ប្រសិនបើអ្នកកំពុងតែព្រួយបារម្ភពីរឿងលុយក្នុងកំឡុងពេលដែលសេដ្ឋកិច្ចកំពុងប្រឈមមុខនឹងការផ្ទុះជំងឺកូវីដ ១៩ នោះអ្នកមិនមែនខុសគេតែម្នាក់ឯងទេ ។ ប្រាក់ចំណូលរបស់មនុស្សជាច្រើនត្រូវបានប៉ះពាល់ព្រោះតែជំងឺនេះ ហើយវាអាចនឹងបន្តទៅមុខទៀតក្នុងកំឡុងពេល ៦ខែទៅ ១ឆ្នាំខាងមុខ ។
លោក ប្រាយអេន ហ្វ្រាយ (Brian Fry) ដែលជាអ្នកជំនាញផ្នែករៀបចំផែនការហិរញ្ញវត្ថុ និងស្ថាបនិកក្រុមហ៊ុន Safe Landing Financial បានប្រាប់មកថា ទោះជាវាអាចបង្កនូវអារម្មណ៍ស្ត្រេសពេលដែលព្យាយាមគិតពីរឿងអាក្រក់ៗដែលអាចនឹងកើតឡើងពិតមែនក្តី វាមានសារៈសំខាន់ណាស់សម្រាប់រៀបចំផែនការសម្រាប់ថ្ងៃអនាគត ។
លោកបានផ្តល់យោបល់ឲ្យមនុស្សផ្តោតស្មារតីលើអ្វីដែលពួកគេអាចគ្រប់គ្រងបាន និងវិភាគស្ថានការអាក្រក់ៗដែលអាចនឹងកើតមានឡើង ហើយផលប៉ះពាល់របស់វាលើអ្នកផងដែរ ។ មិនថាអ្នកកំពុងតែព្រួយបារម្ភពីការងារ សុខភាពអ្នក ឬគ្រួសារ ឬសមត្ថភាពក្នុងការរកចំណូលឡើយ លោក ហ្វ្រាយ ផ្តល់យោបល់ឲ្យអនុវត្តតាមលំហាត់ខាងក្រោមនេះ ៖
១. សរសេរការព្រួយបារម្ភរបស់អ្នក
២. ព្យាយាមគិតពីស្ថានការអាក្រក់ៗដែលអាចនឹងកើតឡើង
៣. សរសេរពីផែនការដើម្បីឆ្លើយតបនឹងស្ថានការទាំងនោះ
ឧទាហរណ៍ដូចជាអ្នកមានការព្រួយបារម្ភរឿងការងារជាដើម អ្នកអាចគិតថាតើក្រុមហ៊ុនរបស់អ្នកមានផ្តល់ជាថវិកាសងជំនឿចិត្តពេលដែលល្មើសកុងត្រា ឬទេ? ហើយតើការបាត់បង់ការងារ និងប្រាក់ចំណូលនឹងប៉ះពាល់ដល់ស្ថានការហិរញ្ញវត្ថុរបស់អ្នកយ៉ាងដូចម្តេចខ្លះ?
លំហាត់ខាងលើនេះអាចជួយឲ្យអ្នកគិតឃើញនូវដំណោះស្រាយសំខាន់ៗដែលអ្នកអាចអនុវត្តប្រសិនបើអ្នកបាត់បង់ការងារពិតមែនដើម្បីអ្នកអាចក្រោកឈរវិញបានលឿន ។
ទោះជាការគិតពីរឿងទាំងនេះអាចបង្កជាអារម្មណ៍ស្ត្រេសខ្លាំងពិតមែនក្តី វាមានសារៈសំខាន់ណាស់នៅពេលដែលរឿងអាក្រក់ទាំងនោះពិតជាកើតមានឡើងពិតមែន ។ ប្រសិនបើអ្នកស្ថិតក្នុងស្ថានការនោះ អ្នកមានផែនការច្បាស់លាស់ដែលប្រាប់អ្នកពីអ្វីដែលអ្នកត្រូវធ្វើហើយ ៕
ចែករំលែកព័តមាននេះ