លោកមហាសេដ្ឋី ម៉ាក ឃ្យូបេន (Mark Cuban) ដែលស្ថិតក្នុងចំណោមសហគ្រិនដ៏ជោគជ័យជាងគេលើលោក និងមានទ្រព្យសម្បត្តិសរុបប្រមាណ ៤.១ប៊ីលានដុល្លារបានចែករំលែកនូវមេរៀនសំខាន់មួយដែលលោកបានរៀនសូត្រពីការធ្វើជាអាជីវករ ។ អាជីពរបស់លោកជួបប្រទះនូវបញ្ហា…
លោកមហាសេដ្ឋី ម៉ាក ឃ្យូបេន (Mark Cuban) ដែលស្ថិតក្នុងចំណោមសហគ្រិនដ៏ជោគជ័យជាងគេលើលោក និងមានទ្រព្យសម្បត្តិសរុបប្រមាណ ៤.១ប៊ីលានដុល្លារបានចែករំលែកនូវមេរៀនសំខាន់មួយដែលលោកបានរៀនសូត្រពីការធ្វើជាអាជីវករ ។
អាជីពរបស់លោកជួបប្រទះនូវបញ្ហា និងឧបសគ្គជាច្រើន។ ពេលដែលលោកមានអាយុខ្ទង់២០ឆ្នាំ លោកមិនមានលុយគ្រប់គ្រាន់សូម្បីតែសម្រាប់បើកគណនីធនាគារមួយ និងរស់នៅក្នុងអាផាតមិនជាមួយមិត្តរួមបន្ទប់ចំនួន ៥នាក់ទៀត ខណៈដែលយកឥដ្ឋ ឬកៅអីជំនួសគ្រែ។
ពេលដែលលោកបានចាប់ផ្តើមក្រុមហ៊ុនដំបូងរបស់លោកគឺ MicroSolutions ក្រុមហ៊ុននេះបានបាត់លុយអស់៨២,០០០ដុល្លារថែមទៀត។ លោកបានចែករំលែកថា លោកបានទុកលុយទាំងនោះក្នុងធនាគារដោយជឿជាក់ ប៉ុន្តែអ្នកទទួលភ្ញៀវរបស់លោកមិនបានផ្ញើលុយទៅធនាគារទេ តែផ្ញើទៅគណនីធនាគារផ្ទាល់ខ្លួនទៅវិញ។ ដូច្នេះក្នុងមួយថ្ងៃសោះ លោកបានបាត់បង់លុយអស់៨២,០០០ដុល្លារ។
លោកឃ្យូបេន បានព្យាយាមទៅទាមទារលុយពីធនាគារវិញដែរ ប៉ុន្តែធនាគារបានប្រាប់ថាវាយឺតពេលទៅហើយ ។ ទោះជាវាជាបទពិសោធន៍មិនល្អពិតមែនក្តី លោកគិតថា វាជារឿងដែលល្អបំផុតដែលបានកើតឡើងក្នុងជីវិតរបស់លោក ព្រោះបន្ទាប់ពីនោះមក លោកបានធ្វើឲ្យក្រុមហ៊ុនក្លាយជាក្រុមហ៊ុនតម្លៃ ៣០លានដុល្លារ។
នៅឆ្នាំ ១៩៩០ លោកបានលក់ MicroSolutions ឲ្យទៅក្រុមហ៊ុន CompuServe ក្នុងតម្លៃ៦លានដុល្លារដែលបានធ្វើឲ្យលោកក្លាយជាមហាសេដ្ឋីក្នុងអាយុ ៣២ឆ្នាំ។ ប៉ុន្មានឆ្នាំក្រោយមកលោកក៏បានចូលរួមចាប់ផ្តើមក្រុមហ៊ុនថ្មីមួយទៀតដែលឈ្មោះថា Audionet មុននឹងប្តូរឈ្មោះទៅ Broadcast.com ដែលត្រូវបានលក់ឲ្យទៅ Yahoo ក្នុងតម្លៃ៥.៧ប៊ីលានដុល្លារ។
លោកមហាសេដ្ឋីខាងលើធ្លាប់បាននិយាយកាលពីឆ្នាំ ២០១៧ ថា មនុស្សតែងតែមានការបរាជ័យ ហើយតែងតែមានរឿងក្នុងជីវិតដែលកើតមានឡើងដោយមិនអាចរំពឺងទុកមុនបានទោះជាអ្នកគិតថាអ្នកបានត្រៀមខ្លួនច្រើនប៉ុនណាក្តី។
ហើយនៅពេលដែលវាកើតមានឡើងពិតមែននោះ អ្នកត្រូវតែព្យាយាមពុះពារដើម្បីឆ្លងវាឲ្យផុត ហើយវាក្លាយជាអ្វីដែលធ្វើឲ្យអ្នកពិសេស និងជាអ្វីដែលធ្វើឲ្យអ្នកជឿជាក់លើខ្លួនឯងបន្ថែមទៀត ៕
ចែករំលែកព័តមាននេះ