អន្តរជាតិ ៖ ក្លិប​តោ​ខៀវ Chelsea បាន​ប្រកាស​ពី​ការ​ចុះហត្ថលេខា​លើ​ខ្សែប្រយុទ្ធ​កូនកាត់​អង់គ្លេស​-​ថៃ Jude Soonsup-Bell សម្រាប់​ក្រុម​ឈុត​យុវជន​អាយុ​ក្រោម ១៨​ឆ្នាំ (U18) របស់​ខ្លួន​ជា​ផ្លូវការ​។

សូម​ជម្រាប​ជូន​ថា​ខ្សែប្រយុទ្ធ Jude Soonsup-Bell មាន​ឪពុក​ជា​ជនជាតិ​អង់គ្លេស និង​ម្តាយ​គឺជា​ជនជាតិ​ថៃ​។ ក្មេង​ប្រុស​រូប​នេះ បាន​កើត​នៅ​ថ្ងៃ​ទី​១០ ខែមករា ឆ្នាំ​២០០៤ (​បច្ចុប្បន្ន​វ័យ ១៦​ឆ្នាំ​) បាន​ប្រឡូក​ក្នុង​ការ​ហ្វឹកហាត់​បាល់ទាត់​យ៉ាង​លឿន ដោយសារ​តែ​កាយសម្បទា​របស់​គេ មានការ​លូតលាស់​បាន​យ៉ាង​ឆាប់រហ័ស​។

Jude ត្រូវ​បាន​ក្រុម​គ្រួសារ​បញ្ជូន​ទៅ​សាលា​បាល់ទាត់​របស់​ក្លិប Chelsea ដោយ​ផ្ទេរ​សាលា​បាល់ទាត់​ក្លិប Swindon Town Youth ក្នុង​ឆ្នាំ​២០១៥ ដើម្បី​បន្ត​តម្រង់​ទិស​ដៅ​ឈាន​ទៅ​រក​កីឡាករ​អាជីព​។ មិន​ត្រឹមតែ​មាន​ទេព​កោសល្យ​ពី​ធម្មជាតិ​ប៉ុណ្ណោះ​ទេ ប៉ុន្តែ​កាយសម្បទា​របស់ Jude ក៏​គួរ​ឱ្យ​ចាប់អារម្មណ៍​ផង​ដែរ ដោយ​មានកំ​ពស់ ១,៨០​ម៉ែត្រ​នៅ​វ័យ​ត្រឹម ១៦​ឆ្នាំ​។ កត្តា​នេះ​ហើយ ដែល​ធ្វើ​ឱ្យ​ក្លិប Chelsea សម្រេច​ចុះហត្ថលេខា​លើ​រូបគេ​ក្នុង​នាម​ជា​កីឡាករ​ក្រុម​ឈុត U18 កាលពី​ថ្ងៃ​ទី​១ ខែកក្កដា​កន្លង​ទៅ ដើម្បី​ចូលរួម​ការ​ប្រកួតប្រជែង​ពានរង្វាន់​យុវជន​អង់គ្លេស​រដូវ​កាល​ក្រោយ​។

ដោយសារ​តែ​សមត្ថភាព​, កាយសម្បទា បូក​រួម​ជាមួយ​បច្ចេកទេស​ដ៏​អស្ចារ្យ​របស់​រូបគេ​តាម​រយៈ​ការ​ប្រកួត​កន្លង​លោក បាន​ធ្វើ​ឱ្យ Jude ត្រូវ​បាន​កោះហៅ​ឱ្យ​ចូល​ក្រុម​ជម្រើសជាតិ​អង់គ្លេស​អាយុ​ក្រោម ១៧​ឆ្នាំ​ផង​ដែរ​៕ (ដកស្រង់​ចេញពី mgronline)