ឃាត់ខ្លួន​ជនសង្ស័យ​០៣​នាក់ ពី​បទ​អារ​កាត់ឈើ និង​បរបាញ់​សត្វ​ទន្សោង​នៅ​ខាងលិច​ភ្នំ​ត្នោត


ខេត្ដព្រះវិហារ ៖ នៅ​ថ្ងៃ​ទី​០២ ខែកក្កដា ឆ្នាំ​២០២០ មន្ត្រី​នៃ​មន្ទីរ​បរិស្ថាន​ខេត្ដព្រះវិហារ និង​កម្លាំង​កងរាជអាវុធហត្ថ បាន​ចាប់​ឃាត់ខ្លួន​ជនសង្ស័យ​០៣​នាក់ ពី​បទ​អារ​កាត់ឈើ និង​បរបាញ់​សត្វព្រៃ​(​សត្វ​ទន្សោង​) នៅ​ចំណុច​ខាងលិច​ភ្នំ​ត្នោត ក្នុង​ដែនជម្រកសត្វព្រៃ​ភ្នំ​ត្នោត​-​ភ្នំ​ពក​។ នេះ​បើ​យោង​តាម​ផេ​ក​ក្រសួងបរិស្ថាន​ចេញផ្សាយ​នៅ​ថ្ងៃ​ទី​០៤ ខែកក្កដា នេះ​។

ជនសង្ស័យ​ទាំង​០៣​នាក់ រស់នៅ​ភូមិ​អូរ ឃុំ​ខ្វាវ ស្រុក​ជីក្រែង ខេត្តសៀមរាប ។ ចំណែក​វត្ថុ​តាង​ដែល​ត្រូវ​បាន​ដកហូត​រួម​មាន ឈើ​អារ​រួច​មួយ​ចំនួន គោ​យន្ត​០១​គ្រឿង រណា​យន្ត​០១​គ្រឿង និង​សាច់ និង​ឆ្អឹង​ទន្សោង​ប្រមាណ​១០​គីឡូក្រាម ។

បច្ចុប្បន្ន​ជនសង្ស័យ​ត្រូវ​បាន​បញ្ជូន​មក​ដល់​មន្ទីរ​បរិស្ថាន​ខេត្ដ ដើម្បី​សួរនាំ​បន្ថែម និង​ចាត់វិធានការ​តាម​ផ្លូវច្បាប់ ។ នា​ថ្ងៃ​ដដែល កម្លាំង​មន្ត្រី​ការពារ​ទេសភាព​ប្រាសាទ​បាកាន និង​មន្ត្រី​ឧ​ទ្យា​នុ​រក្ស​ស្នាក់​ការ​តា​សែង សហការ​ជាមួយ​កម្លាំង​នគរបាល​បាន​ចុះ​ទៅ​ពិនិត្យ​ចំណុច​ភ្នំ​បាំង តាម​ការ​ចង្អុលបង្ហាញ​ពី​លោក​អភិបាលស្រុក​ថា នៅ​ទីនោះ​មាន​ត្រាក់ទ័រ​ភ្ជួរ​ដី និង​បាន​ចុះ​ល្បាត​ផង​ដែរ​នៅ​ចំណុច​បឹង​ប្រដាក និង​ចំណុច​ប្រាសាទបឹង​ស្រែ ដើម្បី​ទប់ស្កាត់ និង​បង្ក្រាប​បទល្មើស​ដែល​អាច​កើត​មាន ។

ដោយឡែក​នៅ​តំបន់​បេ​តិក​ណ្ឌ​ធម្មជាតិ ភ្នំ​ត្បែង មន្ត្រី​ឧ​ទ្យា​នុ​រក្ស​បាន​ចុះ​ល្បាត​រួម​ជាមួយ​សហគមន៍​តំបន់ការពារធម្មជាតិ​តាំងយូរ​ដល់​ចំណុច​ព្រៃ​ត្រពាំង​ស្មាច់​ប្រទះ​ឃើញ​សត្វ​ស្វា​ក្តាម​០២​ក្បាល ផង​ដែរ ៕

Facebook Google Twitter Email

Live

Sponsored News

ការស្ទង់មតិគេហទំព័រថ្មី




សូម​អរគុណ