ខេត្តកំពង់ស្ពឺ ៖ លំនៅឋានប្រមាណ៣៧០ខ្នង បានរងគ្រោះដោយខ្យល់កន្ត្រាក់ខណៈមានភ្លៀងធ្លាក់កាលពីព្រលប់ថ្ងៃទី៥ ខែមិថុនាកន្លងទៅ នៅឃុំសំបូរ ស្រុកសំរោងទង ដែលខ្លះប៉ើងដំបូល និងខ្លះទៀតដួលរលំរាបដល់ដី ។…
ខេត្តកំពង់ស្ពឺ ៖ លំនៅឋានប្រមាណ៣៧០ខ្នង បានរងគ្រោះដោយខ្យល់កន្ត្រាក់ខណៈមានភ្លៀងធ្លាក់កាលពីព្រលប់ថ្ងៃទី៥ ខែមិថុនាកន្លងទៅ នៅឃុំសំបូរ ស្រុកសំរោងទង ដែលខ្លះប៉ើងដំបូល និងខ្លះទៀតដួលរលំរាបដល់ដី ។ ជាពិសេសដំបូល និងជញ្ជាំងដែកសង្កសី ត្រូវខ្យល់បក់ប៉ើងរាយប៉ាយក្លាយជាមហន្តរាយធំមួយ ។
យោងតាមរបាយការណ៍របស់រដ្ឋបាលស្រុកសំរោងទងឲ្យដឹងថា នេះគឺជាលើកដំបូងនៅដើមរដូវវស្សានេះ ដែលនៅឃុំសំបូរបានជួបប្រទះនូវគ្រោះធម្មជាតិ ដ៏អាក្រក់មិនធ្លាប់មាន ។ ការរងគ្រោះខូចខាតផ្ទះសម្បែង បានកើតមានទាំង១៨ភូមិតែម្តង ដូចឃុំសំបូរនៅចំមុខខ្យល់ព្យុះកំណាចនេះ ។ តែយ៉ាងណាក៏ដោយមិនមានគ្រោះថ្នាក់ដល់មនុស្សណាម្នាក់ទេ ។
បើតាមអ្នកភូមិនិយាយថា មុនពេលកើតហេតុគឺមេឃស្រទំ ហើយមួយសន្ទុះក្រោយមក ស្រាប់តែប្រែក្លាយជាខ្មៅខ្លាំង រួចហើយធ្លាក់ភ្លៀងតំណក់ទឹកធំៗ លាយឡំដោយខ្យល់កន្ត្រាក់ផងបណ្តាលឲ្យផ្ទះខ្លះប៉ើងដំបូល ផ្ទះខ្លះទៀតដួលរលំបាក់បែកខ្ទេចខ្ទី តែមិនមានគ្រោះថ្នាក់ដល់ជីវិតមនុស្សឬសត្វទេ ។
បន្ទាប់ពីស្ងប់ស្ងាត់ អាជ្ញាធរមូលដ្ឋានបានរាយការណ៍ទៅថ្នាក់លើ ដើម្បីចុះសួរសុខទុក្ខ និងពិនិត្យមើលទំហំនៃការខូចខាត និងបាត់បង់ ងាយស្រួលផ្តល់ព័ត៌មានទៅថ្នាក់លើទៀត ដែលសរុបបណ្ដោះអាសន្ន មានប្រមាណ៣៧០ខ្នងផ្ទះទាំងតូចទាំងធំ ៕ (ដកស្រង់ចេញពីវេបសាយ ៖ បុប្ផា)
ចែករំលែកព័តមាននេះ