ប្រធានាធិបតីអាមេរិក ចង់បិទកម្មវិធី TikTok និងកម្មវិធីចិនផ្សេងទៀត
អាមេរិក ៖ តាមប្រភពព័ត៌មាន Shanghaiist បានឱ្យដឹងថា លោក Mike Pompeo រដ្ឋមន្ត្រីក្រសួងការបរទេសអាមេរិក បាននិយាយថា…
អាមេរិក ៖ តាមប្រភពព័ត៌មាន Shanghaiist បានឱ្យដឹងថា លោក Mike Pompeo រដ្ឋមន្ត្រីក្រសួងការបរទេសអាមេរិក បាននិយាយថា សេតវិមានអាមេរិក កំពុងពិចារណាថា តើត្រូវហាមឃាត់ TikTok មិនឱ្យមាននៅក្នុងប្រទេសរបស់ខ្លួនដែរឬអត់?
លោក Pompeo ពិតជាមិនមែនជាអ្នកប្រើប្រាស់ TikTok ខ្លួនឯងទេ។ ក្នុងអំឡុងពេលសម្ភាសន៍របស់ Fox News នៅយប់ថ្ងៃច័ន្ទ លោកត្រូវបានគេសួរថា តើលោកនឹងផ្តល់អនុសាសន៍ឱ្យទាញយកកម្មវិធីចែករំលែកវីដេអូដ៏ពេញនិយមរបស់ចិនដែរឬទេ?
លោកបានឆ្លើយតបថា៖ «ប្រសិនបើអ្នកចង់បានព័ត៌មានឯកជនរបស់អ្នកនៅក្នុងដៃរបស់បក្សកុម្មុយនីស្តចិន អ្នកយកវាមកប្រើចុះ»។
បន្ទាប់មកនៅពេលត្រូវបានគេសួរថា តើកម្មវិធីចិនដូចជា TikTok នឹងត្រូវហាមឃាត់ឬអត់នោះ? លោកបានឆ្លើយតបថា៖ «ខ្ញុំមិនចង់ចេញមុខមុនប្រធានាធិបតីទេ ប៉ុន្តែវាជាអ្វីដែលយើងកំពុងពិចារណា»។
ទោះយ៉ាងណា ការប្រកាសមិនច្បាស់នេះ នៅតែអាចធ្វើឱ្យ TikTok មិនបារម្ភមិនបាន ព្រោះតែពេលនេះកំពុងតែជួបនឹងបញ្ហាជាច្រើន។ ខណៈពេលដែលក្រុមហ៊ុន TikTok បានទទូចម្តងហើយម្តងទៀតថា ខ្លួននឹងមិនចែករំលែកទិន្នន័យជាមួយរដ្ឋាភិបាលចិននោះទេ ហុងកុងថា នឹងដកកម្មវិធីនេះចេញភ្លាម នៅពេលមានច្បាប់សន្តិសុខជាតិថ្មីដ៏ចម្រូងចម្រាស។
TikTok ត្រូវបានហាមឃាត់ពីទីផ្សារដ៏ធំបំផុតមួយរបស់ខ្លួន ដោយរដ្ឋាភិបាលឥណ្ឌា ហាមឃាត់កម្មវិធីចិនចំនួន៥៩ កាលពីសប្តាហ៍មុន បន្ទាប់ពីមានការប៉ះទង្គិចគ្នានៅតាមព្រំដែនយ៉ាងសាហាវរវាងកងទ័ពចិន និងឥណ្ឌា៕ ដកស្រង់ចេញពីវេបសាយ ៖ shanghaiist (កែ សម្រួលដោយ ៖ បុប្ផា)
ចែករំលែកព័តមាននេះ