ខេត្តក្រចេះ ៖ ផ្ទះឈើមានចំនួន៤ខ្នងស្មើនិង១៣ដំបូល ដែលស្ថិតនៅក្បែរៗគ្នាក្នុងភូមិកែង ឃុំជ្រោយបន្ទាយ ស្រុកព្រែកប្រសព្វ ត្រូវបានអគ្គិភ័យឆាបឆេះខ្ទេចគ្មានសល់តែរយៈពេលជាង២ម៉ោងតែប៉ុណ្ណោះ ។
នគរបាលមូលដ្ឋានស្រុកសព្រែកប្រសព្វ បានកំណត់មូលហេតុជាជំហានដំបូងថា មហន្តរាយគ្រោះអគ្គិភ័យដែលបានកើតឡើង កាលពីយប់ថ្ងៃទី១៦ មិថុនា នេះ អាចផ្តើមចេញពីភ្លើងទៀន ដែលម្ចាស់ផ្ទះបង្កហេតុដំបូងគេពីរនាក់ប្តីប្រពន្ធ មានវ័យជរាបានដុតទុកចោលលើផ្ទះមិនប្រយ័ត្ន ។
អធិការនគរបាលស្រុកព្រែកប្រសព្វ លោកវរសេនីយ៍ឯក ចាន់ សុផល្លា បានឲ្យដឹងថា គ្រោះអគ្គីភ័យនេះមិនមានបង្កគ្រោះថ្នាក់ដល់អាយុជីវិតមនុស្សនោះទេ ដោយគ្រាន់តែមានផ្ទះឈើប្រកក្បឿង និងប្រក់ដែកចំនួន៤ខ្នងផ្ទះ ស្មើនិង១៣ដំបូល ត្រូវបានឆាបឆេះគ្មានសល់។ លោកថា មានទ្រព្យសម្បត្តិទំហំរាប់សិបម៉ឺនដុល្លាររបស់ម្ចាស់ផ្ទះទាំង៤ផ្ទះខាងលើ ត្រូវខាតបង់ក្នុងគ្រោះអគ្គិភ័យមួយនេះ។
នគរបាលបានប្រើប្រាស់រថយន្តសង្គ្រោះអគ្គិភ័យរបស់អធិការដ្ឋានចុះជួយបាញ់ពន្លត់ទប់ស្កាត់ដោយប្រើរយៈពេលជាង៣ម៉ោង ទើបគ្រប់គ្រង់គ្រោះអគ្គីភ័យដែលមានអណ្តាតភ្លើងឆាបឆេះយ៉ាងសន្ធោសន្ឋៅនេះបាន។
សូមរំលឹកថា បើតាមរបាយការណ៍ត្រីមាសទី១ដើមឆ្នាំ២០២០របស់ស្នងការដ្ឋាននគរបាលខេត្តក្រចេះបានឲ្យដឹងថា រយៈពេល៣ខែកន្លងទៅនេះ អត្រាគ្រោះអគ្គិភ័យដែល កើតមាននៅទូទាំងខេត្តក្រចេះមានចំនួន៧ករណី ក្នុងនោះបានបង្កឲ្យមានមនុស្សយ៉ាងហោចមនុស្ស យ៉ាងហោច៧នាក់ បានរងរបួសធ្ងន់និងស្រាល ក្នុងនោះក៏មានផ្ទះឈើជិត១០ខ្នងផ្ទះបានរងការឆាបឆេះ។
ចែករំលែកព័តមាននេះ