មហាជនភាគច្រើនតែងមានចម្ងល់បែបនេះជាយូរមកហើយដោយគិតថា នៅក្នុងរដូវគង់ចាំវស្សាព្រះសង្ឃមិនអាចនិមន្តចេញក្រៅវត្តដើម្បីបិណ្ឌបាតចង្ហាន់ពីអ្នកស្រុកបានទេ ព្រោះវាខុសទៅនឹងធម៌វិន័យរបស់អ្នកបួស ។ តើគំនិតបែបនេះត្រឹមត្រូវដែរឬទេ ?
មិនទាន់ត្រឹមត្រូវទេ! បើតាមផ្លូវវិន័យបានបញ្ជាក់ថា ការនិមន្តចេញបិណ្ឌបាតរបស់ភិក្ខុសង្ឃគឺមិនបានធ្វើឱ្យប៉ះពាល់ដល់ការចាំវស្សាឡើយ លោកអាចនិមន្តបិណ្ឌបាតតាមធម្មតាបាន ព្រោះការនិមន្តចេញបិណ្ឌបាតរបស់ព្រះសង្ឃយ៉ាងយូរត្រឹមម៉ោង១១ព្រឹក ហើយត្រូវវិលត្រឡប់មកចូលវត្តវិញជាប្រញាប់ វៀរលែងតែភិក្ខុអង្គណានិមន្តទៅកាន់ទីដទៃឱ្យកន្លងរាត្រី ហើយវិលត្រឡប់មកចូលវត្តវិញក្រោយអរុណរះ ទើបភិក្ខុអង្គនោះនឹងដាច់វស្សាហើយ ។
បើនិយាយពីការលំបាកនៅក្នុងរដូវវស្សា អ្នកបួសក្នុងសម័យពុទ្ធកាលត្រូវជួបការលំបាកខ្លាំងមិនអាចនិមន្តទៅកាន់ទីឆ្ងាយបានឡើយព្រោះមិនមានយានជំនិះសម្រាប់ជាមធ្យោបាយធ្វើដំណើរ គឺនិមន្តទៅដោយថ្មើរជើង តែចំណែកបច្ចុប្បន្នជាសម័យកាលទំនើបខាងបច្ចេកវិទ្យា មានមធ្យោបាយធ្វើដំណើរគ្រប់ប្រភេទ លោកអាចនិមន្តទៅកាន់ទីឆ្ងាយៗ ឬអាចនិមន្តឆ្លងខេត្តបាននិងអាចវិលត្រឡប់មកចូលទីអាវាសវិញដោយងាយមិនខ្វល់ពីអន្តរាយនៃការចាំវស្សាឡើយ ។ សាន សារិន
ចែករំលែកព័តមាននេះ