ខេត្តសៀមរាប ៖ រថយន្តម៉ាកកាមរីមួយគ្រឿងបើកបរក្នុងល្បឿនលឿនជ្រុលទៅបុកគោយន្ត
កន្ត្រៃពីក្រោយយ៉ាងពេញទំហឹង រួចរេចង្កូតទៅបុករថយន្តដឹកទំនិញធុនធំមួយគ្រឿងទៀត ក្នុងទិសដៅបញ្ច្រាសគ្នា បណ្តាលឱ្យអ្នកបើកបររថយន្តម៉ាកកាមរីបាត់បង់ជីវិតម្នាក់ និងអ្នករួមដំណើរម្នាក់របួសធ្ងន់ម្នាក់ ចំណែករថយន្តម៉ាកកាមរី និងគោយន្តកន្ត្រៃ ព្រមទាំងរថយន្តដឹកទំនិញបានរងការខូចខាតទាំង៣គ្រឿង ។
ហេតុការណ៍ខាងលនេះបានកើតឡើងកាលពីវេលាម៉ោង១និង៣០នាទីអធ្រាត្រឈានចូលថ្ងៃទី៤ ខែ មិថុនាឆ្នាំ២០២០ នៅលើផ្លូវជាតិលេខ៦៨ ត្រង់ចន្លោះគីឡូម៉ែត្រលេខ១០លេខ១១ ចំណុចខាងជើងថ្នល់ដាច់ចម្ងាយ២០០ម៉ែត្រ ស្ថិតក្នុងភូមិសាស្ត្រភូមិកំបោរ ឃុំចន្លាស់ដៃ ស្រុកក្រឡាញ់ ខេត្តសៀមរាប។
លោកវរសេនីយ៍ឯក ជី បេងជន អធិការដ្ឋាននគរបាលស្រុកក្រឡាញ់ បានប្រាប់ឱ្យដឹងកាលពីព្រឹកថ្ងៃទី៤ខែមិថុនា ឆ្នាំ២០២០នេះថា រថយន្តចំនួន២គ្រឿង និងគោយន្តកន្ត្រៃមួយគ្រឿងក្នុងហេតុការណ៍គ្រោះថ្នាក់ចរាចរណ៍ខាងលើ រួមមាន ១-រថយន្តមួយគ្រឿងជិះគ្នា២នាក់ ម៉ាកកាមរី ពណ៌ស្លែ ពាក់ស្លាកលេខ ភ្នំពេញ ២H-១២៦៧ បើកបរដោយឈ្មោះអូន ធន ភេទប្រុស អាយុ២១ឆ្នាំ បានបាត់បង់ជីវិត និងអ្នករួមដំណើរម្នាក់ឈ្មោះ ណែម ណាក់ ភេទប្រុស អាយុ ៤៥ឆ្នាំ រងរបួសធ្ងន់ ។ ជនរងគ្រោះទាំង២រស់នៅភូមិភ្នៀត សង្កាត់សំរោង ក្រុងសំរោង ខេត្តឧត្ដរមានជ័យ ។
២-គោយន្តកន្ត្រៃមួយគ្រឿងជិះគ្នា២នាក់ ពណ៌ក្រហម បើកបរដោយឈ្មោះ វុធ យ៉ាន ភេទប្រុស អាយុ៣០ ឆ្នាំ រស់នៅភូមិព្រែកជីក ឃុំព្រែកជីក ស្រុកម៉ោងឬស្សី ខេត្តបាត់ដំបង និងអ្នករួមដំណើរម្នាក់ឈ្មោះ អួច សម្ផស្ស ភេទស្រី អាយុ៣៣ឆ្នាំ ។
៣-រថយន្តធុនធំដឹកទំនិញមួយគ្រឿងជិះគ្នា៧នាក់ ពណ៌ខៀវ ពាក់ផ្លាកលេខ ត្បូងឃ្មុំ 3A-3132 បើកបរដោយឈ្មោះ អ៊ាត សុធី ភេទប្រុស អាយុ៥៤ឆ្នាំ រស់នៅភូមិស្រែស្ពៃ ឃុំអូររាំងឪ ស្រុកត្បូងឃ្មុំ ខេត្តត្បូងឃ្មុំ និងរួមដំណើរចំនួន៦នាក់រួមមាន ១-ឈ្មោះចាន ដូង ភេទប្រុស អាយុ២០ឆ្នាំ ២-ឈ្មោះ យូ យ៉ាង ភេទប្រុអាយុ២០ឆ្នាំ ៣-ឈ្មោះយ៉ាន យ៉នភេទប្រុស អាយុ២០ឆ្នាំ ៤-ឈ្មោះ ស្រី ស្រះ ភេទប្រុស អាយុ២០ឆ្នាំ ៥-ឈ្មោះ រ៉េន ហាក់ ភេទប្រុស អាយុ៣៤ឆ្នាំ និង៦-ឈ្មោះធឿន វុធ ភេទប្រុស អាយុ១៨ឆ្នាំ ។ អ្នករួមដំណើរទាំង៦នាក់រស់នៅភូមិបល្ល័ង្កឃុំបល្ល័ង្ក ស្រុកប្រាសាទបាគង ខេត្តសៀមរាប ។
លោកអធិការស្រុកក្រឡាញ់បានឱ្យដឹងបន្តថា មុនពេលកើតហេតុ មានរថយន្តមួយគ្រឿងជិះគ្នា២នាក់ម៉ាកកាមរី បានបើកបរក្នុងល្បឿនលឿនក្នុងទិសដៅពីជើងទៅត្បូង លុះមកដល់កន្លែងកើតហេតុខាងលើបានបុកពីក្រោយគោយន្តកន្ត្រៃមួយគ្រឿងជិះគ្នា២នាក់យ៉ាងពេញទំហឹងក្នុងទិសដៅស្របគ្នា ។ បន្ទាប់មករថយន្តម៉ាកកាមរីបានរ៉េចង្កូតទៅខាងឆ្វេងដៃទៅបុកនឹងរថយន្តធុនធំដឹកទំនិញមួយគ្រឿងផ្សេងទៀតដែលជិះគ្នា៧នាក់ ក្នុងទិសដៅបញ្ច្រាសពីត្បូងទៅជើង បណ្តាលឱ្យអ្នកបើកបររថយន្តម៉ាកកាមរីបាត់បង់ជីវិត ចំណែកអ្នករួមដំណើរម្នាក់រងរបួសធ្ងន់ត្រូវបានដឹកយកទៅសង្គ្រោះនៅមន្ទីរពេទ្យបង្អែកខេត្តឧត្តរមានជ័យ ។ រីឯរថយន្តទាំង២គ្រឿង និងគោយន្តកន្ត្រៃ១គ្រឿងទៀតបានរងការខូចខាតយ៉ាងដំណំទាំង៣គ្រឿង ។
ក្រោយពេលកើតហេតុ រថយន្តម៉ាកកាមរី និងរថយន្តធុនធំដឹកទំនិញ ព្រមទាំងគោយន្តកន្ត្រៃ ត្រូវបានកម្លាំងជំនាញអូសយកទៅរក្សាទុកនៅអធិការដ្ឋាននគរបាលស្រុកក្រឡាញ់ ដើម្បីរង់ចាំធ្វើការដោះស្រាយតាមនីតិវិធីនៅពេលក្រោយ ៕
ចែករំលែកព័តមាននេះ