លោកខេវីន អូលារី (Kevin O’Leary) ដែលជាមហាសេដ្ឋី និងវិនិយោគិនប្រចាំកម្មវិធី Shark Tank នៅសហរដ្ឋអាមេរិកមិនដែលអៀនខ្មាសក្នុងការផ្តល់ដំបូន្មានផ្នែកអាជីវកម្មដល់អ្នកដទៃទេ។ ក្នុងពេលថ្មីៗនេះ លោកបានចាប់ផ្តើមកម្មវិធីអនឡាញមួយដែលមានឈ្មោះថា Got a Money Dispute? Ask Kevin និងបានជួយស្ត្រីម្នាក់ដែលឈ្មោះថាដេនីស (Denise) ដែលកំពុងឈ្លោះជាមួយក្រុមគ្រួសាររឿងមរតក។
ដេនីសកំពុងតែឈ្លោះជាមួយនឹងបងប្រុសថ្លៃរបស់ខ្លួនដណ្តើមរថយន្តសម្រាប់វាយកូនហ្គូលមួយរបស់ម្តាយក្មេក។ ដេនីសក៏ចង់ឲ្យទៅបងប្រុសថ្លៃដែរ តែដោយសារតែបងប្រុសថ្លៃរបស់ខ្លួនតែងតែស្អប់ និងចូលចិត្តនិយាយអាក្រក់ពីក្រៅខ្នងខ្លួន ដេនីសក៏មិនលែងដៃទៅ។
បងប្រុសថ្លៃរបស់ដេនីសចង់បានរថយន្តនោះព្រោះបាននិយាយថាលោកបានប្តូរថ្មសម្រាប់រថយន្តនោះ ទោះជាក្រុមគ្រួសារបងប្រុសថ្លៃម្នាក់នេះមានទ្រព្យសម្បត្តិស្តុកស្តម្ភរហូតអាចទិញរថយន្តទាំងនោះរាប់គ្រឿងពិតមែនក្តី។
លោកបាននិយាយថា «មិនមានអ្វីដែលស្ត្រេសជាងរឿងជម្លោះលុយទេ មិនថាឈ្លោះជាមួយដៃគូអាជីវកម្ម ឬសមាជិកក្នុងគ្រួសារឡើយ ហើយក្នុងពេលដ៏គួរឲ្យសោកស្តាយនេះ ស្ថានការគឺកាន់តែតានតឹងថែមទៀត។» លោកបានបន្តថា «អ្នកមិនចាំបាច់ស្ត្រេសទេ។ អ្នកត្រូវការដំណោះស្រាយ។»
លោកអូលារីបានវែកញែកថា «វាជារថយន្តសម្រាប់វាយកូនហ្គូលដែលត្រូវបានប្រើរួចមួយគ្រឿងដែលមានថ្មថ្មី។ តើវាមានតម្លៃប៉ុន្មានទៅ?ប្រសិនបើវាជារថយន្តវាយកូនហ្គូលយីហោ Rolls Royce នោះ វាប្រហែលជាថ្លៃប្រមាណតែ ២,៥០០ដុល្លារទេ។ ជាក់ស្តែងសម្រាប់រថយន្តមួយនេះថ្លៃតែ ៥០០ដុល្លារប៉ុណ្ណោះ។”
យោងតាមការវែកញែកនេះ លោកអូលារីសួរសំណួរសំខាន់មួយថា «តើវាពិតជាមានតម្លៃដល់ថ្នាក់ឈ្លោះដណ្តើមគ្នាទេ? ខ្ញុំមិនគិតថាវាមានតម្លៃទេ។ វាមិនមែនជាកូនក្មេងម្នាក់ឡើយ។ វាជារថយន្តសម្រាប់វាយកូនហ្គូលប៉ុណ្ណោះ!»
លោកអូលារីបានលើកឡើងនូវរូបភាពជាការដាស់តឿនដល់មនុស្សជាច្រើនដែលកំពុងចំណាយធនធាន និងកម្លាំងលើការឈ្លោះដណ្តើមរបស់ដែលគ្មានតម្លៃទាល់តែសោះព្រោះតែចង់ឈ្នះភាគីម្ខាងទៀត៕
ចែករំលែកព័តមាននេះ