ខេត្តសៀមរាប ៖ ក្រុមមន្ត្រីនិងអ្នកក្រុងសៀមរាបនៅតែមន្ទិលសង្ស័យជុំវិញព័ត៌មាននៃការដកហូតទីតាំងភូមិគ្រឹះដាបឈួនម្ជុលពេជ្រ ពីក្រញ៉ាំដៃក្រុមហ៊ុន G&R មកទុកជាសម្បត្តិរដ្ឋវិញ ខណៈគេនៅតែឃើញទីតាំងនោះ នៅតែបន្តបិទទ្វារនិងមានការអះអាងថា ប្លង់សម្គាល់ទីតាំងដីដ៏ធំមហិមានោះ កំពុងត្រូវបានម្ចាស់ក្រុមហ៊ុនដាក់បញ្ចាំនៅក្នុងធនាគារនៅទ្បើយ ។
ខេត្តសៀមរាប ៖ ក្រុមមន្ត្រីនិងអ្នកក្រុងសៀមរាបនៅតែមន្ទិលសង្ស័យជុំវិញព័ត៌មាននៃការដកហូតទីតាំងភូមិគ្រឹះដាបឈួនម្ជុលពេជ្រ ពីក្រញ៉ាំដៃក្រុមហ៊ុន G&R មកទុកជាសម្បត្តិរដ្ឋវិញ ខណៈគេនៅតែឃើញទីតាំងនោះ នៅតែបន្តបិទទ្វារនិងមានការអះអាងថា ប្លង់សម្គាល់ទីតាំងដីដ៏ធំមហិមានោះ កំពុងត្រូវបានម្ចាស់ក្រុមហ៊ុនដាក់បញ្ចាំនៅក្នុងធនាគារនៅទ្បើយ ។
គួរបញ្ជាក់ថា ទីតាំងផ្ទះដាបឈួនម្ជុលពេជ្រជាអតីតស្តេចត្រាញ់ ដែលមានប្រវត្តិក្បត់ជាតិកាលពីសម័យសង្គមរាស្ត្រនិយម ស្ថិតនៅតាមបណ្តោយវិថីហ្សាលដឺហ្គោល (ផ្លូវទៅកាន់អង្គរវត្ត) ហើយត្រូវបានប្រែក្លាយជាមជ្ឈមណ្ឌលយុវជនខេត្ត ក្រោយពីថ្ងៃរំដោះ៧ មករា ឆ្នាំ១៩៧៩ ក្រោមការគ្រប់គ្រងរបស់មន្ទីរអប់រំយុវជននិងកីទ្បាខេត្ត ។ បុ៉ន្តែប៉ុន្មានឆ្នាំថ្មីៗនេះ ត្រូវបានលក់ទៅឱ្យក្រុមហ៊ុនជីអ៊ែនអ៊ G&R ជាក្រុមហ៊ុនសាងសង់បុរីរដ្ឋបាលខេត្តសៀមរាប ក៏ចម្រូងចម្រាសមួយកាលពីពេលកន្លងទៅ ក្រោមរូបភាពដោះដូរទីតាំងដូចអគារមន្ទីរអង្គភាពរដ្ឋទាំងអស់ នៅក្នុងខេត្តនេះដែរ ។ ក៏ប៉ុន្តែនៅក្នុងឆ្នាំ២០១៤ ត្រូវបានប្រមុខរាជរដ្ឋាភិបាល សម្រេចដកហូតទុកជាសម្បត្តិសាធារណៈវិញ បន្ទាប់ពីបានរកឃើញរបាយការណ៍បំភាន់នាយករដ្ឋមន្ត្រីថា ជាអគារចាស់ទ្រុឌទ្រោមមិនដំណើរការ ហើយមិនបានជម្រាបសម្តេចតេជោឱ្យច្បាស់ថា ទីតាំងនោះជាដីនិងអគារផ្ទះដាបឈួនម្ជុលពេជ្រទ្បើយ ។
ទាក់ទិនទៅនឹងបញ្ហានេះដែរ មន្ត្រីជាន់ខ្ពស់អាជ្ញាធរខេត្តសៀមរាបមួយរូប ដែលប្រាប់ក្នុងលក្ខខណ្ឌមិនបញ្ចេញឈ្មោះបានបង្ហើបថា រហូតមកទល់ពេលនេះ ក្រុមហ៊ុន G&R នៅមិនទាន់បានប្រគល់ប័ណ្ណកម្មសិទ្ធិ ទីតាំងដី ផ្ទះដាបឈួនម្ជុលពេជ្រ មកឱ្យអាជ្ញាធរខេត្ត តាមបទបញ្ជារបស់សម្តេចតេជោនាយករដ្ឋមន្ត្រី ហ៊ុន សែន នៅទ្បើយទេ ដោយម្ចាស់ក្រុមហ៊ុនបានសុំពន្យារពេល ព្រោះប្លង់ដីកំពុងជាប់តម្កល់សម្រាប់ធានាប្រាក់កម្ចីនៅធនាគារ ។ ជាមួយគ្នានេះដែរ អ្នកច្បាប់មួយរូបបានបញ្ជាក់ពីផ្លូវច្បាប់ថា ក្នុងករណីប្លង់សម្គាល់កម្មសិទ្ធិដីធ្លី នៅមិនទាន់កាត់ឬផ្ទេរទៅឱ្យម្ចាស់ផ្សេងនៅទ្បើយ គឺបានន័យថា ម្ចាស់ដើមដែលមានឈ្មោះក្នុងប័ណ្ណនៅតែមានសិទ្ធិចាត់ចែងកាន់កាប់ដីដោយស្របច្បាប់ដដែល ។
ទាក់ទិនទៅនឹងបញ្ហានេះដែរ នៅរសៀលថ្ងៃទី៧ ធ្នូ ប្រធានសមាគមមគ្គុទ្ទេសក៏ទេសចរណ៍សៀមរាប លោក ខៀវ ធី បានលើកទ្បើងថា លោកចង់ឱ្យទីតាំងផ្ទះដាបឈួនបានវិលទៅរកស្ថានភាពរស់រវើកដូចកាលដែលក្រុមយុវជនធ្វើសកម្មភាពសង្គមកាលពីមុនពេលគេលក់នោះទ្បើងវិញ ។ ចំណែកមន្ត្រីម្នាក់ទៀតបានសម្តែងនូវការព្រួយបារម្ភថា ករណីនេះបើចេះតែមានការពន្យារពេលនៃការប្រគល់ប័ណ្ណកម្មសិទ្ធិយ៉ាងដូច្នេះ នោះបទបញ្ជារបស់ប្រមុខរាជរដ្ឋាភិបាលអាចនឹងមានការប្រែប្រួលក៏ថាបាន ព្រោះគេដឹងថាម្ចាស់ក្រុមហ៊ុនសង់បុរីរដ្ឋបាលខេត្តខាងលើ គឺជាមនុស្សមានឥទ្ធិពល ដោយមានការទាក់ទងជាមួយនឹងមន្ត្រីថ្នាក់កំពូលៗ ។
យ៉ាងនេះក្តី មន្ត្រីដដែលបានដាក់មន្ទិលថា ការសុំពន្យារពេលរបស់ម្ចាស់ក្រុមហ៊ុន G&R ខាងលើអាចជាល្បិចមួយ ដើម្បីមានសិទ្ធិទទួលយកប្រាក់ថ្លៃជួលទីតាំងទំហំ៤៧ម៉ែត្រគុណ៤៧ម៉ែត្រ ទៅឱ្យក្រុមហ៊ុនមួយសង់អគារលក់វត្ថុអនុស្សាវរីយ៍ ដែលមានទឹកប្រាក់រាប់លានរៀល ជារៀងរាល់ខែ ដែលខ្លួនបានបន្តកិច្ចសន្យាពីក្រសួងអប់រំ ដែលមានសុពលភាពកិច្ចសន្យារហូតដល់ឆ្នាំ២០២៥ ទើបចប់ ។ អភិបាលរងខេត្ត លោក ប៊ុន ថាឫទ្ធិ និងជាអ្នកនាំពាក្យបានបញ្ជាក់សាជាថ្មីកាលពីព្រឹកថ្ងៃទី៣ ធ្នូ ថា គ្មានអ្នកណាអាចកែប្រែបទបញ្ជាសម្តេចតេជោបានទេ ។ រាជរដ្ឋាភិបាលបានសម្រេចធ្វើការដកហូតទីតាំងមជ្ឈមណ្ឌលយុវជន ដែលជាអតីតភូមិគ្រឹះដាបឈួនម្ជុលពេជ្រពីក្រុមហ៊ុន G&R រួចហើយ គ្រាន់តែមិនទាន់បានផ្ទេរប្លង់មកឱ្យខេត្តវិញតែប៉ុណ្ណោះ ។
ករណីនេះអាជ្ញាធរខេត្តបានទទួលការយល់ព្រមពីប្រមុខរាជរដ្ឋាភិបាលរួចហើយ ក្នុងការចេញប្លង់ដីមួយកន្លែងទំហំជាង២ហិកតានៅក្បែរអង្គរភ្យុងយូក្នុងបរិវេណបុរីវប្បធម៌និងសណ្ឋាគារ ដែលគ្រប់គ្រងដោយអាជ្ញាធរអប្សរា ទៅឱ្យក្រុមហ៊ុនជាថ្នូរនិងការដកត្រទ្បប់មកវិញនូវទីតាំងផ្ទះដាបឈួនខាងលើ ។ លោកបញ្ជាក់យ៉ាងដូច្នេះថា «យើងនឹងអាចទទួលបានកម្មសិទ្ធិគ្រប់គ្រងទីតាំងដីនោះ នៅពេលឆាប់ៗខាងមុខ ក្រោយពីទទួលបាន ស.ជ.ណ រួចពន្ធប្រថាប់ត្រាពីរាជរដ្ឋាភិបាល សម្រាប់បង្ហាញជំនាញសូរិយោដី ដើម្បីឱ្យគេផ្ទេរឈ្មោះមកឱ្យយើងវិញ» ។ ថ្វីបើយ៉ាងនេះក្តី លោកមិនបានបញ្ជាក់ឱ្យច្បាស់ថា ទីតាំងភូមិគ្រឹះអតីតស្តេចត្រាញ់ដាបឈួននោះ នឹងត្រូវយកទៅធ្វើអ្វីទេក្រោយពេលដកហូតមកវិញ គ្រាន់តែអះអាងថា ទុកសម្រាប់បម្រើដល់កិច្ចការសាធារណៈ ដូចជា សាលាមត្តេយ្យជាដើម ។
គួរកត់សម្គាល់ថា អគារបម្រើការរបស់អង្គភាពរដ្ឋយ៉ាងតិចចំនួន២៧ ដែលមានផ្ទៃដីសរុបប្រមាណជាង១០ហិកតា នៅកណ្តាលបេះដូងក្រុងសៀមរាប ត្រូវបានគេឃុបឃិតគ្នាធ្វើការផ្លាស់ប្តូរជាបន្តបន្ទាប់ ចាប់ពីអំទ្បុងឆ្នាំ២០១០ ក្នុងអាណត្តិលោក ស៊ូ ភិរិន្ទ ជាអតីតអភិបាលខេត្ត ដោយតម្រូវឱ្យទៅកាន់ទីតាំងថ្មីមួយមានឈ្មោះថា «បុរីរដ្ឋបាលប្រមូលផ្តុំ» ស្ថិតនៅចម្ងាយប្រមាណជាង២០គីទ្បូម៉ែត្រ ពីទីរួមខេត្តប៉ុន្តែពេលនេះគម្រោងបុរីនេះត្រូវបានបរាជ័យទាំងស្រុង ហើយក៏លើកត្រទ្បប់មកដាក់ក្នុងអគារបម្រើការអប្សរា ដែលនៅជិតក្រុងសៀមរាបវិញ ។
គម្រោងការដោះដូរមន្ទីរអង្គភាពរដ្ឋនេះ ត្រូវបានអ្នកវិភាគមួយចំនួនចាត់ទុកថា ជាយុត្តិសាស្ត្រចាក់អង្ករដូរយកអង្កាម ឬយកឆ្នាំងមាសដូរយកឆ្នាំងដី ដែលធ្វើឱ្យខាតបង់ថវិកាជាតិរាប់សិបលានដុល្លារអាមេរិក តែចំណេញយ៉ាងកប់ក្តោងទៅលើបុគ្គលដែលមានអំណាច និងមានជំនាញគួកជេដី ។ យ៉ាងនេះក្តី ក្រុមអ្នកវិភាគសង្គមបានអះអាងថា ផែនការដកហូតទីតាំងភូមិគ្រឹះលោកដាបឈួនត្រទ្បប់មកនៅក្រោមការគ្រប់គ្រងរបស់រដ្ឋវិញនោះ មិនបានធ្វើឱ្យក្រុមហ៊ុនដ៏មានឥទ្ធិពលខាងលើខាតបង់ទាំងស្រុងទេ ពោលគឺអាចចំណេញទ្វេដងក៏ថាបាន ព្រោះការដកហូតនោះមិនមែនរឹបអូសទទេៗឯណា គឺមានដីមួយកន្លែងដែលមានទំហំជាង២ហិកតា មានតម្លៃអាចរាប់លានដុល្លារនៅក្នុងបុរីវប្បធម៌សណ្ឋាគារជាថ្នូរដែរតើ ៕
ចែករំលែកព័តមាននេះ