រាជធានីភ្នំពេញ ៖ អតីតមេបក្សប្រឆាំងលោក កឹម សុខា បញ្ជាក់ថា ពលរដ្ឋមិនបោះបង់ចង់ចោលនោះទេ ក្រោមជំហរមិនប្រើអំពើហិង្សាគោរពសិទ្ធិមនុស្ស…របស់លោក ។ លោកកឹម…
រាជធានីភ្នំពេញ ៖ អតីតមេបក្សប្រឆាំងលោក កឹម សុខា បញ្ជាក់ថា ពលរដ្ឋមិនបោះបង់ចង់ចោលនោះទេ ក្រោមជំហរមិនប្រើអំពើហិង្សាគោរពសិទ្ធិមនុស្ស…របស់លោក ។
លោកកឹម សុខា បានសរសេរលើបណ្ដាញសង្គមនៅថ្ងៃទី២៩ មិថុនា ឆ្នាំ២០២០យ៉ាងដូច្នេះថា៖« នាព្រឹកនេះ នៅគេហដ្ឋានខ្ញុំ លោកស្រី Allison Steward ភារធារីទូតនៃប្រទេសកាណាដា ប្រចាំព្រះរាជាណាចក្រកម្ពុជា ដែលចប់អាណត្តិបេសកកម្មការទូតនៅកម្ពុជា បានមកសម្តែងការគួរសម ជម្រាបលា និងពិភាក្សាអំពីទំនាក់ទំនង កិច្ចសហប្រតិបត្តិការរវាងប្រទេស និងប្រជាពលរដ្ឋយើងទាំងពីរ កន្លងមក បច្ចុប្បន្ន និងទៅអនាគត ។
លោកបានអរគុណ រដ្ឋាភិបាលកាណាដា ក៏ដូចជា ប្រទេសជាមិត្តនានា ដែលតែងតែជួយដល់ប្រទេសកម្ពុជា និងប្រជាពលរដ្ឋខ្មែរ និងអរគុណ ដែលផ្តល់កិត្តិយស និងទទួលស្គាល់នូវគុណតម្លៃរបស់ខ្ញុំ ។
លោកបញ្ជាក់ថា៖« ខ្ញុំសូមអរគុណចំពោះប្រជាពលរដ្ឋខ្មែរ ដែលនៅតែគាំទ្រនូវជំហរខ្ញុំ អហិង្សា ការអត់ធ្មត់ ផ្សះផ្សាជាតិ មិនបង្កជម្លោះ មិនគុំកួនសងសឹក មិនយកខ្មែរជាសត្រូវ ជាពិសេស គុណតម្លៃសកលគឺសិទ្ធិមនុស្ស » ។
អតីតមេបក្សប្រឆាំងបានគូសបញ្ជាក់ថា«ខ្ញុំជឿជាក់ថា ដោយសារខ្ញុំប្រកាន់ខ្ជាប់នូវគោលជំហរនេះហើយ ដែលបងប្អូនជនរួមជាតិខ្មែរទាំងក្នុង និងក្រៅប្រទេសជាច្រើន រួមទាំងសហគមន៍អន្តរជាតិ ផ្តល់តម្លៃឲ្យខ្ញុំ ទោះបីខ្ញុំស្ថិតនៅកន្លែងណា បើទោះបីជាមានអ្នកខ្លះមិនគាំទ្រនូវជំហរនេះក៏ដោយ» ។
ចំណែក លោក មុត ចន្ទថា នាយកខុទ្ទកាល័យលោក កឹម សុខា បានលើកឡើងថា លោកស្រីភារធារី នឹងត្រូវបញ្ចប់បេសកកម្មការទូតនៅកម្ពុជា បានចូលជួបពិភាក្សា និងជម្រាបលាលោកប្រធាន កឹម សុខា ។
ក្នុងឱកាសនោះដែរ លោកស្រីបានវាយតម្លៃខ្ពស់ចំពោះទំនាក់ទំនង និងសហប្រតិបត្តិការល្អប្រកបដោយការយោគយល់ និងមិត្តភាព ក្នុងអំឡុងពេលនៃការបំពេញបេសកកម្មការទូតរបស់លោកស្រី នៅកម្ពុជា ។
លោកបន្តថា ភាគីទាំងពីរបានពិភាក្សាលើប្រធានបទមួយចំនួន ជាពិសេសបញ្ហាកូវីដ-១៩ ផលប៉ះពាល់លើបញ្ហាសង្គម និងសេដ្ឋកិច្ច និងផលវិបាកក្នុងដំណាក់ការក្រោយកូវីដ-១៩ ។ ក្រៅពីនេះ លោកស្រីភារធារីបានជម្រាបជូនលោកប្រធាន កឹម សុខា អំពីកិច្ចសហប្រតិបត្តិការល្អជាមួយកម្ពុជាលើវិស័យពាណិជ្ជកម្មដែលទំហំពាណិជ្ជកម្មរបស់ខ្លួន ស្ថិតក្នុងលំដាប់ទី៣ ឬទី៤ តាមឆ្នាំនីមួយៗ ហើយកាណាដាក៏បានសហការជាមួយអង្គការសង្គមស៊ីវិល ក្នុងការលើកកម្ពស់ដំណើរការប្រជាធិបតេយ្យ និងការគោរសិទ្ធិមនុស្ស ព្រមទាំងជួយដល់កិច្ចការបោសសំអាតមីននៅតំបន់អតីតសមរភូមិប្រយុទ្ធ ដើម្បីជួយឲ្យពលរដ្ឋខ្មែរអាចទទួលបាននូវដីកសិកម្ម ក្នុងការលើកកម្ពស់ជីវភាពរស់នៅ ។
លោកស្រីបញ្ជាក់ថា ប្រទេសកាណានឹងបន្តកិច្ចការទាំងនេះតទៅទៀត។ លោកបានបន្តថា ក្នុងជំនួបលោកប្រធាន កឹម សុខា តែងតែរក្សានូវទំនាក់ទំនង និងសហប្រតិបត្តិការល្អជាមួយសហគមន៍ការទូត ដើម្បីការពារ និងបម្រើផលប្រយោជន៍របសជាតិ និងប្រជាពលរដ្ឋខ្មែរទាំងមូល។ ឯកអគ្គរដ្ឋទូត-រាជទូត ទាំងក្នុងដំណែងនិងជិតបញ្ចប់បេសកម្មការទូតតែងតែជួបពិភាក្សាជាមួយលោក ក្នុងស្មារតីភាតរភាពនិងតម្លៃស្មើភាព៕
ចែករំលែកព័តមាននេះ