រាជធានីភ្នំពេញ ៖ យុវនិស្សិតឆ្នាំទី៣ម្នាក់់ ត្រូវបានគេប្រទះឃើញដេកស្លាប់ក្បែរព្រះវិហារក្នុងវត្តមហាមន្ត្រី ក្រោយពីធ្វើអត្តឃាតលោតសម្លាប់ខ្លួនពីលើដងទង់ដោយពុំមានអ្នកណាម្នាក់បានដឹងពីមូលហេតុទ្បើយ ។ ហេតុការណ៍នេះ បានបង្កឱ្យមានការភ្ញាក់ផ្អើលទ្បើងកាលពីវេលាម៉ោង៧និង៤៥នាទីព្រឹក ថ្ងៃទី២៣ ធ្នូ នៅក្នុងវត្តមហាមន្ត្រី ដែលមានទីតាំងស្ថិតក្នុងសង្កាត់អូទ្បាំពិក ខណ្ឌចំការមន ។ តាមប្រភពព័ត៌មានពីមន្ត្រីនគរបាលបានឱ្យដឹងថា យុវនិស្សិតដែលធ្វើអត្តឃាតនេះឈ្មោះ ប៉ែន រស្មី អាយុ២២ឆ្នាំ ជានិស្សិតឆ្នាំទី៣ នៃវិទ្យាស្ថានបច្ចេកវិទ្យាកម្ពុជា(សាលាតិចណូ) និងបម្រើការងារក្នុងក្រុមហ៊ុនមួយផងដែរ ស្នាក់នៅផ្ទះជួលជាមួយនឹងឪពុកម្តាយ ក្នុងខណ្ឌជ្រោយចង្វា មានស្រុកកំណើតនៅស្រុកទ្រាំង ខេត្តតាកែវ ។
សពយុវនិស្សិតរូបនេះ ត្រូវបានព្រះសង្ឃប្រទះឃើញដេកស្លាប់កាលពីព្រឹកថ្ងៃទី២៣ ធ្នូ នៅចន្លោះខឿនព្រះវិហារនិងខឿនសសរដងទង់ ទើបបង្កឱ្យមានការភ្ញាក់ផ្អើលដឹងដល់កម្លាំងមានសមត្ថកិច្ចចុះត្រួតពិនិត្យនៅកន្លែងកើតហេតុខាងលើ ។ តាមប្រភពដដែលបន្តថា កាលពីយប់ថ្ងៃទី២២ ធ្នូ យុវនិស្សិតរូបនេះ បានជិះម៉ូតូម៉ាកវេ៉វ ពណ៌ក្រហមមួយគ្រឿង មកលេងជាមួយនឹងព្រះសង្ឃនិងមិត្តភក្តិ ដែលមានស្រុកកំណើតជាមួយគ្នាស្នាក់នៅកុដិលេខ៤ក្នុងវត្តមហាមន្ត្រី រហូតដល់វេលាម៉ោងជាង១០យប់ ។ ក្រោយពីយុវនិស្សិតរូបនេះមុជទឹកនិងរៀបចំកន្លែងដេករួចហើយក៏ចុះដើេរចេញក្រៅបាត់ ដោយមិនមានអ្នកណាម្នាក់ដឹងថា គេចេញទៅណាទ្បើយ ។
លុះព្រឹកទ្បើងទើបមានការភ្ញាក់ផ្អើលកើតទ្បើងដែលមានសាច់ញាតិព្រះសង្ឃនិងមនុស្សម្នាជាច្រើននាក់ មកចោមរោមមើលក្រោយពីបានប្រទះឃើញសពដេកស្លាប់នៅខាងកើតព្រះវិហារ ។ ក្រោយពីមានការភ្ញាក់ផ្អើលកើតទ្បើង ដោយបានឃើញមានមនុស្សដេកស្លាប់នៅក្បែរព្រះវិហារបែបនេះ កម្លាំងមានសមត្ថកិច្ចក៏ចុះមកត្រួតពិនិត្យនិងធ្វើកោសល្យវិច័យនៅនឹងកន្លែងកើតហេតុភ្លាមៗ ។ ក្រោយពីឆ្លងកាត់ការធ្វើកោសល្យវិច័យពីសមត្ថកិច្ចជំនាញរួចហើយបានពិនិត្យឃើញថា យុវនិស្សិតរូបនេះ បានស្លាប់ដោយការធ្វើអត្តឃាតលោតសម្លាប់ខ្លួនឯង ។ ពាក់ព័ន្ធទៅនឹងការធ្វើអត្តឃាតដោយលោតពីលើសសរដងទង់សម្លាប់ខ្លួនឯងរបស់យុវនិស្សិតនេះ មិនមានសាច់ញាតិឬមិត្តភក្តិណាម្នាក់ដឹងថា មានវិបត្តិអ្វីទ្បើយ ហើយសពរបស់យុវនិស្សិតរូបនេះ ត្រូវបានក្រុមគ្រូពេទ្យបញ្ជូនទៅធ្វើបុណ្យតាមប្រពៃណីនៅឯស្រុកកំណើត ។
នេះជាការធ្វើអត្តឃាតដ៏កម្រមួយដែលអ្នកមានវិបត្តិជ្រើសរើសយកដងទង់ក្នុងវត្តអារាមសម្រាប់លោភសម្លាប់ខ្លួន ។
គួរឱ្យសោកស្តាយចំពោះជីវិតដែលកំពុងសិក្សាថ្នាក់មហាវិទ្យាល័យឆ្នាំទី៣ទៅហើយ បែរជាប្រល័យជីវិតខ្លួនឯង និងបញ្ចប់ក្តីសង្ឃឹមរបស់មាតាបិតាដែលបានខិតខំផ្គត់ផ្គង់ឱ្យកូនរៀនសូត្រ ដើម្បីអនាគតល្អ ផ្ទុយទៅវិញ បានត្រឹមមកស្លាប់អាសារឥតការ ៕
ចែករំលែកព័តមាននេះ