រាជធានីភ្នំពេញ ៖ ការរកលុយតាមរយៈការបង្កើតនូវអាជីវកម្មផ្សេងៗ ឬក៏វិនិយោគទៅលើវិស័យអ្វីមួយ គឺជៀសមិនផុតពីហានិភ័យផ្សេងៗដែលអាចកើតមាន ដែលកត្តាខ្លះបង្កឡើងដោយមនុស្ស កត្តាខ្លះដោយធម្មជាតិ ហើយកត្តាផ្សេងទៀតគឺកើតឡើងដោយពុំមានព្រាងទុក ដូចជាកំពុងតែក្រឡុកពិភពលោក រួមទាំងកម្ពុជាផងនោះ…
រាជធានីភ្នំពេញ ៖ ការរកលុយតាមរយៈការបង្កើតនូវអាជីវកម្មផ្សេងៗ ឬក៏វិនិយោគទៅលើវិស័យអ្វីមួយ គឺជៀសមិនផុតពីហានិភ័យផ្សេងៗដែលអាចកើតមាន ដែលកត្តាខ្លះបង្កឡើងដោយមនុស្ស កត្តាខ្លះដោយធម្មជាតិ ហើយកត្តាផ្សេងទៀតគឺកើតឡើងដោយពុំមានព្រាងទុក ដូចជាកំពុងតែក្រឡុកពិភពលោក រួមទាំងកម្ពុជាផងនោះ គឺវិបត្តិជំងឺកូវីដ ១៩ ដែលកំពុងធ្វើឲ្យមនុស្សជាច្រើនបាត់បង់ការងារធ្វើ វិស័យសំខាន់ទ្រទ្រង់សេដ្ឋកិច្ចជាតិកម្ពុជាក៏កំពុងក្រពុលមុខផងដែរ ។
ជាថ្មីម្តងទៀតអ្នកជំនាញខាងសេដ្ឋកិច្ចនៅកម្ពុជាមួយរូបបានបង្ហាញនូវយុទ្ធសាស្ត្រសំខាន់ៗចំនួន ៣ ក្នុងនោះមាន « ទប់ទល់ ពង្រឹង និងពង្រីក » សំរាប់អាជីវកម្ម និងការវិនិយោគក្នុងដំណាក់កាលមានវិបត្តិ ។
តើយុទ្ធសាស្ត្រទាំង៣នោះមានអត្ថន័យយ៉ាងណា ? បើតាមលោក ង៉ែត ជូ ទីប្រឹក្សាសេដ្ឋកិច្ចលេចធ្លោមួយរូបនៅកម្ពុជាបានពន្យល់យ៉ាងដូច្នេះថា៖
១) – យុទ្ធសាស្ត្រទប់ទល់ដើម្បីបន្តនិរន្តរភាព (Survival strategy) ៖ សំរាប់ម្ចាស់អាជីវកម្ម ឬអ្នកវិនិយោគដែលមិនបានត្រៀមខ្លួនសំរាប់ប្រឈមនឹងហានិភ័យនៅគ្រាដែលមានវិបត្តិដូចពេលបច្ចុប្បន្ន ត្រូវធ្វើយ៉ាងណាខិតខំគ្រប់គ្រងចរន្តសាច់ប្រាក់អោយបានល្អ។ ក្នុងករណីដែលចំណូលធ្លាក់ចុះខ្លាំង ត្រូវព្យាយាមកាត់បន្ថយចំណាយ និងពន្យាការសងបំណុលនានាដូចជាតាមរយៈចរចាជាមួយម្ចាស់អាគារដែលអ្នកជួលធ្វើអាជីវកម្ម និងធនាគារដែលអ្នកជំពាក់។ល។
បន្ថែមលើនេះត្រូវពិចារណាថាតើនៅមានទ្រព្យសម្បត្តិអ្វីខ្លះដែលអ្នកអាចនឹងលក់ ហើយមិត្តភក្រ័សាច់ញាតិណាដែលអ្នកអាចខ្ចីប្រាក់ដើម្បីយកមកស្រោចស្រង់អាជីវកម្មរបស់អ្នកបាន។ ឧទាហរណ៍ មហាសេដ្ឋីជនអង់គ្លេស លោក រីឆាតប្រេនសុនបានប្រកាសលក់កោះផ្ទាល់ខ្លួនដើម្បីយកប្រាក់ស្រោចស្រង់អាជីវកម្ម។
២) – យុទ្ធសាស្ត្រពង្រឹងកម្លាំងត្រៀមទន្ទ្រានពង្រីកទីផ្សារ និងចាប់ឱកាសថ្មីៗ (Preparation for market penetration and new opportunities) ៖ ក្នុងខណៈដែលអាជីវកម្ម ឬការវិនិយោគរបស់អ្នកដំណើការធម្មតា ឬជួបបញ្ហាខ្លះៗក្តី ប៉ុន្តែអ្នកបានត្រៀមខ្លួនរួចរាល់សំរាប់ប្រឈមនឹងហានិភ័យនាពេលមានវិបត្តិ អ្នកគប្បីវិនិយោគលើការពង្រឹងសម្ថភាពផ្ទៃក្នុងដូចជាបំពាក់បច្ចេកវិទ្យា (ក្នុងការគ្រប់គ្រងសន្និធិ ការលក់ បុគ្គលិក) ការអភិវឌ្ឍធនធានមនុស្ស ការពង្រឹងសមត្ថភាពទទួលបានហិរញ្ញប្បទានដើម្បីត្រៀមទន្ទ្រានទីផ្សារ និងចាប់យកឱកាសថ្មីៗនៅពេលវិបត្តិចាប់ផ្តើមធូរស្រាល និងសេដ្ឋកិច្ចចាប់ផ្តើមដំណើការល្អឡើងវិញ។
៣) – យុទ្ធសាស្ត្រវាយលុកពង្រីកទីផ្សារ ឬចាប់យកឱកាសថ្មីៗ (Market penetration and investing in new opportunities) ៖ ក្នុងខណៈដែលអាជីវកម្ម ឬការវិនិយោគដំណើការធម្មតា អ្នកមានប្រព័ន្ធគ្រប់គ្រងផ្ទៃក្នុងរឹងមាំ មានធនធានមនុស្សគ្រប់គ្រាន់ និងមានសមត្ថភាពផ្នែកហិរញ្ញវត្ថុខ្ពស់ នោះជាឱកាសវាយលុក ដើម្បីទន្ទ្រានពង្រីកទីផ្សារ និងចាប់យកឱកាសថ្មីៗ។ នេះជាឱកាសដ៏ល្អបំផុតសំរាប់ពង្រីកអាជីវកម្ម និងទំហំផលបត្រ័វិនិយោគប្រកបដោយគុណភាព។
យ៉ាងណាមិញ តើលោកអ្នកជាម្ចាស់អាជីវកម្មយល់យ៉ាងណាដែរថា តើលោកអ្នកអាចនឹងជម្នះលើវិបត្តិនេះឬយ៉ាងណា ?
ចែករំលែកព័តមាននេះ