ប្រទេសចិន-ឥណ្ឌា ៖ តំណាងពិសេសចិនទទួលបន្ទុកបញ្ហាព្រំដែនចិន-ឥណ្ឌា ព្រមទាំងជាទីប្រឹក្សារដ្ឋ និងជារដ្ឋមន្ត្រីការទេសចិនលោកវ៉ាងយី កាលពីយប់ថ្ងៃទី៥ កក្កដា បានជួបសន្ទនាគ្នាតាមទូរស័ព្ទជាមួយ តំណាងពិសេសឥណ្ឌា និងជាទីប្រឹក្សាសន្តិសុខជាតិ លោកអាជីតដីវ៉ាល់ ដោយក្នុងឱកាសនោះ ភាគីទាំង២បានឈានទៅដល់កុងសង់ស៊ុសជាវិជ្ជមានមួយសំដៅសម្រាលសភាពការណ៍នៅតាមព្រំដែននៃប្រទេសទាំង២ ។
ក្រោយកុងសង់ស៊ុសនោះប្រទេសចិននាថ្ងៃទី៦ កក្កដា បានចាប់ផ្ដើមដកកងទ័ពចេញពីបណ្ដោយព្រំដែនមានជម្លោះជាមួយឥណ្ឌា ។ នេះបើយោងតាមប្រភពរដ្ឋាភិបាលឥណ្ឌា ៣សប្ដាហ៍ ក្រោយការប៉ះទង្គិចបង្ហូរឈាមគ្នារវាងកងទ័ពនៃមហាអំណាចអាស៊ីទាំង២ ដែលបណ្ដាលឲ្យទាហានឥណ្ឌាស្លាប់២០នាក់ ។
ប្រភពនោះរបស់រដ្ឋាភិបាលឥណ្ឌាគូសបញ្ជាក់ថា កងទាហានចិនត្រូវបានឃើញកំពុងរើចេញបណ្ដាតង់ ព្រមទាំងបណ្ដារចនាសម្ព័ន្ធចេញពីទីតាំងមួយនៅជ្រលងភ្នំហ្គាល់វ៉ាន ជាទីលាននៃការប៉ះទង្គិចគ្នា ។ បណ្ដារថយន្តយោធាចិនក៏ត្រូវឃើញដកចេញដែរពីតំបន់នោះព្រមទាំងពីតំបន់ព្រំដែនមានជម្លោះ២ទៀត គឺទីតាំងHOTSPRING និង GOGRA ។
កងទាហានចិននិងកងទាហានឥណ្ឌា បានប៉ះទង្គិចគ្នាកាលពីយប់ថ្ងៃទី១៥ មិថុនា រយៈពេលជា
ច្រើនម៉ោងដោយប្រើកណ្ដាប់ដៃ ដុំថ្ម និងដំបង ហើយទាហានមួយចំនួនត្រូវវាយច្រានទម្លាក់ចូល
ក្នុងទឹកដែលមានទឹកកកសែនត្រជាក់នៃទន្លេហ្គាល់វ៉ាននាភាគខាងលិចភ្នំហីុម៉ាឡៃយ៉ា ។ ចិនពុំ
បានផ្ដល់តួលេខនៃការបាត់បង់របស់ខ្លួនក្នុងការប៉ះទង្គិចគ្នានោះតែឥណ្ឌាថារងការបាត់បង់ធ្ងន់ធ្ងរ
បំផុត ក្នុងតំបន់មានជម្លោះជាង៥ទសវត្សមកហើយ ។
ការចរចាគ្នាត្រូវបានធ្វើរយៈពេលប៉ុន្មានសប្ដាហ៍ចុងក្រោយនេះ សំដៅសម្រាលភាពតានតឹង ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ