ខេត្តកំពត ៖ បើតាមសេចក្តីរាយការណ៍បានឱ្យដឹងថា មានរថយន្តក្រឡុកស៊ីម៉ង់តិ៍មួយគ្រឿងបានបើកបុកស្ថានីយប្រេងឥន្ធនៈមួយកន្លែង បណ្តាលឱ្យរងការខូចខាតទាំងរថយន្ត និងស្ថានីយប្រេង ចំណែកអ្នកលក់ប្រេងសាំងក្នុងស្ថានីយវិញ គ្រាន់តែឃើញរថយន្តមកដល់ក៏ភ្លាម ម្នាក់ៗភ័យព្រលឹងចុងសក់នាំគ្នារត់ចែកផ្លូវគ្នា បង្កឱ្យមានការភ្ញាក់ផ្អើលកាលពីម៉ោង12និង50នាទីថ្ងៃត្រង់ ថ្ងៃទី14 ខែមិថុនា នៅជាប់ផ្លូវជាតិលេខ31 ចន្លោះគីឡូលេខ37 និង38 ត្រង់ចំណុចភូមិទូកមាស ឃុំទូកមាសខាងលិច ស្រុកបន្ទាយមាស ខេត្តកំពត។
បើតាមការឱ្យដឹងពីមន្ត្រីនគរបាលចរាចរណ៍ផ្លូវគោកស្រុកបន្ទាយមាស បានប្រាប់ឱ្យដឹងថា មុនពេលកើតហេតុ មានរថយន្តក្រឡុកដឹកស៊ីម៉ង់តិ៍មួយគ្រឿង បានបើកមកពីទិសខាងត្បូងទៅជើង លុះមកដល់ចំណុចផ្លូវកោង រថយន្តនោះក៏បើកបត់ចូលទៅផ្លូវបេតុងនៅទិសខាងលិច ស្រាប់តែមានម៉ូតូមួយគ្រឿងបើកមកពីជើង រួចបត់ទៅលិចស្របទិសជាមួយនឹងរថយន្តដែរ។ ស្របពេលឃើញម៉ូតូមកដល់នោះ រថយន្តដឹកស៊ីម៉ង់តិ៍បានបើកគេចពីម៉ូតូ ក៏ស្រាប់តែទៅបុកស្ថានីយប្រេងឥន្ធនៈនៅឆ្វេងដៃតែម្តង ធ្វើឱ្យអ្នកលក់ប្រេងសាំង គ្រាន់តែឃើញរថយន្តបើកចូលមកភ្លាម ក៏នាំគ្នារត់ចែកផ្លូវគ្នាព្រាតអស់។
នគរបាលចរាចរណ៍ស្រុកបន្ទាយមាសបានប្រាប់បន្តថា គ្រោះថ្នាក់ចរាចរណ៍ខាងលើនេះ គឺមិនបានបង្កឱ្យមាននរណាម្នាក់រងរបួសដោយសារតែរថយន្តដឹកស៊ីម៉ង់នោះទេ គ្រាន់តែធ្វើឱ្យអ្នកលក់ប្រេងសាំងភ័យព្រលឹងចុងសក់ ហើយនាំគ្នារត់ចែកផ្លូវគ្នាតែប៉ុណ្ណោះ។
នគបាលបាននិយាយបន្តថា តាមការពិនិត្យឃើញជាក់ស្ដែងនៅកន្លែងកើតហេតុ គឺរថយន្តដឹកស៊ីម៉ត់តិ៍រងការខូចខាត ចំណែកឯស្ថានីយប្រេងក៏រងការខូចខាតទាំងស្រុងដែរ ប៉ុន្តែចាត់ទុកថា សំណាងហើយ ដែលអត់មានអ្នករងរបួសរហូតដល់បាត់បង់ជីវិត និងឆេះស្ថានីយប្រេង។
ក្រោយពេលកើតហេតុ ទាំងនគរបាល ទាំងអ្នកឃើញហេតុការណ៍បាននិយាយថា រថយន្តពិតជាបើកមានល្បឿនលឿនណាស់ លុះមកដល់ផ្លូវកោង ហើយបត់ចេញពីផ្លូវជាតិទៅចូលផ្លូវបេតុង ទើបមានគ្រោះថ្នាក់បែបនេះ មូលហេតុប្រហែលជាអ្នកបើកបរខ្វះការប្រុងប្រយ័ត្ន។ (កែសម្រួលដោយ ៖ បុប្ផា)
ចែករំលែកព័តមាននេះ