រាជធានីភ្នំពេញ ៖ បើទោះបីជាត្រី៦ប្រភេទ មានត្រីគល់រាំង ត្រសក់ក្រហម ត្រីខ្លា ត្រីក្របី ត្រីត្រចៀកដំរី និងបបែលយក្ស គឺជាប្រភេទត្រីជិតជុតពូជក៏ពិតមែន…
រាជធានីភ្នំពេញ ៖ បើទោះបីជាត្រី៦ប្រភេទ មានត្រីគល់រាំង ត្រសក់ក្រហម ត្រីខ្លា ត្រីក្របី ត្រីត្រចៀកដំរី និងបបែលយក្ស គឺជាប្រភេទត្រីជិតជុតពូជក៏ពិតមែន ប៉ុន្តែនៅតែមានការនេសាទ និងការលក់ដូរនៅលើទីផ្សារក្នុងប្រទេសកម្ពុជា និងមានការនាំចេញទៅលក់នៅក្រៅប្រទេសទៀតផង ។
អង្គការអភិរក្សធនធានធម្មជាតិ WWF បានជំរុញឲ្យអាជ្ញាធរអនុវត្តច្បាប់ ឲ្យបានម៉ឺងម៉ាត់ ដើម្បីការពារត្រីទាំងអស់នោះ ។
WWF បានឲ្យដឹងថា តាមការសិក្សាបង្ហាញថា ត្រីគល់រាំង ត្រីសក់ក្រហម ត្រូវបានចាត់ថ្នាក់ជាប្រភេទជិតផុតពូជជាសកល នៅក្នុងប្រទេសកម្ពុជា ។ ចំណែកត្រីក្របី ត្រីត្រចៀកដំរី សុទ្ធសឹងជាប្រភេទត្រីកំពុងរងគ្រោះថ្នាក់នៅក្នុងប្រទេសកម្ពុជា ។
ក្នុងសេចក្តីប្រកាសព័ត៌មានមួយក្នុងថ្ងៃទិវាមច្ឆជាតិលើកទី២០ ១ កក្កដា ឆ្នាំ២០២០ លោក អេង ជាសាន ប្រតិភូរដ្ឋាភិបាលកម្ពុជាទទួលបន្ទុកជាប្រធានរដ្ឋបាលជនផលនៃក្រសួងកសិកម្ម បានឲ្យដឹងថា អ្នកនេសាទអ្នកទិញត្រី និងឈ្មួញកណ្តាលមិនសូវយល់ដឹងពីច្បាប់ស្តីពីជលផល និងលិខិតបទដ្ឋាននានាពាក់ព័ន្ធនឹងកិច្ចការពារ និងការគ្រប់គ្រងជលផលទេ ជាពិសេសប្រភេទជលផលកំពុងទទួលរងគំរាមកំហែង ។
លោកបានបញ្ជាក់ថា «ខ្ញុំស្នើយ៉ាងទទួចដល់អាជ្ញាធរពាក់ព័ន្ធទាំងអស់បង្កើនការអប់រំ និងផ្សព្វផ្សាយបន្ថែមជូនប្រជានេសាទ និងសហគមន៍មូលដ្ឋានដែលរស់នៅតាមដងទន្លេមេគង្គ អំពីច្បាប់ស្តីពីជលផល និងលិខិតបទដ្ឋានានា ដើម្បីឲ្យពលរដ្ឋចូលរួមរក្សាធនធានជលផលកុំបាត់បង់»។
លោកសេង ទៀក នាយកអង្គការ WWF ប្រចាំប្រទេសកម្ពុជា ក៏បានធ្វើការអំពាវនាវដល់អាជ្ញាធរគ្រប់លំដាប់ថ្នាក់បង្កើនការរឹតបន្តឹងលើការអនុវត្តច្បាប់ឲ្យកាន់តែមានប្រសិទ្ធខ្ពស់បំផុត និងបង្កើនយន្តការត្រួតពិនិត្យជាប្រចាំនៅតាមទីផ្សារ និងដេប៉ូទិញ លក់ត្រី ព្រមទាំងដាក់ពិនិត្យឲ្យធ្ងន់ធ្ងរបំផុតដល់ជនល្មើសទាំងឡាយណា ដែលធ្វើសកម្មភាពនេសាទក្នុងតំបន់ហាមឃាត់ និងធ្វើពាណិជ្ជកម្មប្រភេទត្រីជិតផុតពូជ និងត្រីមេពូជក្នុងប្រទេសកម្ពុជា ។
WWF ថា ខ្លួន និងរដ្ឋបាលជនផល អាជ្ញាធរដែនដី និងដៃគូអភិវឌ្ឍន៍ដទៃទៀត បាន និងកំពុងយកចិត្តទុកដាក់ក្នុងការការពារ និងថែរក្សាមិនឲ្យធនធានដ៏កម្រនេះបាត់បង់ ។ មិនតែប៉ុណ្ណោះ អ្នកពាក់ព័ន្ធខាងលើនេះបានដាក់ចេញនូវអនុសាសន៍មួយចំនួនផងដែរ ដើម្បីពង្រឹងប្រសិទ្ធភាពនៃការអនុវត្តច្បាប់ជលផលចំពោះការនេសាទ និងជួញដូរត្រីខុសច្បាប់ បន្ទាប់ពី WWF និងរដ្ឋបាលជលផលបានបញ្ចប់ការសិក្សាវាយតម្លៃបឋមអំពីនេសាទ និងការជួញដូរត្រីខុសច្បាប់នៅក្នុងតំបន់តាមបណ្តោយដងទន្លេមេគង្គ កាលពីដើមឆ្នាំ២០២០នោះ ៕
ចែករំលែកព័តមាននេះ