ខេត្តពោធិ៍សាត់ ៖ នៅពេលនិយាយពីវិស័យទេសចរណ៍របស់ខេត្តពោធិ៍សាត់ លោក ម៉ៅ ធនិន អភិបាលខេត្តពោធិ៍សាត់ មិនភ្លេចនិយាយដល់ឃុំអូរសោម របស់ស្រុកវាលវែងនោះឡើយ ។…
ខេត្តពោធិ៍សាត់ ៖ នៅពេលនិយាយពីវិស័យទេសចរណ៍របស់ខេត្តពោធិ៍សាត់ លោក ម៉ៅ ធនិន អភិបាលខេត្តពោធិ៍សាត់ មិនភ្លេចនិយាយដល់ឃុំអូរសោម របស់ស្រុកវាលវែងនោះឡើយ ។ លោកបានអះអាងថាអូរសោមជាតំបន់ទេសចរណ៍ធម្មជាតិ ដែលមានអាកាសធាតុក្រជាក់ មិនខុសពីខេត្តមណ្ឌលគិរីនោះឡើយ ។
នៅមានរឿងមួយទៀត ដែលយើងអាចនិយាយថាជារឿងចម្លែក ឬករណីពិសេសក៍ថាបាន នោះគឺថា ប្រជាពលរដ្ឋនៅអូរសោមដែលភាពច្រើនជាជនជាតិដើមភាគតិច ក្នុងមួយឆ្នាំរយៈពេលបីខែគឺពួកគាត់មិនទទួលទានទឹកធម្មតាទេ ពួកគាត់ទទួលទានទឹកសន្សើមជំនួសទឹកធម្មតាវិញ។
លោក ម៉ៅ ធនិន ថាចន្លោះពីខែវិច្ឆិកា ដល់ខែមករា ជាពេលវេលាដែលពលរដ្ឋនៅទីនោះទទួលទានទឹកសន្សើម ហើយការទទួនទានសន្សើមលាយនឹងគ្រាប់ក្រវាញ បានធ្វើឲ្យពលរដ្ឋនៅទីនោះមានអាយុវែង គឺមានអ្នកខ្លះអាយុជាង១០០ឆ្នាំឯណោះ។
លោកអភិបាលខេត្តបានពោលបញ្ជាក់ថា «ពលរដ្ឋនៅអូរសោម ថាគ្រាប់ឬផ្លែក្រវាញជាថ្នាំព្យាបាលជំងឺ ១០០ មុខ»។ លោកបានបន្តថា ពលរដ្ឋបានយកគ្រាប់ក្រវាញធ្វើម្ហូប មកស្ងោរជាមួយសាច់ និងបន្លែទទួលទាន។ ក្រវាញជារុក្ខជាតិមួយប្រភេទ ដែលរាប់បញ្ចូលថាជាប្រភេទប្រទាលដែលច្រើនដុះនៅតាមតំបន់ភ្នំ ពិសេសនៅពោធិ៍សាត់និងបាត់ដំបងនោះតែម្តង។
លោក ម៉ៅ ធនិន និយាយដូច្នេះថា «ប្រជាពលរដ្ឋលោកយកគ្រាប់ក្រវាញមកធ្វើម្ហូបទទួលទាន។ យកគ្រាប់ក្រវាញមកស្ងោរ ជាមួយសាច់ និងបន្លែទទួលទាន។ ទទួលទានក្រវាញនិងទឹកសន្សើមបានធ្វើឲ្យពួកគាត់មានព្រះជន្មវែងណាស់ ខ្លះដល់១០០ឆ្នាំឯណោះ»។
នៅក្នុងសន្និសីទកាសែតមួយ និយាយពីវឌ្ឍនភាពរបស់ខេត្តពោធិ៍សាត់ កាលពីពេលថ្មីនេះ នៅភ្នំពេញ លោកអភិបាលខេត្តថា មានសក្តានុពលទេសចរណ៍ ៣៤កន្លែងតំបន់។ ខេត្តបានចែកតំបន់ទេសចរណ៍ទាំងនោះជាបីផ្នែក ដាច់ពីគ្នា គឺតំបន់ទឹកទន្លេសាប តំបន់ជាយៗក្រុង និងទីប្រជុំជន និងតំបន់ភ្នំ។
អូរសោមដែលជាតំបន់ភ្នំពេញ ជាអេកូទេចរណ៍ ដែលពីមុនពិបាកធ្វើដំណើរទៅដល់ពេលនេះ គេអាចទៅដល់ទីនោះ តាមផ្លូវ៥៥ ដែលទើបសម្ពោធនៅក្នុងឆ្នាំ២០២០នេះ។ ផ្លូវ៥៥ មានសណ្ឋានដូចជាសត្វសពស់ បត់ចុះបត់ឡើង ឡើងចុះភ្នំនោះ កំពុងក្លាយជាចំនុចទេចរណ៍ដ៍ទាក់ទាញមួយរបស់ខេត្តពោធិ៍សាត់ដែរ៕
ចែករំលែកព័តមាននេះ