ADផ្ទាំងផ្សព្វផ្សាយពាណិជ្ជកម្ម

Picture

តុបតែង​សួន​ច្បារ​ជុំវិញ​រូបសំណាក​ស្តេច​កន ដើម្បី​ទាក់ទាញ​ភ្ញៀវ​ទេសចរមកកម្សាន្ត

3 ឆ្នាំ មុន
  • ប៉ៃលិន

ខេត្ត​ប៉ៃលិន ៖ គេ​សង្កេត​ឃើញ​ប្រធានប្រជា​ការពារ​ឃុំ​ស្ទឹង​កាច់ សហការ​ជាមួយនឹង​នគរ​បាលប៉ុស្តិ៍​រដ្ឋបាល ឃុំ​ស្ទឹង​កាច់​នាំ​គ្នា​ចុះ​តុបតែង​សួនច្បារ​​ក្នុងបរិវេណរូបសំណាកស្តេចកន​ ដោយ​កាត់​តម្រឹមដើម​​ផ្កា ដែល​បាន​ដាំ​ជុំវិញ​សួន​នេះ ដើម្បី​ទាក់ទាញ​ភ្ញៀវ​ទេសចរក្នុងស្រុក និង​ភ្ញៀវ​មក​ពី​តាម​បណ្តា​ខេត្ត ឱ្យ​​មក​​លេង​កំសាន្ត​កាន់តែ​ច្រើន​កុះករ​ផង​ដែរ…

ខេត្ត​ប៉ៃលិន ៖ គេ​សង្កេត​ឃើញ​ប្រធានប្រជា​ការពារ​ឃុំ​ស្ទឹង​កាច់ សហការ​ជាមួយនឹង​នគរ​បាលប៉ុស្តិ៍​រដ្ឋបាល ឃុំ​ស្ទឹង​កាច់​នាំ​គ្នា​ចុះ​តុបតែង​សួនច្បារ​​ក្នុងបរិវេណរូបសំណាកស្តេចកន​ ដោយ​កាត់​តម្រឹមដើម​​ផ្កា ដែល​បាន​ដាំ​ជុំវិញ​សួន​នេះ ដើម្បី​ទាក់ទាញ​ភ្ញៀវ​ទេសចរក្នុងស្រុក និង​ភ្ញៀវ​មក​ពី​តាម​បណ្តា​ខេត្ត ឱ្យ​​មក​​លេង​កំសាន្ត​កាន់តែ​ច្រើន​កុះករ​ផង​ដែរ ។

ហេតុការណ៍​ខាងលើ​នេះបាន​ធ្វើ​ឡើង​កាលពី​វេលា​ម៉ោង​៥​និង​៣០​នាទី​ល្ងាច​ថ្ងៃ​ទី​៥ ខែមិថុនា ឆ្នាំ​២០២០ ស្ថិត​នៅ​ជាប់​បណ្តោយ​ផ្លូវជាតិ​លេខ​៥៧ ឆ្ពោះទៅ​ព្រំដែន​កម្ពុជា-ថៃ ក្នុងភូមិ​ស្ទឹង​កាច់ ស្រុក​សាលា​ក្រៅ ខេត្ត​ប៉ៃលិន ។

តាម​ប្រភព​ព័ត៌មាន​ពី​លោក រិ​ន សា​ម៉េ​ត អាយុ​៥១​ឆ្នាំ ជា​ប្រធាន​ប្រជា​ការពារ​ឃុំ​ស្ទឹង​កាច់​បាន​រៀ​បរាប់​ឱ្យ​ដឹង​ថា នៅ​ត្រង់​កន្លែង​សួនច្បារ​ក្នុង​បរិវេណ​រូបសំណាក​ស្តេច​កន​នេះ គឺ​មាន​ដាក់​ទោង​ស​ម្រា​ប់​ក្មេង​ៗ ជិះ​លេង និង​ឧបករណ៍​ហាត់ប្រាណ​សម្រាប់​ឱ្យ​ប្រជាពលរដ្ឋ​រស់នៅ​ក្នុង​ខេត្ត​នាំ​គ្នា​ហាត់ប្រាណ​ដើម្បី​សុខភាព មិន​ថា​ពេល​ព្រឹក ឬ​ពេល​ល្ងាច​ត្រជាក់​នោះ​ទេ ។

លោក​បន្ត​ទៀត​ថា រហូត​មក​ដល់​ពេល​នេះ គួរ​ឱ្យ​សោកស្តាយ​បំផុត ដោយ​ឧបករណ៍​មួយ​ចំនួន​ត្រូវ​បាន​​ក្មេង​ទំនើង​លួច​យក​ទៅ​អស់ ។ រីឯ​របស់​ដែល​នៅ​សេសសល់ ដូច​ជា​បង់ សម្រាប់​អង្គុយ​លេង ត្រូវ​បាន​វាយ​បែក​ខ្ទេចខ្ទី ខណ​:​នគរបាល​ប៉ុស្តិ៍ និង​ប្រជា​ការពារ​នាំ​គ្នា​សម្រាកពីការ​​យាមកាម​ពេល​យប់​ជ្រៅ គឺ​ពួក​គេ​ឆក់​ឱកាស​ធ្វើ​បែប​នេះ​តែ​ម្តង ។

លោក​បញ្ជាក់​ថា នៅ​ក្នុង​បរិវេណ​រូបសំណាក​ស្តេច​កន​នេះ មាន​ដាក់​តាំង​រូប​សេះ​ពណ៌​មាស​ចំនួន​៨​ក្បាល ដែល​ជា​តំណាង​ឱ្យ​សេនា​ទ័ព​សេះ ។ ជា​រៀងរាល់ថ្ងៃ លោក​តែងតែ​សង្កេត​ឃើញ​ថា ឱ្យ​តែ​ដល់​ពេល​ល្ងាច គឺ​មាន​ប្រជាពលរដ្ឋ​នាំ​កូនចៅទៅ​លេង​កំសាន្ត និង​ដើរ​ហាត់ប្រាណ​នៅ​ត្រង់​កន្លែងសួនច្បារ​ខាងលើ​​នេះ ជា​ពិសេស​ថ្ងៃ​សៅរ៍ អាទិត្យ មាន​មនុស្ស​ច្រើន ។

លោក​បញ្ជាក់បន្ត​​ថា ​ប្រជា​ពលរដ្ឋ​នាំ​គ្នា​លេង​ត្រង់​កន្លែងសួនច្បារ​ក្នុង​បរិវេណរូបសំណាក​​ស្តេច​កន​នេះ​តែ​ពេល​ភ្លឺ​ច្បាស់​ប៉ុណ្ណោះ លុះដល់​យប់​បន្តិច គឺ​នាំ​គ្នា​ត្រឡប់​ទៅ​ផ្ទះ​រៀង​ៗ​ខ្លួន ដោយសារ​តែ​កន្លែង​នេះ មាន​រថយន្ត ម៉ូតូ ឆ្លងកាត់​ទៅ​មក​ជា​ច្រើន ហើយ​ណាមួយ​កម្លាំង​ខាង​លោក​មាន​គ្នា​តិច មិន​អាច​ការពារ​បាន​គ្រប់​ជ្រុងជ្រោយឡើយ​ ហើយ​ត្រង់​កន្លែង​ដាំ​ផ្កា (​ដើម​ស្នាយ​) នៅ​ជុំវិញ​សួន​មាន​ប្រវែង​ជិត​២០០​ម៉ែត្រ ដោយ​លោក​អភិ​បា​ល​ស្រុក​សាលា​ក្រៅ​បាន​ប្រគល់​សួនច្បារ​នេះ​ឱ្យ​ខាង​ឃុំ​ស្ទឹង​កាច់ ជា​អ្នក​មើលថែ និង​ដាំ​ផ្កា​ភ្ញី​បន្ថែម​ទៀត សម្រាប់​លំអ និង​ទាក់ទាញ​ភ្ញៀវ​ទេសចរណ៍ ឱ្យ​ចូល​ទៅ​លេង​កំសាន្ត​កាន់តែ​ច្រើន ។

ចំណែក​លោក នួន សា​វឿ​ន នាយ​រង​គ​របាល​ប៉ុស្តិ៍​ស្ទឹង​កាច់ បាន​រៀបរាប់​ឱ្យ​ដឹង​ដែរ​ថា ខាង​លោក​ពិតជា​សោកស្តាយ​យ៉ាង​ខ្លាំង ខណ​:​ឃើញ​បង្គោលរបង​ជុំវិញ​សេះ​៨​ក្បាល ត្រូវ​បាន​ក្មេង​ទំនើង​នាំ​គ្នា​កាច់​បំបាក់ អស់​ជា​ច្រើន​ដើម ពួក​គេ​វាយបំបាក់​បង់​អង្គុយ​លេង និង​ទោង​ផង​ដែរ ។ លោក​បន្ត​ទៀត​ថា ចាប់ពី​ពេល​នេះ​តទៅ​ខាង​លោក​នឹង​ដាក់​កម្លាំង​ចាំ​យាម ដើម្បី​តាម​រកមុខ​ក្មេង​ទំនើង​ទាំងនោះ ហើយនឹង​ចាប់​យក​ទៅ​អប់រំ ដើម្បី​កុំឱ្យ​បន្ត​នាំ​គ្នា​បំផ្លិចបំផ្លាញទ្រព្យសម្បត្តិសាធារណៈ​​​បែបនេះទៀត​ ។

លោក​បញ្ជាក់​ថា ខាង​លោក​ក៏​ធ្លាប់ ចាប់​បាន​ក្មេង​ទំនើង​ខ្លះ​ៗដែរ​កាលពីមុន ក៏​ធ្វើការ​អប់រំ​រួច​ឱ្យ​ត្រឡប់​ទៅ​ផ្ទះ​វិញ ។ តែ​ពេល​នេះ បើសិន​ជា​តាម​ទាន់​ក្មេង​ទាំងនោះ ខាង​លោក​នឹង​ចាប់​ឱ្យ​ពួក​គេ​រៀបចំ​សង​់បង្គោល​របង​សេះ ដែល​បាន​កាច់​ផ្តួល​នេះ​ឡើង​វិញ ព្រោះ​ការ​បំផ្លិចបំផ្លាញ​របស់​សាធារណ​:​បែប​នេះ គឺ​មិន​សមរម្យ​នោះ​ឡើយ នាំ​ឱ្យ​ពួក​គេ​កាន់តែ​ប្រព្រឹត្ត​អាក្រក់​ថែម​ទៀត ៕ (កែសម្រួលដោយ ៖ ធីតា​)

អត្ថបទសរសេរ ដោយ

កែសម្រួលដោយ