ក្រុងហុងកុង ៖ ប្រទេសចិនកាលពីថ្ងៃទី៨ កក្កដា បានបើកការិយាល័យសន្តិសុខជាតិរបស់ខ្លួននៅហុងកុង ដោយយកសណ្ឋាគារមួយធ្វើជាការិយាល័យនោះ ។
សណ្ឋាគារជាការិយាល័យសន្តិសុខរបស់ចិននៅហុងកុង ស្ថិតក្នុងសង្កាត់ពាណិជ្ជកម្មមួយនាកណ្ដាលក្រុង ស្ថិតនៅជិតឧទ្យានមួយដែលកាលពីឆ្នាំទៅមិញ ជាចំណុចសំខាន់មួយក្នុងចំណោមចំណុចសំខាន់ៗនៃការប្រមូលផ្ដុំគ្នារបស់ពួកបាតុករស្និទ្ធប្រជាធិបតេយ្យ ។
ការិយាល័យនោះនឹងត្រួតពិនិត្យការអនុវត្តច្បាប់សន្តិសុខថ្មីដែលក្រុងប៉េកាំងបានដាក់ឲ្យប្រើប្រាស់កាលពីសប្ដាហ៍មុន ដោយច្បាប់នោះគ្រោងដាក់ទោស ការធ្វើវិទ្ធង្សនា ភេរវកម្ម ការបំបែកខ្លួននិយម និងការឃុបឃិតជាមួយកងកម្លាំងបរទេស ។
ច្បាប់នោះដែលអនុញ្ញាតជាលើកដំបូងឲ្យបណ្ដាភ្នាក់ងារសន្តិសុខរបស់ចិនដីគោកបោះទីតាំងនៅហុងកុង ផ្ដល់អំណាចដល់ការិយាល័យនោះ ចាត់បណ្ដាវិធានការចំពោះរឿងធ្ងន់ធ្ងរទាំងឡាយ ។ ច្បាប់នេះអនុញ្ញាតឲ្យភ្នាក់ងារសន្តិសុខធ្វើបត្យាប័នបណ្ដាជនសង្ស័យទៅចិនដីគោកដើម្បីកាត់ទោសនៅទីនោះ ។
លោក ZHENG YANXIONG ដែលតែងតាំងជាប្រមុខការិល័យនោះ និងប្រមុខប្រតិបត្តិក្រុងហុងកុងលោកស្រីការី ឡាម បានចូលរួមក្នុងពិធីបើកការិល័យនេះ ដែលជាអតីតសណ្ឋាគារ METROPARK HOTEL ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ