រាជធានីភ្នំពេញ ៖ សហគ្រិនជោគជ័យមួយរួបខាងផ្នែកឱសថបានលើកឡើងថា មនុស្សភាគច្រើននិយមចូលចិត្តរកស៊ីតាមគ្នា ដោយគ្មានផែនការច្បាស់លាស់ ដោយខ្លះឃើញគេលក់ដីដាច់បានលុយក៏ចង់ទៅរកស៊ីដី ខណៈអ្នកខ្លះឃើញគេបើកហាងគុយទាវលក់ដាច់មានអតិថិជនច្រើនក៏ទៅបើកតាមគេ ។ ការរកស៊ីតាមគ្នាដោយគ្មានគម្រោងច្បាស់លាស់នោះមុខជំនួញច្រើនតែបរាជ័យ ។…
រាជធានីភ្នំពេញ ៖ សហគ្រិនជោគជ័យមួយរួបខាងផ្នែកឱសថបានលើកឡើងថា មនុស្សភាគច្រើននិយមចូលចិត្តរកស៊ីតាមគ្នា ដោយគ្មានផែនការច្បាស់លាស់ ដោយខ្លះឃើញគេលក់ដីដាច់បានលុយក៏ចង់ទៅរកស៊ីដី ខណៈអ្នកខ្លះឃើញគេបើកហាងគុយទាវលក់ដាច់មានអតិថិជនច្រើនក៏ទៅបើកតាមគេ ។ ការរកស៊ីតាមគ្នាដោយគ្មានគម្រោងច្បាស់លាស់នោះមុខជំនួញច្រើនតែបរាជ័យ ។
លោកឧកញ៉ាឱសថបណ្ឌិត ហៃ លីអ៊ាង ស្ថាបនិកក្រុមហ៊ុនឱសថ PPM និងក្រុមហ៊ុនផលិតផលសរីរាង្គ Confirel និងជាសហគ្រិនខ្មែរដ៏ឆ្នើមមួយរូបនៅកម្ពុជាខាងផ្នែកផលិតផលចំណីអាហាររហូតដល់ថ្នាំពេទ្យថា ប្រាប់សហការីសារព័ត៌មានកោះសន្តិភាពថា «ដើម្បីកុំឲ្យមុខជំនួញបរាជ័យ គឺវាតែងតែមាននូវគន្លឹះរបស់វា ។ ប៉ុន្តែដើម្បីកុំឲ្យបរាជ័យ គឺទី ១- គឺថា ធ្វើអ្វីមួយគឺត្រូវតែមានគម្រោងថា យើងចង់បានអី កុំឲ្យយើងធ្វើដូចគេ ។ ភាគច្រើនបរាជ័យនៃមុខជំនួញដោយសារតែបងប្អូនយើងភាគច្រើន ចង់ធ្វើដូចគេ ។ តែយើងមិនដឹងថា ហេតុអ្វីបានជាគេធ្វើអញ្ចឹង តែបែរជាយើងខ្លួនឯងចង់ធ្វើដូចគេ ។
ជាទូទៅកាលណា យើងមិនដឹងថាគេចង់ធ្វើអី យើងមិនអាចធ្វើដូចគេបានទេ អញ្ចឹងយើងធ្វើបានដូចគេតែមួយភាគប៉ុណ្ណោះ អញ្ចឹងបើធ្វើបានតែមួយភាគ គឺយើងបរាជ័យហើយ ពីព្រោះអតិថិជនគាត់ជ្រើសរើសតែអ្នកណាផលិតផលណាដែលគេស្គាល់ច្រើនជាងគេ» ។
លោកឧកញ៉ាឱសថបណ្ឌិត ហៃ លីអ៊ាង បានបញ្ជាក់ថា «អញ្ចឹងការបរាជ័យ គឺច្រើនតែការធ្វើតាមគេអត់មានគម្រោងអីច្បាស់លាស់ ។ ឧទាហរណ៍ ដូចជា សព្វថ្ងៃនេះ យើងកំពុងតែផ្អើលនាំគ្នាទិញដីដោយឃើញគេទិញដីលក់បានលុយច្រើន អញ្ចឹងយើងធ្វើតាមគេ ប៉ុន្តែយើងអត់បានឃើញអ្នកដែលខាត (ដោយសារតែទិញដីទេ) អញ្ចឹងជួនកាលយើងទិញទៅ វាអាចខុសដែរ ព្រោះរកស៊ីវាតែងតែមានចំនេញ មានខាត នេះជាឧទាហរណ៍ជាក់ស្តែង ។ ក៏ប៉ុន្តែបើគេមានគម្រោងថា ទិញដីទៅ គេធ្វើបូរី ហើយចំណាយអស់ប៉ុណ្ណេះ ហើយគេអាចចំនេញបានប៉ុណ្ណាភាគ អញ្ចឹងគេមិនអាចខាតទេ» ។
លោកឧកញ៉ាបានមានប្រសាសន៍បន្តថា «អញ្ចឹងចង់ប្រកបរបរអ្វីក៏ដោយ គឺត្រូវតែមានគម្រោង ។ ទី២ គឺថានៅពេលមានគម្រោងនោះទៀតហើយ គឺត្រូវមើលលើលទ្ធភាពដែលយើងមាន (ទុន) ដោយការការគូសវាស់វេលាកាត់ជាកង់ៗឲ្យបានច្បាស់លាស់ ។ ឧទាហរណ័ជណ្តើរកម្ពស់ ១០ ម៉ែត្រ យើងមិនអាចឡើងដល់ទៅ ១០ ម៉ែត្រភ្លាមៗទេ អញ្ចឹងដើម្បីឡើងបាន ១០ ម៉ែត្រទាល់តែយើងយក ១០ ម៉ែត្រនោះយកទៅកាត់ជា ២០ កង់អីអញ្ចឹងទៅ ឬ ក៏ ៣០ កង់អីអញ្ចឹងទៅ ។
ដូច្នេះ ទោះបីជាជាយើងមិនទាន់ឡើងបានភ្លាម ១០ ម៉ែត្រក្នុងថ្ងៃនេះ ក៏យើងបានឡើងបាន ៣ ម៉ែត្រអីអញ្ចឹងទៅ ដូច្នេះបន្តិចម្តងៗយើងនឹងឡើងទៅដល់កំពស់ ១០ ម៉ែត្រនោះ ។ ជាទូទៅបើយើងចង់បោះមួយជំហានឡើងឲ្យបាន ១០ ម៉ែត្រភ្លាម គឺយើងច្បាស់ជាដួលហើយ» ៕
ចែករំលែកព័តមាននេះ