រាជធានីភ្នំពេញ ៖ នៅរសៀលថ្ងៃសៅរ៍ទី២០ មិថុនា ស្អែកនេះ សង្វៀនប្រដាល់របស់ទូរទស្សន៍អាស៊ីអាគ្នេយ៍ នៅតែបន្តប្រកួតបិទទ្វារជាមួយវត្តមានកីឡាករកម្ពុជាដែលសុទ្ធតែក្មេងៗពោរពេញដោយសមត្ថភាពបង្ហាញខ្លួនដដែល ។ អ្វីដែលធ្វើឱ្យមានការចាប់អារម្មណ៍ក្នុងកម្មវិធីប្រដាល់នោះ គឺកីឡាករវ័យក្មេង២រូប…
រាជធានីភ្នំពេញ ៖ នៅរសៀលថ្ងៃសៅរ៍ទី២០ មិថុនា ស្អែកនេះ សង្វៀនប្រដាល់របស់ទូរទស្សន៍អាស៊ីអាគ្នេយ៍ នៅតែបន្តប្រកួតបិទទ្វារជាមួយវត្តមានកីឡាករកម្ពុជាដែលសុទ្ធតែក្មេងៗពោរពេញដោយសមត្ថភាពបង្ហាញខ្លួនដដែល ។ អ្វីដែលធ្វើឱ្យមានការចាប់អារម្មណ៍ក្នុងកម្មវិធីប្រដាល់នោះ គឺកីឡាករវ័យក្មេង២រូប បានក្លាយជាគូឯកដែលមិននឹកស្មានដល់ ខណៈកន្លងមកពួកគេមិនទទួលបានការចាប់អារម្មណ៍ប៉ុន្មានពីសំណាក់ទស្សនិកជនដែលនិយមទស្សនាកីឡាប្រដាល់ទាល់តែសោះ ។
កីឡាករ ឆូន បួន មកពីក្លិបកងទ័ពឆត្រយោង៩១១ និងកីឡាករ សេន កុសលមកពីក្លិបមោងប្ញស្សីខេត្តបាត់ដំបង នឹងត្រូវប៉ះគ្នាក្នុងនាមគូឯក ។ ក្នុងនោះកីឡាករ៤រូបផ្សេងទៀត ក៏ក្លាយជាគូពិសេសនៅលើសង្វៀននោះដែរ នោះគឺកីឡាករ សៅ វណ្ណា មកពីក្លិបវាលស្បូវច្បារអំពៅ ប៉ះជាមួយកីឡាករ ថៃ រ៉េតមកពីក្លិបកងទ័ពឆត្រយោង៩១១ និងកីឡាករ សឿម សារ៉ាន់ មកពីក្លិបព្រៃទទឹងខេត្តបាត់ដំបង ប៉ះជាមួយកីឡាករ រឿង សារិទ្ធ មកពីក្លិបមកុដរាជសីហ៍។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជាទាំង៦រូបដែលមានឈ្មោះឡើងប្រកួតមិត្តភាពក្នុងព្រឹត្តិការណ៍ប្រដាល់នោះ ឆូន បួន គឺជាកីឡាករជើងខ្លាំងទើបឡើងកូដម្នាក់ដែលលោករំពឹងខ្ពស់សម្រាប់ការប៉ះគ្នាក្នុងនាមគូឯក ដោយសារតែគេទើបផ្ដួលកីឡាករជើងខ្លាំងកម្ពុជាមួយចំនួន និងមានបំណងចង់ឱ្យកីឡាកររូបនេះ កាន់តែមានអ្នកចាប់អារម្មណ៍ពីសមត្ថភាពឈានឡើងដែលលោកសម្គាល់ឃើញកន្លងមកនោះផង ។
បើទោះជាគេត្រូវប្រឈមនឹងកីឡាករម្ខាងទៀត គឺសេន កុសល ដែលល្អ តែម្នាក់ៗនៅតែមានទំនុកចិត្តចំពោះសមត្ថភាពរបស់កីឡាករឆូន បួន ច្រើនជាង ។ លោកថា កីឡាករទាំងពីរ ពិតជាចង់ឈ្នះដាច់ខាត ខណៈដែលអ្នកណាឈ្នះក្រៅពីបានមុខមាត់ និងទឹកប្រាក់តម្លៃខ្លួនក្នុងនាមជាអ្នកឈ្នះខ្ពស់ជាងហើយក៏បានទទួលទំនុកចិត្តពីអ្នកគាំទ្រជាងមុនបន្ថែម ។
ប៉ុន្តែបើការប្រកួតនេះបែរជាចាញ់ព្រោះតែប្រកួតមិនបានល្អវិញ មិនខុសពីត្រូវបាក់មុខ និងរងការរិះគន់ពីអ្នកគាំទ្រនោះទេ ។ លោកជឿជាក់ថា កីឡាករកម្ពុជាគូនេះ នឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ហើយពិតជាបើកការប្រកួតមិនលាក់ដៃ ដើម្បីជៀសផុតពីការរិះគន់ណាមួយ ។ អ៊ីចឹងហើយទើបលោកយល់ថា ជំនួបរវាងជើងខ្លាំងជាមួយនឹងកីឡាករកំពុងឡើងសន្ទុះនេះ នឹងក្លាយជាដៃគូមិនធម្មតាសម្រាប់ការប្រកួតទាំងមូល ដោយសារតែភាគីខាងណាក៏មិនចង់បាក់មុខ។
ក្នុងចំណោមគូពិសេស២គូ គូពិសេសកីឡាករ សៅ វណ្ណា ក៏ត្រូវគណៈកម្មការរំពឹងថានឹងធ្វើឱ្យអ្នកគាំទ្រជក់ចិត្តផងដែរ បន្ទាប់ពីផ្គូផ្គងឱ្យប៉ះប្រកួតជាមួយកីឡាករ ថៃ រ៉េត ដែលជាជើងខ្លាំងម្នាក់ ។ លោកថា ការប្រកួតរបស់ពួកគេ នៅមិនទាន់ដឹងថាអ្នកណាល្អជាងអ្នកណានោះទេ ក្នុងពេលដែលកីឡាករម្ខាងៗនៅមិនទាន់មានក្រេឌីតដូចគ្នា តែខ្លាំង ដោយគ្រាន់តែពិបាកទុកចិត្តពីភាពខ្លាំង១០០ភាគរយ ដោយសារកីឡាករម្ខាងទៀតក៏មិនធម្មតា ។
លោកយល់ថា កីឡាករសៅ វណ្ណា ជាដៃគូខ្លាំងម្នាក់ តែគេក៏មិនទាន់ប្រាកដដូចគ្នាថានឹងទទួលបានជ័យជម្នះសម្រាប់ការប្រកួតនោះដែរ ដោយមានតែការចាំអ៊ុតមើលប៉ុណ្ណោះ ។ មួយគូទៀត ក៏មិនទាន់មានអ្នកទុកចិត្តថា អ្នកណានឹងឈ្នះនៅឡើយដែរដោយអ្នកគាំទ្រកំពុងតែរង់ចាំមើលការប្រកួតជាក់ស្ដែងដូចគ្នា ៕ (កែសម្រួលដោយ ៖បុប្ផា)
ចែករំលែកព័តមាននេះ