ខេត្តព្រះសីហនុ ៖ បុរសម្នាក់បានបាត់បង់ជីវិតនៅនឹងកន្លែងកើតហេតុ ក្នុងគ្រោះថ្នាក់ចរាចរណ៍រវាងរថយន្តបុកជាមួយម៉ូតូកាលពីវេលាម៉ោង១០និង៤៥នាទីព្រឹកថ្ងៃទី១៦ ខែមិថុនា ឆ្នាំ២០២០ នៅចំណុចចន្លោះគីឡូម៉ែត្រលេខ១៣៩-១៤០ ស្ថិតក្នុងភូមិចំការហ្លួង ឃុំចំការហ្លួង ស្រុកកំពង់សីលា ខេត្តព្រះសីហនុ ។
ភាគីខាងរថយន្តមួយគ្រឿងម៉ាកឡិចស៊ីស៥៧០ ពណ៌ស ពាក់ស្លាកលេខ ភ្នុំពេញ 2BK-7877 បើកបរ ដោយឈ្មោះ ស៊ុន គឹមឆាយ ភេទប្រុស អាយុ២២ឆ្នាំ មានទីលំនៅ ផ្ទះលេខ៤២៥E0 ផ្ទះ១៩៨ សង្កាត់បឹងព្រលិត ខ័ណ្ឌ៧មករា រាជធានីភ្នំពេញ ។ ចំណែកភាគីខាងម៉ូតូមួយគ្រឿងធុនសង់កូរ៉េ ពណ៌ក្រហម គ្មានស្លាកលេខ បើកបរដោយឈ្មោះ ង៉ែត ហេង ភេទប្រុស អាយុ៥៦ឆ្នាំ ស្នាក់នៅភូមិឃុំកើតហេតុខាងលើ បានបាត់បង់ជីវិតនៅនឹងកន្លែង ។
តាមប្រភពព័ត៌មានបានឱ្យដឹងថា មុនពេលកើតហេតុ រថយន្តមួយគ្រឿងម៉ាកឡិចស៊ីស ៥៧០ មានទិសដៅពីខេត្តព្រះសីហនុ លុះមកដល់កន្លែងកើតហេតុខាងលើក៏បានបុកជាមួយម៉ូតូមួយគ្រឿងធុនសង់កូរ៉េដែលឆ្លងកាត់ផ្លូវ បណ្តាលអោយអ្នកបើកបរម៉ូតូបាត់បង់ជីវិតនៅនឹងកន្លែង ។
ក្រោយពេលកើតហេតុ សពជនរងគ្រោះត្រូវបានប្រគល់ទៅឱ្យក្រុមគ្រួសារដើម្បីយកទៅធ្វើបុណ្យតាមប្រពៃណី រីឯរថយន្ត និងម៉ូតូ ត្រូវបានកម្លាំងអាវុធហត្ថស្នាក់ការសន្តិសុខ៤០២ សហការជាមួយនិងកម្លាំងអធិការដ្ឋាននគរបាលស្រុកកំពង់សីលា នាំយកទៅរក្សាទុកនៅអធិការដ្ឋាននគរបាលស្រុកដើម្បីបន្តតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ