យ​មានគូស្រករ​នឹង​គេ ដោយ​ពួក​គាត់​បាន​គិត​ថា​ក្រោយ​ពេល​រៀប​ការ​ប្រពន្ធ​រួច​ ក្រែង​កូន​ប្រុសម្នាក់នេះ​ចេះ​កែខ្លួន ប៉ុន្តែ​អ្វី​ដែល​រឹតតែ​ខ្មាស​គេ​ថែម​ទៀត​នោះ​ គឺ​បន្ទាប់​ពី​រៀប​ការ​រួច​កូនប្រុស​នេះ​ច​រិ​ក​នៅ​ដដែល​មិន​ផ្លាស់​ប្ដូរ​សោះ​ ឬ​ក៏​អាច​ថា​លើស​ដើម​ទៀត​ផង​។​ ចំណងដៃ​អាពាហ៍ពិពាហ៍​បង្កើត​បានកូន​ម្នាក់ ប៉ុន្តែ​កូនប្រុស​គាត់​នេះ​មិន​ចេះ​ស្រឡាញ់​ប្រពន្ធ​កូន​នោះ​ឡើយ មួយ​ថ្ងៃ​ៗ​គិតតែ​ដើរ​លេង​បំផ្លាញ​ទ្រព្យសម្បត្តិ​ក្នុងផ្ទះ​គ្មាន​សល់​ មិន​​គិត​រក​ស៊ី​ចិញ្ចឹម​ប្រពន្ធ​កូន​សោះ​ដឹង​តែ​ពី​ភាព​ហ៊ឺហា​។​

តាម​ប្រភពដដែល​បាន​រៀបរាប់បន្ត​ទៀត​ថា ដោយសារ​តែ​បែប​នេះ ​ទើប​បង្ក​ឲ្យ​មាន​ជម្លោះ​នៅ​ក្នុង​គ្រួសារ​ជា​ញឹកញាប់​រហូត​ឈាន​ដល់​ការ​លែងលះ​គ្នា បន្ទាប់​មក​កូនប្រុស​ម្នាក់​នេះ​បាន​មក​រស់នៅ​ក្នុង​បន្ទុក​ជាមួយ​ពួក​គាត់ ហើយ​ច្រើន​ឆ្នាំ​កន្លង​មកនេះ​បាន​បំផ្លិចបំផ្លាញ​ទ្រព្យសម្បត្តិ​និង​លុយកាក់​អស់​រាប់​ម៉ឺន​ដុល្លារ មិនតែប៉ុណ្ណោះ​តែងតែ​បង្កជម្លោះ​ក្នុង​គ្រួសារ និង​​គំរាម​កំហែង​ពួក​គាត់​សព្វបែបយ៉ាង​ជា​ញឹកញាប់ ។

តាម​ប្រភពដដែល​បាន​រៀបរាប់​បន្តទៀត​ថា ​ដោយសារ​តែ​អត់​ទ្រាំង​តទៅ​ទៀត​លែង​បាន​ ទើប​ពួក​គាត់​សម្រេចចិត្ត​ថា​នឹង​កាត់​សាច់​១​ដុំ​នេះ​បោះចោល​ ប្រសើរ​ជាង​ទុក​ឲ្យ​នៅ​រងកម្ម​ ហើយ​ថ្ងៃ​ណា​ក៏​ពួក​គាត់​ស្គាល់​តែ​ទឹកភ្នែក លុះដល់​វេលា​ព្រឹក​ថ្ងៃ​ទី​៩ ខែកក្កដា ឆ្នាំ​២០២០ ​ពួក​គាត់​ក៏​បាន​នាំ​កូនប្រុស​រូប​នេះ​ទៅ​កាន់​ប៉ុស្តិ៍​នគរបាល​ភ្លើង​ឆេះ​រទេះ​ដើម្បី​សុំ​ឲ្ន​គ​របាល​ជួយ​អន្តរាគមន៍​ធ្វើ​កិច្ច​ន្យា​កាត់កាល់​កូនប្រុស​នេះ​ចោល​ឈប់​ទទួលស្គាល់ ឈប់​ទទួលខុសត្រូវ រាល់​ទ​ង្វើ​ដែល​កូន​នេះ​ប្រព្រឹត្ត​តទៅ​ទៀត​ហើយ​៕ (កែសម្រួលដោយ ៖ ធីតា​)

Facebook Google Twitter Email

Live

Sponsored News

ការស្ទង់មតិគេហទំព័រថ្មី




សូម​អរគុណ