ប្រទេសចិន ៖ បន្ទាប់ពីពន្យារពេលជិត៦ខែដោយសារតែការផ្ទុកឡើងនៃវីរុសកូវីដ១៩ ទីបំផុតក្របខណ្ឌ Chinese Super League (CSL) រដូវកាល២០២០ នឹងចាប់ផ្តើមរដូវកាលថ្មីរបស់ខ្លួននៅថ្ងៃទី២៥ ខែកក្កដា ឆ្នាំ២០២០ ខាងមុខ។
សូមបញ្ជាក់ថា យុទ្ធនាការរដូវកាលឆ្នាំ២០២០ ត្រូវបានគ្រោងចាប់ផ្តើមនៅថ្ងៃទី២២ ខែកុម្ភៈ ប៉ុន្តែដោយសារតែការផ្ទុះឡើង និងការរីករាលដាលពីវីរុសកូវីដ១៩ បានបង្ខំឱ្យលីគកំពូលចិនមួយនេះ ត្រូវពន្យារពេល។
បើយោងតាមការបញ្ជាក់ពីសមាគមបាល់ទាត់ចិន (CFA) បានឱ្យដឹងថា សម្រាប់ការប្រកួតរដូវកាល២០២០ ត្រូវផ្លាស់ប្តូរប្រព័ន្ធលេងដែលខុសពីរដូវកាលមុនៗ ។ ដោយក្នុងនោះក្រុមទាំង១៦ នឹងត្រូវបែងចែងជា២តំបន់ (ពូល) ដោយក្នុងមួយពូលមាន ៨ក្រុម។ ដែលនឹងត្រូវលេងនៅតំបន់ Dalian ក្នុងខេត្ត Liaoning និងតំបន់ Suzhou ក្នុងខេត្ត Jiangsu ។
ការប្រកួតនឹងត្រូវធ្វើឡើងចំនួនពីរជើងធម្មតា។ ក្រុមដែលស្ថិតនៅចំណាត់ថ្នាក់លេខ១ដល់លេខ៤ នឹងមានឱកាសទៅប៉ះក្រុមទាំង៤ ដែលចំណាត់ថ្នាក់ដូចគ្នានៅពូលមួយទៀត ដើម្បីប្រជែងយកតំណែងជើងឯករដូវកាល២០២។ ដោយឡែកក្រុមនៅចំណាត់ថ្នាក់លេខ៥ ដល់លេខ៨ នឹងត្រូវប៉ះក្រុមទាំង៤ ដែលមានចំណាត់ថ្នាក់ដូចគ្នានៅពូលមួយទៀត ដើម្បីប្រកួតយកកៅអីបន្តនៅក្របខណ្ឌ CSL រដូវកាលក្រោយ ចៀសពីការកាត់ទៅលីគលំដាប់ទី២។
ពូល A ដែលត្រូវលេងនៅទីក្រុង Dalian មានក្រុមដូចជា៖ ក្រុម Guangzhou Evergrande, Jiangsu Suning, Shandong Luneng, Henan Jianye, Dalian Pro, Guangzhou R&F, Shanghai Shenhua និងក្រុម Shenzhen ។
រីឯពូល B ដែលត្រូវលេងនៅទីក្រុង Suzhou មានក្រុមដូចជា៖ ក្រុម Beijing Guo’an, Shanghai SIPG, Wuhan Zall, Tianjin Teda, Chongqing Dangdai, Hebei China Fortune, Qingdao Huanghai និងក្រុម Shijiazhuang Ever Bright ។
ដោយឡែកចំពោះកាលវិភាគប្រកួតលម្អិត សមាគមបាល់ទាត់ចិន នឹងធ្វើការប្រកាសនៅពេលក្រោយ៕ (ដកស្រង់ចេញពី៖ Chinadaily)
ចែករំលែកព័តមាននេះ