សម្តេចតេជោ ៖ គ្មានការផ្ទេរអំណាចទៅកាន់កូនទេ បើខ្លួនកំពុងកាន់អំណាច
- ភ្នំពេញ
រាជធានីភ្នំពេញ ៖ ជាថ្មីម្តងទៀត សម្តេចតេជោ ហ៊ុន សែន នាយករដ្ឋមន្ត្រីបញ្ជាក់ថា គ្មានការផ្ទេរអំណាចទៅលោក ហ៊ុន ម៉ាណែត…
រាជធានីភ្នំពេញ ៖ ជាថ្មីម្តងទៀត សម្តេចតេជោ ហ៊ុន សែន នាយករដ្ឋមន្ត្រីបញ្ជាក់ថា គ្មានការផ្ទេរអំណាចទៅលោក ហ៊ុន ម៉ាណែត ដែលជាកូនប្រុសច្បងនោះទេ បើសម្តេចកំពុងកាន់អំណាចនោះ ។
ការបញ្ជាក់របស់សម្តេចតេជោ ជាថ្មីនេះ បន្ទាប់ពីក្រុមប្រឆាំងតែងតែលើកឡើង ថានឹងមានការផ្ទេរអំណាចឲ្យលោក ហ៊ុន ម៉ាណែត ជាមិនខាន ។ យ៉ាងណាក្តីក្នុងពិធីចុះពិនិត្យការដ្ឋានសាងសង់អាកាសយានដ្ឋានអន្តរជាតិភ្នំពេញថ្មី ស្ថិតនៅក្នុងទឹកដីខេត្តកណ្តាល នាព្រឹកថ្ងៃទី២២ ខែមិថុនា ឆ្នាំ២០២០ សម្តេចតេជោ ហ៊ុនសែន បានបញ្ជាក់យ៉ាងដូច្នេះថា ៖«មួយថ្ងៃៗ គិតតែរវល់ថា មានផ្ទេរអំណាចឲ្យហ៊ុន ម៉ាណែត ខ្ញុំនៅតែមិនយល់ ចុះបើសព្វថ្ងៃឪវាកំពុងឈរធ្វើនាយករដ្ឋមន្ត្រីហើយ ប្រកាស១០ឆ្នាំៗទៀត តើកូនវាមកយកអំណាចពីឱវាឬ?
ខ្ញុំនិយាយនៅកម្ពុជាមិនមែនតែបេក្ខជន ហ៊ុន ម៉ាណែត មួយទេក្នុងគណបក្សប្រជាជន គឺមានបេក្ខជនច្រើនណាស់ ក៏ប៉ុន្តែក្នុងគណបក្សប្រជាជន ខ្ញុំគាំទ្រ អប់រំកូនខ្ញុំឲ្យមានសមត្ថភាព បើមិនបានឪវាក៏បាន៨០ ឬ៩០ភាគរយឪវាចុះ» ។
សម្តេចក៏បានលើកឡើងថា ការកាន់អំណាចស្ថិតលើការបោះឆ្នោតនោះទេ ដោយដំបូងបោះនៅជួរគណបក្សថា ទទួលយកបាន ឬអត់ ។ បន្ទាប់មកត្រូវឆ្លង កាត់ពីការបោះឆ្នោតពីប្រជាជន បើបក្សឈ្នះទើបមានលទ្ធភាព ។ សម្តេចក៏បានចំអកទៅកាន់ក្រុមប្រឆាំងថា មួយថ្ងៃៗមានតែប្រធានបទ «ផ្ទេរអំណាចឲ្យហ៊ុន ម៉ាណែត» អីញ្ចឹងប្រយ័ត្នរន្ទះបាញ់ បើនិយាយខុសរឿង ។
បើឪពុកវាកំពុងធ្វើ ជានាយករដ្ឋមន្ត្រី ហើយអាលូវនេះខ្ញុំនឹងប្រកាសហើយ៣ឆ្នាំ មុនខ្ញុំក៏បានប្រកាស មិនតិចជាង១០ឆ្នាំទៀត ហើយថ្ងៃនេះ ខ្ញុំប្រកាសថា មិន តិចជាង១០ឆ្នាំទៀត ។ សម្តេចក៏បានលើកឡើងពេលនេះ ហ៊ុន ម៉ាណែតជាង៤៣ឆ្នាំហើយ ១០ឆ្នាំទៀត អាយុ៥៣ឆ្នាំ ប៉ុន្តែឪវាធ្វើជានាយករដ្ឋមន្ត្រីតាំងពីអាយុ៣២ឆ្នាំមកម្ល៉េះ ។ អីញ្ចឹងរឿងអីហ៊ុន ម៉ា ណែត ធ្វើជានាយករដ្ឋមន្ត្រីមិនបាន ប៉ុន្តែរឿងនេះជារឿងក្មេងជំនាន់ក្រោយ ។
រឿងក្នុងគណបក្ស (ប្រសិនបើខ្ញុំនៅ) ហើយក្មេងជំនាន់ក្រោយ មិនមែនតែហ៊ុន ម៉ាណែត មិនមានតែលក្ខណៈសម្បត្តិនោះទេ គឺមានច្រើនណាស់ នៅក្នុងគណបក្សប្រជាជនកម្ពុជា ។ ពេលវេលានឹងផ្តល់ឲ្យអ្នកឯងបានឃើញ ។
សម្តេចក៏បានលើកឡើងថា អ្នកដែលនិយាយនោះគ្មានអ្វីធ្វើ ហើយបានរត់ចោលស្រុក ទៅក្រៅប្រទេសចេះតែនិយាយរហូតដល់ចោទប្រកាន់ថា សម្តេច ខកចិត្តមិនបានផ្ទេរអំណាច ទើបមិនចូលប្រជុំសភាកន្លងមក តែពាក្យនេះមិនពិតនោះទេ ។ សម្តេចក៏បានលើកជា សំណួរវិញថា តើអ្នកណាមានសមត្ថភាពកាន់អំណាចនាពេលបច្ចុប្បន្ននេះ ?
ក្នុងតួអង្គគណបក្សប្រជាជនកម្ពុជាគ្មានអ្នកណាចង់ធ្វើទេ មានតែក្រុមប្រឆាំង នោះទេ ដែលចង់ធ្វើជានាយករដ្ឋមន្ត្រីនោះ ។ ប៉ុន្តែប្រហែលជាតិក្រោយ បើនៅមានហ៊ុន សែន ។ សម្តេចបន្ថែមថា ថ្នាក់ដឹកនាំគណបក្សប្រជាជនកម្ពុជារៀបចំឡើង មិនមែនសម្រាប់តែមួយឆ្នាំ ឬ២ឆ្នាំនោះទេ គឺរៀបចំ៤០ ឬ៥០ឆ្នាំទៅមុខទៀតទើបអ្នកវិនិយោគទន់គេមកធ្វើវិនិយោគនៅកម្ពុជា។
ក្នុងឱកាសនោះដែរ សម្តេចក៏បានផ្តាំទៅក្រុមប្រឆាំងដែលបានឡើងថា សម្តេចនឹងអស់លុយបើកប្រាក់នោះ គឺជាមនុស្សតិរច្ឆាន ហើយជាមនុស្សមិនចេះគិតលេខផង ទោះបីជារៀនដល់ថ្នាក់បរិញ្ញាបត្រ បរិញ្ញាបត្រជាន់ខ្ពស់បណ្ឌិតក្តី ៕
ចែករំលែកព័តមាននេះ