រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា នារីវ័យក្មេងម្នាក់ក្នុងស្ថានភាពស្រវឹងជោកជាំបានរត់ចូលការដ្ឋានសំណង់មួយកន្លែងរួចប្រាប់ថា មានគេដឹកនាងទៅដេកផ្ទះសំណាក់ តែត្រូវនាងរត់ចុះពីលើម៉ូតូស្រែកឆោឡោឲ្យគេឯងជួយ បង្កឲ្យមានការភ្ញាក់ផ្អើលកាលពីម៉ោង11និង40នាទីយប់ ថ្ងៃទី6 ខែមិថុនា ឆ្នាំ2020 នៅត្រង់ចំណុចការដ្ឋានសំណង់មួយកន្លែង តាមបណ្ដោយផ្លូវបេតុង ស្ថិតក្នុងភូមិព្រៃទា2 សង្កាត់ចោមចៅ 3 ខណ្ឌពោធិ៍សែនជ័យ ។
សេចក្តីរាយការណ៍បន្តថា នារីរូបស្រស់វ័យក្មេងខាងលើនេះមានអាយុ23ឆ្នាំ មានស្រុកកំណើតនៅខេត្តបាត់ដំបង ។
តាមប្រភពពីនារីរូបនេះបានឲ្យដឹងថា រូបនាងបានស្គាល់នារីម្នាក់តាមបណ្ដាញសង្គមហ្វេសប៊ុករយៈពេល២ខែមកហើយ ដោយឆាតឱ្យរូបនាងមកស្នាក់នៅជាមួយនៅកន្លែងកើតហេតុដើម្បីជួយរកការងារឲ្យធ្វើ ខណៈពេលរូបនាងមកដល់បានពីរថ្ងៃ ស្ត្រីដែលនាងស្គាល់នោះបានបបួលនាងទៅផឹកស៊ីនៅក្នុងបន្ទប់ជួលរបស់បុរសម្នាក់ ដែលនៅក្នុងភូមិកើតហេតុខាងលើ។
ប្រភពដដែលបន្តទៀតថា ខណៈពេលទៅដល់បន្ទប់ជួល បុរសរូបនោះក៏បានទិញស្រាបៀរមកផឹកស៊ីជុំគ្នា៣នាក់ រហូតដល់ស្រវឹងជោកជាំរៀងៗខ្លួន ហើយស្ត្រីនោះក៏បានគេចខ្លួនបាត់ ដោយបន្សល់នៅតែរូបនាងជាមួយនឹងបុរសដែលជាម្ចាស់បន្ទប់ ។
ប្រភពដដែលបន្តថា ក្រោយមកបុរសរូបនោះបានដឹកនាងតាមម៉ូតូមួយគ្រឿងមិនចាំម៉ាក លុះមកដល់កន្លែងកើតហេតុដោយប្រាប់នាងថា «ទៅដេកនៅផ្ទះសំណាក់យកថ្លៃប៉ុន្មាន» ពេលនាងឮបែបនេះ រូបនាងបានឲ្យបុរសខាងលើនោះឈប់ម៉ូតូ បើមិនឈប់ម៉ូតូទេ រូបនាងនឹងលោតពីលើម៉ូតូ ។
ភ្លាមៗនោះបុរសខាងលើបានឈប់ម៉ូតូតាមការសំណូមពរបស់នារីរងគ្រោះ បន្ទាប់ពីឈប់ម៉ូតូនារីរងគ្រោះបានកាច់សោពន្លត់ ហើយដកសោម៉ូតូ រួចរត់ចូលក្នុងការដ្ឋានសំណង់មួយកន្លែងក្នុងស្ថានភាពស្រវឹងវង្វេងស្មារតី ហើយស្រែកឲ្យគេឯងជួយ ទើបបង្កឲ្យមានការណ៍ភ្ញាក់ផ្អើលចោមរោមមើល និងសួរនាំ ហើយរាយការណ៍ទៅប្រាប់នគរបាលរដ្ឋបាលប៉ុស្តិ៍ចោមចៅ៣ ឲ្យចុះមកកន្លែងកើតហេតុ ដើម្បីយកទៅសួរនាំតែម្តង៕ (កែសម្រួលដោយ ៖ បុប្ផា)
ចែករំលែកព័តមាននេះ