រាជធានីភ្នំពេញ ៖ របរចិញ្ចឹមចៀមយកសាច់នៅក្នុងប្រទេសកម្ពុជាស្ដាប់មើលទៅវាហាក់ដូចជាប្លែក និងកម្ររមានដោយសារតែសត្វចៀមភាគច្រើនគេចិញ្ចឹមវានៅប្រទេសត្រជាក់ ក៏ប៉ុន្តែសម្រាប់សត្វនេះក៏មានចិញ្ចឹមនៅក្នុងប្រទេសកម្ពុជា និងមានភាពងាយស្រួលក្នុងការចិញ្ចឹម ព្រមទាំងអាចរកចំណូលបានច្រើនជាងការចិញ្ចឹមគោ និងជ្រូកផងដែរ ហើយចៀមក៏ជាសត្វដែលធន់នឹងជំងឺ និងអាកាសធាតុជាងសត្វដទៃទៀត…
រាជធានីភ្នំពេញ ៖ របរចិញ្ចឹមចៀមយកសាច់នៅក្នុងប្រទេសកម្ពុជាស្ដាប់មើលទៅវាហាក់ដូចជាប្លែក និងកម្ររមានដោយសារតែសត្វចៀមភាគច្រើនគេចិញ្ចឹមវានៅប្រទេសត្រជាក់ ក៏ប៉ុន្តែសម្រាប់សត្វនេះក៏មានចិញ្ចឹមនៅក្នុងប្រទេសកម្ពុជា និងមានភាពងាយស្រួលក្នុងការចិញ្ចឹម ព្រមទាំងអាចរកចំណូលបានច្រើនជាងការចិញ្ចឹមគោ និងជ្រូកផងដែរ ហើយចៀមក៏ជាសត្វដែលធន់នឹងជំងឺ និងអាកាសធាតុជាងសត្វដទៃទៀត ។
បើតាមលោក ប៊ុន ចាន់វីរៈ កសិករចិញ្ចឹមចៀមមួយរូបនៅស្រុកទឹកផុសខេត្តកំពង់ឆ្នាំងបានអោយដឹងថា លោកបានចាប់របរចិញ្ចឹមចៀមនេះអស់រយៈពេលប្រមាណ៣ឆ្នាំមកហើយ និងបានឃើញថា ការចិញ្ចឹមចៀមយកសាច់នៅកម្ពុជាឃើញថា ទទួលបានផលគួរជាទីពេញចិត្ត និងចំណេញជាងការចិញ្ចឹមគោយកសត្វ ដោយសារតែសត្វចៀមមានរយៈពេលខ្លីប៉ុណ្ណោះអាចទទួលផលបានហើយ និងមានតម្លៃថ្លៃជាងសត្វគោ និងសត្វជ្រូក ជាក់ស្ដែងសត្វចៀមរស់មួយគីឡូក្រាមអាចលក់បានក្នុងតម្លៃ៧ដុល្លារ ។
លោកបន្តថា ដើមទុនក្នុងការចិញ្ចឹមសត្វចៀមយកសត្វ គឺមានការចំណាយតិចជាងសត្វគោ ហើយក្នុងរយៈពេល២ឆ្នាំ សត្វចៀមអាចបង្កើតកូនបានពីរដង ហើយសម្រាប់កូនចៀមមួយៗ រយៈតែ៦ទៅ៨ខែ វាអាចអោយផលបានប្រមាណពី២៥ទៅ៣០គីឡូក្រាម សម្រាប់សត្វចៀមឈ្មោល និងអាចលក់ចេញបានហើយក្នុងទំងន់ប៉ុណ្ណោះ ដូច្នេះសត្វចៀមមួយក្បាលនេះ អាចលក់បានក្នុងតម្លៃជាង២០០ដុល្លារអាមេរិកក្នុងមួយក្បាល ។
ចំពោះសត្វចៀមញីវិញតាំងពីកើតមករហូតដល់អាយុ៧ ទៅ៨ខែ វារកឈ្មោះនឹងប្រើពេល៥ខែ វានឹងកើតកូនមួយទៀត ដូច្នេះសត្វចៀមញីតាំងពីកើតមកដល់អាយុ១ឆ្នាំ វានឹងអោយកូនចៀមបានមួយក្បាលទៀត ។លោកថា៖«តាំងពីលោកចាប់ផ្ដើមចិញ្ចឹមចៀមអស់រយៈពេល៣ឆ្នាំមកហើយ លោកមិនដែលចាក់វ៉ាក់សាំងការពារជំងឺទៅចៀមទេ តែវាក៏មិនដែលឈឺថ្កាត់ឬងាប់ដែរ ដូច្នេះទើបយើងសន្និដ្ឋានបានថាវាជាសត្វដែលធន់នឹងជំងឺ និងអាកាសធាតុផងដែរ » ។ លោកបន្ថែមថា សត្វចៀមដែលលោកចិញ្ចឹមនាពេលបច្ចុប្បន្ននេះ គឺវាស៊ីស្មៅជាអាហារ ហើយក៏មិនបានបន្ថែមអាហារអ្វីដល់ចៀមនេះដែរ ។ម្យ៉ាងទៀតដោយសារតែលោកជាអ្នកចំការនិងមានចំការដូងផងដែរនោះ សត្វចៀមក៏ជាកម្មករជំរះស្មៅដូងដ៏ល្អផងដែរ ព្រមទាំងដាក់ជីដល់ដំណាំដូងនិងដំណាំផ្សេងទៀតផងដែរ ។
កសិករ អាចសាកល្បងក្នុងការចិញ្ចឹមចៀមនៅក្នុងចំការដំណាំបាន ដើម្បីរកប្រាក់ចំណូលបន្ថែមពីភោគផលដំណាំ ទាំងនោះ ព្រោះថាចៀមវាមិនចេះស៊ីដំណាំផ្សេងនោះក្រៅពីស្មៅឡើយ ។ លោកបន្ថែមទៀតថា សម្រាប់ទីផ្សារសាច់ចៀមនាពេលបច្ចុប្បន្ន គឺមានតម្រូវការខ្លាំងណាស់ ហើយលោកមិនអាចផ្គត់ផ្គង់សាច់ចៀមទៅកាន់ទីផ្សារបានឡើយ ដោយបច្ចុប្បន្ននេះ លោកត្រៀមសត្វចៀមសម្រាប់តែអ្នកចង់ចិញ្ចឹមតែប៉ុណ្ណោះ តែក៏ផ្គត់ផ្គង់ទៅមិត្តភក្ដិស្គាល់គ្នាចង់ញ៉ាំសាច់ចៀមនៅពេលបុណ្យទានម្ដងៗដូចជាចូលឆ្នាំ និងភ្ជុំបិណ្ឌជាដើម សម្រាប់ដុតញ៉ាំជុំគ្នា ។
លោកថា៖« មានម្ចាស់ហាងនៅភ្នំពេញជាច្រើន បានទាក់ទងដើម្បីអោយផ្ដល់សាច់ចៀមអោយពួកគេមួយថ្ងៃមួយក្បាល តែយើងមិនទទួលយកសំណើរនោះទេ ព្រោះមិនមានសាច់ចៀមគ្រប់គ្រាន់សម្រាប់ផ្ដល់ជូន ជាក់ស្ដែងបើសិនជាហាង១០កន្លែងសុំមួយថ្ងៃមួយក្បាល យើងត្រូវការចិញ្ចឹមចៀមអោយបាន៤០០ក្បាលឯណោះ »។
យោងតាមប្រសាសន៍សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានជំរុញអោយកសិករងាកមកផលិតនូវអ្វីដែលអាចធ្វើបានដូចជាការដាំបន្លែ ចិញ្ចឹមសត្វជាដើមដើម្បីផ្គត់ផ្គង់ដល់សណ្ឋាគារ ភោជនីយដ្ឋាន ដោយកាត់បន្ថយនូវការនាំចូលពីប្រទេសខាងក្រៅ ហើយជំរុញការនាំចេញនឹងកន្លែង ៕
ចែករំលែកព័តមាននេះ