រាជធានីភ្នំពេញ៖ ការចាប់ផ្តើមមុខជំនួញមិនមែនជារឿងលំបាកនោះទេ តែអ្វីដែលសហគ្រិនទាំងចាស់ទាំងក្មេងប្រឈមមុខខ្លាំងនោះ គឺថាធ្វើម៉េចដើម្បីឲ្យកុំឲ្យមុខជំនួញដែលបង្កើតនោះត្រូវដួលរលំ ឬបរាជ័យ ។
លោកឧកញ៉ាឱសថបណ្ឌិត ហៃ លីអ៊ាង ស្ថាបនិកក្រុមហ៊ុនឱសថ PPM និងក្រុមហ៊ុនផលិតផលសរីរាង្គ Confirel និងជាសហគ្រិនខ្មែរដ៏ឆ្នើមមួយរូបដែលមានផលិតផលប្រមាណជាង ៤០០ ប្រភេទ រាប់ចាប់ពីផលិតផលចំណីអាហាររហូតដល់ថ្នាំពេទ្យ កំពុងវាយលុកទីផ្សារជាតិនិងអន្តរជាតិយ៉ាងខ្លាំងក្លា បានទម្លាយចេញនូវគន្លឹះសំខាន់ៗដែលសហគ្រិនផ្សេងៗទៀត ឬក៏អ្នកដែលចង់បង្កើតមុខជំនួញគួរចៀសវាង ដើម្បីភាពជោគជ័យនៃមុខជំនួញ ។
ឧកញ៉ាឱសថបណ្ឌិត ហៃ លីអ៊ាង ដែលមានសម្តីមុតៗមួយៗបានរៀបរាប់ថា «ដើម្បីកុំឲ្យមុខជំនួញបរាជ័យគឺវាតែងតែមាននូវគន្លឹះរបស់វា ។ ប៉ុន្តែដើម្បីកុំឲ្យបរាជ័យ គឺទី ១)- គឺថាធ្វើអ្វីមួយគឺត្រូវតែមានគម្រោង ថាយើងចង់បានអី កុំឲ្យយើងធ្វើដូចគេ ។ ភាគច្រើនបរាជ័យនៃមុខជំនួញ ដោយសារតែបងប្អូនយើងភាគច្រើន ចង់ធ្វើដូចគេ ។ តែយើងមិនដឹងថាហេតុអ្វីបានជាគេធ្វើអញ្ចឹង តែបែរជាយើងខ្លួនឯងចង់ធ្វើដូចគេ ។ ជាទូទៅកាលណា យើងមិនដឹងថាគេចង់ធ្វើអី យើងមិនអាចធ្វើដូចគេបានទេ អញ្ចឹងយើងធ្វើបានដូចគេតែមួយភាគប៉ុណ្ណោះ អញ្ចឹងបើធ្វើបានតែមួយភាគ គឺយើងបរាជ័យហើយ ពីព្រោះអតិថិជនគាត់ជ្រើសរើសតែអ្នកណា ផលិតផលណាដែលគេស្គាល់ច្រើនជាងគេ» ។
ឧកញ៉ាឱសថបណ្ឌិត បានពោលបញ្ជាក់ថា «អញ្ចឹងការបរាជ័យគឺច្រើនតែការធ្វើតាមគេអត់មានគម្រោងអីច្បាស់លាស់។ ឧទាហរណ៍ ដូចជាសព្វថ្ងៃនេះ យើងកំពុងតែផ្អើលនាំគ្នាទិញដី ដោយឃើញគេទិញដីលក់បានលុយច្រើន អញ្ចឹងយើងធ្វើតាមគេ ប៉ុន្តែយើងអត់បានឃើញអ្នកដែលខាត (ដោយសារតែទិញដីទេ) អញ្ចឹងជួនកាលយើងទិញទៅ វាអាចខុសដែរ ព្រោះរកស៊ីវាតែងតែមានចំនេញ មានខាត នេះជាឧទាហរណ៍ជាក់ស្តែង ។
ប៉ុន្តែបើគេមានគម្រោងថាទិញដី ទៅគេធ្វើបូរី ហើយចំណាយអស់ប៉ុណ្ណេះ ហើយគេអាចចំនេញបានប៉ុណ្ណេះភាគ អញ្ចឹងគេមិនអាចខាតទេ ។ អញ្ចឹងចង់ប្រកបរបរអ្វីក៏ដោយ គឺត្រូវតែមានគម្រោង ហើយគម្រោងនោះទៀតសោតត្រូវធ្វើម៉េច ធ្វើតាមលទ្ធភាពដែលយើងមាន ដោយការការគូសវាសវេលាកាត់ជាកង់ៗឲ្យបានច្បាស់លាស់។ ឧទាហរណ័ជណ្តើរកំពស់ ១០ ម៉ែត្រ យើងមិនអាចឡើងដល់ទៅ ១០ ម៉ែត្រភ្លាមៗទេ អញ្ចឹងដើម្បីឡើងបាន ១០ ម៉ែត្រទាល់តែយើងយក ១០ ម៉ែត្រនោះយកទៅកាត់ជា ២០ កង់អីអញ្ចឹងទៅ ឬ ក៏ ៣០ កង់អីអញ្ចឹងទៅ» ។
លោកបានបន្ថែមថា «ដូច្នេះ ទោះបីជាជាយើងមិនទាន់ឡើងបានភ្លាម ១០ ម៉ែត្រក្នុងថ្ងៃនេះ ក៏យើងបានឡើងបាន ៣ ម៉ែត្រអីអញ្ចឹងទៅ ដូច្នេះបន្តិចម្តងៗយើងនឹងឡើងទៅដល់កំពស់ ១០ ម៉ែត្រនោះ។ ជាទូទៅបើយើងចង់បោះមួយជំហាន ឡើងឲ្យបាន ១០ ម៉ែត្រភ្លាមគឺយើងច្បាស់ជាដួលហើយ» ៕
ចែករំលែកព័តមាននេះ